1-2. කුසලත්තික-සහෙතුකදුකං

8. නකුසලං නසහෙතුකං ධම්මං පටිච්ච නකුසලො නසහෙතුකො ධම්මො උප්පජ්ජති හෙතුපච්චයා. නකුසලං නසහෙතුකං ධම්මං පටිච්ච නඅකුසලො නසහෙතුකො ධම්මො උප්පජ්ජති හෙතුපච්චයා. නකුසලං නසහෙතුකං ධම්මං පටිච්ච නකුසලො නසහෙතුකො ච නඅකුසලො නසහෙතුකො ච ධම්මා උප්පජ්ජන්ති හෙතුපච්චයා. (3)

නඅකුසලං නසහෙතුකං ධම්මං පටිච්ච නඅකුසලො නසහෙතුකො ධම්මො උප්පජ්ජති හෙතුපච්චයා. නඅකුසලං නසහෙතුකං ධම්මං පටිච්ච නකුසලො නසහෙතුකො ධම්මො උප්පජ්ජති හෙතුපච්චයා. නඅකුසලං නසහෙතුකං ධම්මං පටිච්ච නකුසලො නසහෙතුකො ච නඅකුසලො නසහෙතුකො ච ධම්මා උප්පජ්ජන්ති හෙතුපච්චයා. (3)

නඅබ්‍යාකතං නසහෙතුකං ධම්මං පටිච්ච නකුසලො නසහෙතුකො ධම්මො උප්පජ්ජති හෙතුපච්චයා… තීණි.

නකුසලං නසහෙතුකඤ්ච නඅබ්‍යාකතං නසහෙතුකඤ්ච ධම්මං පටිච්ච නකුසලො නසහෙතුකො ධම්මො උප්පජ්ජති හෙතුපච්චයා… තීණි.

නකුසලං නසහෙතුකඤ්ච නඅකුසලං නසහෙතුකඤ්ච ධම්මං පටිච්ච නකුසලො නසහෙතුකො ධම්මො උප්පජ්ජති හෙතුපච්චයා… තීණි. (සංඛිත්තං.)

හෙතුයා පන්නරස, ආරම්මණෙ නව…පෙ… අධිපතියා නව…පෙ… විපාකෙ නව…පෙ… අවිගතෙ පන්නරස. (සබ්බත්ථ විත්ථාරො.)

9. නකුසලං නඅහෙතුකං ධම්මං පටිච්ච නකුසලො නඅහෙතුකො ධම්මො උප්පජ්ජති හෙතුපච්චයා… පඤ්ච.

නඅකුසලං නඅහෙතුකං ධම්මං පටිච්ච නඅකුසලො නඅහෙතුකො ධම්මො උප්පජ්ජති හෙතුපච්චයා… පඤ්ච.

නඅබ්‍යාකතං නඅහෙතුකං ධම්මං පටිච්ච නඅබ්‍යාකතො නඅහෙතුකො ධම්මො උප්පජ්ජති හෙතුපච්චයා… පඤ්ච.

නකුසලං නඅහෙතුකඤ්ච නඅබ්‍යාකතං නඅහෙතුකඤ්ච ධම්මං පටිච්ච නකුසලො නඅහෙතුකො ධම්මො උප්පජ්ජති හෙතුපච්චයා… තීණි.

නඅකුසලං නඅහෙතුකඤ්ච නඅබ්‍යාකතං නඅහෙතුකඤ්ච ධම්මං පටිච්ච නඅකුසලො නඅහෙතුකො ධම්මො උප්පජ්ජති හෙතුපච්චයා… තීණි.

නකුසලං නඅහෙතුකඤ්ච නඅකුසලං නඅහෙතුකඤ්ච ධම්මං පටිච්ච නකුසලො නඅහෙතුකො ධම්මො උප්පජ්ජති හෙතුපච්චයා… තීණි. (සංඛිත්තං.)

හෙතුයා චතුවීස…පෙ… අවිගතෙ චතුවීස. (සබ්බත්ථ විත්ථාරො.)