2. වෙදනාත්තිකං

1-7. පටිච්චවාරාදි

11. නසුඛාය වෙදනාය සම්පයුත්තං ධම්මං පටිච්ච නසුඛාය වෙදනාය සම්පයුත්තො ධම්මො උප්පජ්ජති හෙතුපච්චයා. නසුඛාය වෙදනාය සම්පයුත්තං ධම්මං පටිච්ච නදුක්ඛාය වෙදනාය සම්පයුත්තො ධම්මො උප්පජ්ජති හෙතුපච්චයා. නසුඛාය වෙදනාය සම්පයුත්තං ධම්මං පටිච්ච නඅදුක්ඛමසුඛාය වෙදනාය සම්පයුත්තො ධම්මො උප්පජ්ජති හෙතුපච්චයා. නසුඛාය වෙදනාය සම්පයුත්තං ධම්මං පටිච්ච නසුඛාය වෙදනාය සම්පයුත්තො ච නඅදුක්ඛමසුඛාය වෙදනාය සම්පයුත්තො ච ධම්මා උප්පජ්ජන්ති හෙතුපච්චයා. නසුඛාය වෙදනාය සම්පයුත්තං ධම්මං පටිච්ච නදුක්ඛාය වෙදනාය සම්පයුත්තො ච නඅදුක්ඛමසුඛාය වෙදනාය සම්පයුත්තො ච ධම්මා උප්පජ්ජන්ති හෙතුපච්චයා. නසුඛාය වෙදනාය සම්පයුත්තං ධම්මං පටිච්ච නසුඛාය වෙදනාය සම්පයුත්තො ච නදුක්ඛාය වෙදනාය සම්පයුත්තො ච ධම්මා උප්පජ්ජන්ති හෙතුපච්චයා. නසුඛාය වෙදනාය සම්පයුත්තං ධම්මං පටිච්ච නසුඛාය වෙදනාය සම්පයුත්තො ච නදුක්ඛාය වෙදනාය සම්පයුත්තො ච නඅදුක්ඛමසුඛාය වෙදනාය සම්පයුත්තො ච ධම්මා උප්පජ්ජන්ති හෙතුපච්චයා. (7)

නදුක්ඛාය වෙදනාය සම්පයුත්තං ධම්මං පටිච්ච නදුක්ඛාය වෙදනාය සම්පයුත්තො ධම්මො උප්පජ්ජති හෙතුපච්චයා… සත්ත.

නඅදුක්ඛමසුඛාය වෙදනාය සම්පයුත්තං ධම්මං පටිච්ච නඅදුක්ඛමසුඛාය වෙදනාය සම්පයුත්තො ධම්මො උප්පජ්ජති හෙතුපච්චයා… සත්ත. (සංඛිත්තං.)