55-68. මහන්තරදුකාදි

22. නසාරම්මණං ධම්මං පටිච්ච සාරම්මණො ධම්මො උප්පජ්ජති හෙතුපච්චයා. නසාරම්මණං ධම්මං පටිච්ච අනාරම්මණො ධම්මො උප්පජ්ජති හෙතුපච්චයා. නසාරම්මණං ධම්මං පටිච්ච සාරම්මණො ච අනාරම්මණො ච ධම්මා උප්පජ්ජන්ති හෙතුපච්චයා. තීණි.

නඅනාරම්මණං ධම්මං පටිච්ච අනාරම්මණො ධම්මො උප්පජ්ජති හෙතුපච්චයා… තීණි.

නසාරම්මණඤ්ච නඅනාරම්මණඤ්ච ධම්මං පටිච්ච සාරම්මණො ධම්මො උප්පජ්ජති හෙතුපච්චයා… තීණි. හෙතුයා නව.

23. නචිත්තං ධම්මං පටිච්ච චිත්තො ධම්මො උප්පජ්ජති හෙතුපච්චයා. නචිත්තං ධම්මං පටිච්ච නොචිත්තො ධම්මො උප්පජ්ජති හෙතුපච්චයා. නචිත්තං ධම්මං පටිච්ච චිත්තො ච නොචිත්තො ච ධම්මා උප්පජ්ජන්ති හෙතුපච්චයා. තීණි.

නනොචිත්තං ධම්මං පටිච්ච නොචිත්තො ධම්මො උප්පජ්ජති හෙතුපච්චයා. එකං.

නචිත්තඤ්ච නනොචිත්තඤ්ච ධම්මං පටිච්ච නොචිත්තො ධම්මො උප්පජ්ජති හෙතුපච්චයා. එකං. හෙතුයා පඤ්ච.

24. නචෙතසිකං ධම්මං පටිච්ච චෙතසිකො ධම්මො උප්පජ්ජති හෙතුපච්චයා. නචෙතසිකං ධම්මං පටිච්ච අචෙතසිකො ධම්මො උප්පජ්ජති හෙතුපච්චයා. නචෙතසිකං ධම්මං පටිච්ච චෙතසිකො ච අචෙතසිකො ච ධම්මා උප්පජ්ජන්ති හෙතුපච්චයා. හෙතුයා නව.

25. නචිත්තසම්පයුත්තං ධම්මං පටිච්ච චිත්තසම්පයුත්තො ධම්මො උප්පජ්ජති හෙතුපච්චයා. නචිත්තසම්පයුත්තං ධම්මං පටිච්ච චිත්තවිප්පයුත්තො ධම්මො උප්පජ්ජති හෙතුපච්චයා. නචිත්තසම්පයුත්තං ධම්මං පටිච්ච චිත්තසම්පයුත්තො ච චිත්තවිප්පයුත්තො ච ධම්මා උප්පජ්ජන්ති හෙතුපච්චයා. (3)

නචිත්තවිප්පයුත්තං ධම්මං පටිච්ච චිත්තවිප්පයුත්තො ධම්මො උප්පජ්ජති හෙතුපච්චයා. නචිත්තවිප්පයුත්තං ධම්මං පටිච්ච චිත්තසම්පයුත්තො ධම්මො උප්පජ්ජති හෙතුපච්චයා. නචිත්තවිප්පයුත්තං ධම්මං පටිච්ච චිත්තසම්පයුත්තො ච චිත්තවිප්පයුත්තො ච ධම්මා උප්පජ්ජන්ති හෙතුපච්චයා. (3)

නචිත්තසම්පයුත්තඤ්ච නචිත්තවිප්පයුත්තඤ්ච ධම්මං පටිච්ච චිත්තසම්පයුත්තො ධම්මො උප්පජ්ජති හෙතුපච්චයා… තීණි. හෙතුයා නව.

26. නචිත්තසංසට්ඨං ධම්මං පටිච්ච චිත්තසංසට්ඨො ධම්මො උප්පජ්ජති හෙතුපච්චයා. නචිත්තසංසට්ඨං ධම්මං පටිච්ච චිත්තවිසංසට්ඨො ධම්මො උප්පජ්ජති හෙතුපච්චයා. නචිත්තසංසට්ඨං ධම්මං පටිච්ච චිත්තසංසට්ඨො ච චිත්තවිසංසට්ඨො ච ධම්මා උප්පජ්ජන්ති හෙතුපච්චයා… හෙතුයා නව.

27. නචිත්තසමුට්ඨානං ධම්මං පටිච්ච චිත්තසමුට්ඨානො ධම්මො උප්පජ්ජති හෙතුපච්චයා. නචිත්තසමුට්ඨානං ධම්මං පටිච්ච නොචිත්තසමුට්ඨානො ධම්මො උප්පජ්ජති හෙතුපච්චයා. නචිත්තසමුට්ඨානං ධම්මං පටිච්ච චිත්තසමුට්ඨානො ච නොචිත්තසමුට්ඨානො ච ධම්මා උප්පජ්ජන්ති හෙතුපච්චයා… හෙතුයා නව.

28. නචිත්තසහභුං ධම්මං පටිච්ච චිත්තසහභූ ධම්මො උප්පජ්ජති හෙතුපච්චයා. නචිත්තසහභුං ධම්මං පටිච්ච නොචිත්තසහභූ ධම්මො උප්පජ්ජති හෙතුපච්චයා. නචිත්තසහභුං ධම්මං පටිච්ච චිත්තසහභූ ච නොචිත්තසහභූ ච ධම්මා උප්පජ්ජන්ති හෙතුපච්චයා… හෙතුයා නව.

29. නචිත්තානුපරිවත්තිං ධම්මං පටිච්ච චිත්තානුපරිවත්තී ධම්මො උප්පජ්ජති හෙතුපච්චයා. නචිත්තානුපරිවත්තිං ධම්මං පටිච්ච නොචිත්තානුපරිවත්තී ධම්මො උප්පජ්ජති හෙතුපච්චයා. නචිත්තානුපරිවත්තිං ධම්මං පටිච්ච චිත්තානුපරිවත්තී ච නොචිත්තානුපරිවත්තී ච ධම්මා උප්පජ්ජන්ති හෙතුපච්චයා… හෙතුයා නව.

30. නචිත්තසංසට්ඨසමුට්ඨානං ධම්මං පටිච්ච චිත්තසංසට්ඨසමුට්ඨානො ධම්මො උප්පජ්ජති හෙතුපච්චයා… හෙතුයා නව.

31. නචිත්තසංසට්ඨසමුට්ඨානසහභුං ධම්මං පටිච්ච චිත්තසංසට්ඨසමුට්ඨානසහභූ ධම්මො උප්පජ්ජති හෙතුපච්චයා… හෙතුයා නව.

32. නචිත්තසංසට්ඨසමුට්ඨානානුපරිවත්තිං ධම්මං පටිච්ච චිත්තසංසට්ඨසමුට්ඨානානුපරිවත්තී ධම්මො උප්පජ්ජති හෙතුපච්චයා… හෙතුයා නව.

33. නඅජ්ඣත්තිකං ධම්මං පටිච්ච අජ්ඣත්තිකො ධම්මො උප්පජ්ජති හෙතුපච්චයා… තීණි.

නබාහිරං ධම්මං පටිච්ච බාහිරො ධම්මො උප්පජ්ජති හෙතුපච්චයා… තීණි.

නඅජ්ඣත්තිකඤ්ච නබාහිරඤ්ච ධම්මං පටිච්ච අජ්ඣත්තිකො ධම්මො උප්පජ්ජති හෙතුපච්චයා… තීණි. හෙතුයා නව.

34. නඋපාදා ධම්මං පටිච්ච උපාදා ධම්මො උප්පජ්ජති හෙතුපච්චයා… හෙතුයා පඤ්ච.

35. නඋපාදින්නං ධම්මං පටිච්ච අනුපාදින්නො ධම්මො උප්පජ්ජති හෙතුපච්චයා… හෙතුයා පඤ්ච.