පච්චනීයං

නහෙතුනආරම්මණපච්චයාදි

2. අබ්‍යාකතං සුඛාය වෙදනාය සම්පයුත්තං ධම්මං පටිච්ච නකුසලො නසුඛාය වෙදනාය සම්පයුත්තො ධම්මො උප්පජ්ජති නහෙතුපච්චයා … තීණි.

3. කුසලං සුඛාය වෙදනාය සම්පයුත්තං ධම්මං පටිච්ච නකුසලො නසුඛාය වෙදනාය සම්පයුත්තො ධම්මො උප්පජ්ජති නආරම්මණපච්චයා. කුසලං සුඛාය වෙදනාය සම්පයුත්තං ධම්මං පටිච්ච නඅකුසලො නසුඛාය වෙදනාය සම්පයුත්තො ධම්මො උප්පජ්ජති නආරම්මණපච්චයා. කුසලං සුඛාය වෙදනාය සම්පයුත්තං ධම්මං පටිච්ච නකුසලො නසුඛාය වෙදනාය සම්පයුත්තො ච නඅකුසලො නසුඛාය වෙදනාය සම්පයුත්තො ච ධම්මා උප්පජ්ජන්ති නආරම්මණපච්චයා. තීණි.

අකුසලං සුඛාය වෙදනාය සම්පයුත්තං ධම්මං පටිච්ච නඅකුසලො නසුඛාය වෙදනාය සම්පයුත්තො ධම්මො උප්පජ්ජති නආරම්මණපච්චයා… තීණි.

අබ්‍යාකතං සුඛාය වෙදනාය සම්පයුත්තං ධම්මං පටිච්ච නකුසලො නසුඛාය වෙදනාය සම්පයුත්තො ධම්මො උප්පජ්ජති නආරම්මණපච්චයා. අබ්‍යාකතං සුඛාය වෙදනාය සම්පයුත්තං ධම්මං පටිච්ච නඅකුසලො නසුඛාය වෙදනාය සම්පයුත්තො ධම්මො උප්පජ්ජති නආරම්මණපච්චයා. අබ්‍යාකතං සුඛාය වෙදනාය සම්පයුත්තං ධම්මං පටිච්ච නකුසලො නසුඛාය වෙදනාය සම්පයුත්තො ච නඅකුසලො නසුඛාය වෙදනාය සම්පයුත්තො ච ධම්මා උප්පජ්ජන්ති නආරම්මණපච්චයා. තීණි.

4. නහෙතුයා තීණි, නආරම්මණෙ නව, නඅධිපතියා තෙරස…පෙ… නොවිගතෙ නව.

හෙතුපච්චයා නආරම්මණෙ නව.

නහෙතුපච්චයා ආරම්මණෙ තීණි.

(සහජාතවාරම්පි පච්චයවාරම්පි නිස්සයවාරම්පි සංසට්ඨවාරම්පි සම්පයුත්තවාරම්පි පටිච්චවාරසදිසං.)

5. කුසලො සුඛාය වෙදනාය සම්පයුත්තො ධම්මො නකුසලස්ස නසුඛාය වෙදනාය සම්පයුත්තස්ස ධම්මස්ස හෙතුපච්චයෙන පච්චයො…පෙ….

ආරම්මණෙ අට්ඨාරස. (පඤ්හාවාරම්පි විත්ථාරෙතබ්බං.)