2-1. වෙදනාත්තික-හෙතුදුකං

65. සුඛාය වෙදනාය සම්පයුත්තං හෙතුං ධම්මං පටිච්ච නසුඛාය වෙදනාය සම්පයුත්තො නහෙතු ධම්මො උප්පජ්ජති හෙතුපච්චයා. සුඛාය වෙදනාය සම්පයුත්තං හෙතුං ධම්මං පටිච්ච නදුක්ඛාය වෙදනාය සම්පයුත්තො නහෙතු ධම්මො උප්පජ්ජති හෙතුපච්චයා. සුඛාය වෙදනාය සම්පයුත්තං හෙතුං ධම්මං පටිච්ච නඅදුක්ඛමසුඛාය වෙදනාය සම්පයුත්තො නහෙතු ධම්මො උප්පජ්ජති හෙතුපච්චයා…පෙ… සත්ත පඤ්හා.

දුක්ඛාය වෙදනාය සම්පයුත්තං හෙතුං ධම්මං පටිච්ච නදුක්ඛාය වෙදනාය සම්පයුත්තො නහෙතු ධම්මො උප්පජ්ජති හෙතුපච්චයා… සත්ත පඤ්හා.

අදුක්ඛමසුඛාය වෙදනාය සම්පයුත්තං හෙතුං ධම්මං පටිච්ච නඅදුක්ඛමසුඛාය වෙදනාය සම්පයුත්තො නහෙතු ධම්මො උප්පජ්ජති හෙතුපච්චයා… සත්ත පඤ්හා. හෙතුයා එකවීස…පෙ… අවිගතෙ එකවීස. (සබ්බත්ථ එකවීස.)

66. සුඛාය වෙදනාය සම්පයුත්තං නහෙතුං ධම්මං පටිච්ච නදුක්ඛාය වෙදනාය සම්පයුත්තො නනහෙතු ධම්මො උප්පජ්ජති හෙතුපච්චයා. සුඛාය වෙදනාය සම්පයුත්තං නහෙතුං ධම්මං පටිච්ච නඅදුක්ඛමසුඛාය වෙදනාය සම්පයුත්තො නනහෙතු ධම්මො උප්පජ්ජති හෙතුපච්චයා. සුඛාය වෙදනාය සම්පයුත්තං නහෙතුං ධම්මං පටිච්ච නදුක්ඛාය වෙදනාය සම්පයුත්තො නනහෙතු ච නඅදුක්ඛමසුඛාය වෙදනාය සම්පයුත්තො නනහෙතු ච ධම්මා උප්පජ්ජන්ති හෙතුපච්චයා. තීණි.

දුක්ඛාය වෙදනාය සම්පයුත්තං නහෙතුං ධම්මං පටිච්ච නසුඛාය වෙදනාය සම්පයුත්තො නනහෙතු ධම්මො උප්පජ්ජති හෙතුපච්චයා… තීණි.

අදුක්ඛමසුඛාය වෙදනාය සම්පයුත්තං නහෙතුං ධම්මං පටිච්ච නසුඛාය වෙදනාය සම්පයුත්තො නනහෙතු ධම්මො උප්පජ්ජති හෙතුපච්චයා… තීණි… හෙතුයා නව.