1. පච්චයානුලොමං

හෙතුපච්චයො

1. හෙතුං ධම්මං පටිච්ච නහෙතු ධම්මො උප්පජ්ජති හෙතුපච්චයා – හෙතුං ධම්මං පටිච්ච සම්පයුත්තකා ඛන්ධා චිත්තසමුට්ඨානඤ්ච රූපං; පටිසන්ධික්ඛණෙ…පෙ… හෙතුං ධම්මං පටිච්ච නනහෙතු ධම්මො උප්පජ්ජති හෙතුපච්චයා. හෙතුං ධම්මං පටිච්ච නහෙතු ච නනහෙතු ච ධම්මා උප්පජ්ජන්ති හෙතුපච්චයා. (3)

නහෙතුං ධම්මං පටිච්ච නනහෙතු ධම්මො උප්පජ්ජති හෙතුපච්චයා. නහෙතුං ධම්මං පටිච්ච නහෙතු ධම්මො උප්පජ්ජති හෙතුපච්චයා. නහෙතුං ධම්මං පටිච්ච නහෙතු ච නනහෙතු ච ධම්මා උප්පජ්ජන්ති හෙතුපච්චයා. (3)

හෙතුඤ්ච නහෙතුඤ්ච ධම්මං පටිච්ච නහෙතු ධම්මො උප්පජ්ජති හෙතුපච්චයා. හෙතුඤ්ච නහෙතුඤ්ච ධම්මං පටිච්ච නනහෙතු ධම්මො උප්පජ්ජති හෙතුපච්චයා. හෙතුඤ්ච නහෙතුඤ්ච ධම්මං පටිච්ච නහෙතු ච නනහෙතු ච ධම්මා උප්පජ්ජන්ති හෙතුපච්චයා. (3) (සංඛිත්තං.)

හෙතුයා නව, ආරම්මණෙ නව…පෙ… අවිගතෙ නව. (සහජාතවාරම්පි…පෙ… සම්පයුත්තවාරම්පි පටිච්චවාරසදිසං.)

හෙතු-ආරම්මණපච්චයා

2. හෙතු ධම්මො නහෙතුස්ස ධම්මස්ස හෙතුපච්චයෙන පච්චයො… තීණි.

හෙතු ධම්මො නහෙතුස්ස ධම්මස්ස ආරම්මණපච්චයෙන පච්චයො… තීණි.

නහෙතු ධම්මො නනහෙතුස්ස ධම්මස්ස ආරම්මණපච්චයෙන පච්චයො… තීණි.

හෙතු ච නහෙතු ච ධම්මා නහෙතුස්ස ධම්මස්ස ආරම්මණපච්චයෙන පච්චයො… තීණි. (සංඛිත්තං.)

3. හෙතුයා තීණි, ආරම්මණෙ නව…පෙ… අවිගතෙ නව. (පඤ්හාවාරම්පි එවං විත්ථාරෙතබ්බං.)