1. විභඞ්ගවාරො

හෙතුපච්චයො

106. සඤ්ඤොජනො චෙව සඤ්ඤොජනසම්පයුත්තො ච ධම්මො සඤ්ඤොජනස්ස චෙව සඤ්ඤොජනසම්පයුත්තස්ස ච ධම්මස්ස හෙතුපච්චයෙන පච්චයො – කාමරාගසඤ්ඤොජනො දිට්ඨිසඤ්ඤොජනස්ස අවිජ්ජාසඤ්ඤොජනස්ස හෙතුපච්චයෙන පච්චයො (චක්කං). (1)

සඤ්ඤොජනො චෙව සඤ්ඤොජනසම්පයුත්තො ච ධම්මො සඤ්ඤොජනසම්පයුත්තස්ස චෙව නො ච සඤ්ඤොජනස්ස ධම්මස්ස හෙතුපච්චයෙන පච්චයො – සඤ්ඤොජනා චෙව සඤ්ඤොජනසම්පයුත්තා ච හෙතූ සම්පයුත්තකානං ඛන්ධානං හෙතුපච්චයෙන පච්චයො. (2)

සඤ්ඤොජනො චෙව සඤ්ඤොජනසම්පයුත්තො ච ධම්මො සඤ්ඤොජනස්ස චෙව සඤ්ඤොජනසම්පයුත්තස්ස ච සඤ්ඤොජනසම්පයුත්තස්ස චෙව නො ච සඤ්ඤොජනස්ස ච ධම්මස්ස හෙතුපච්චයෙන පච්චයො – කාමරාගසඤ්ඤොජනො දිට්ඨිසඤ්ඤොජනස්ස අවිජ්ජාසඤ්ඤොජනස්ස සම්පයුත්තකානඤ්ච ඛන්ධානං හෙතුපච්චයෙන පච්චයො (චක්කං). (3)

ආරම්මණපච්චයො

107. සඤ්ඤොජනො චෙව සඤ්ඤොජනසම්පයුත්තො ච ධම්මො සඤ්ඤොජනස්ස චෙව සඤ්ඤොජනසම්පයුත්තස්ස ච ධම්මස්ස ආරම්මණපච්චයෙන පච්චයො – සඤ්ඤොජනෙ ආරබ්භ සඤ්ඤොජනා උප්පජ්ජන්ති. (මූලං කාතබ්බං) සඤ්ඤොජනෙ ආරබ්භ සඤ්ඤොජනසම්පයුත්තා චෙව නො ච සඤ්ඤොජනා ඛන්ධා උප්පජ්ජන්ති. (මූලං කාතබ්බං) සඤ්ඤොජනෙ ආරබ්භ සඤ්ඤොජනා ච සඤ්ඤොජනසම්පයුත්තකා ච ඛන්ධා උප්පජ්ජන්ති. (1)

සඤ්ඤොජනසම්පයුත්තො චෙව නො ච සඤ්ඤොජනො ධම්මො සඤ්ඤොජනසම්පයුත්තස්ස චෙව නො ච සඤ්ඤොජනස්ස ධම්මස්ස ආරම්මණපච්චයෙන පච්චයො – සඤ්ඤොජනසම්පයුත්තෙ චෙව නො ච සඤ්ඤොජනෙ ඛන්ධෙ ආරබ්භ සඤ්ඤොජනසම්පයුත්තා චෙව නො ච සඤ්ඤොජනා ඛන්ධා උප්පජ්ජන්ති. (1)

සඤ්ඤොජනසම්පයුත්තො චෙව නො ච සඤ්ඤොජනො ධම්මො සඤ්ඤොජනස්ස චෙව සඤ්ඤොජනසම්පයුත්තස්ස ච ධම්මස්ස ආරම්මණපච්චයෙන පච්චයො – සඤ්ඤොජනසම්පයුත්තෙ චෙව නො ච සඤ්ඤොජනෙ ඛන්ධෙ ආරබ්භ සඤ්ඤොජනා උප්පජ්ජන්ති. (2)

සඤ්ඤොජනසම්පයුත්තො චෙව නො ච සඤ්ඤොජනො ධම්මො සඤ්ඤොජනස්ස චෙව සඤ්ඤොජනසම්පයුත්තස්ස ච සඤ්ඤොජනසම්පයුත්තස්ස චෙව නො ච සඤ්ඤොජනස්ස ච ධම්මස්ස ආරම්මණපච්චයෙන පච්චයො – සඤ්ඤොජනසම්පයුත්තෙ චෙව නො ච සඤ්ඤොජනෙ ඛන්ධෙ ආරබ්භ සඤ්ඤොජනා ච සඤ්ඤොජනසම්පයුත්තකා ච ඛන්ධා උප්පජ්ජන්ති. (3)

සඤ්ඤොජනො චෙව සඤ්ඤොජනසම්පයුත්තො ච සඤ්ඤොජනසම්පයුත්තො චෙව නො ච සඤ්ඤොජනො ච ධම්මා සඤ්ඤොජනස්ස චෙව සඤ්ඤොජනසම්පයුත්තස්ස ච ධම්මස්ස ආරම්මණපච්චයෙන පච්චයො… තීණි.

අධිපතිපච්චයො

108. සඤ්ඤොජනො චෙව සඤ්ඤොජනසම්පයුත්තො ච ධම්මො සඤ්ඤොජනස්ස චෙව සඤ්ඤොජනසම්පයුත්තස්ස ච ධම්මස්ස අධිපතිපච්චයෙන පච්චයො – ආරම්මණාධිපති… තීණි.

සඤ්ඤොජනසම්පයුත්තො චෙව නො ච සඤ්ඤොජනො ධම්මො සඤ්ඤොජනසම්පයුත්තස්ස චෙව නො ච සඤ්ඤොජනස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති… තීණි (ඉමාසු තීසුපි පඤ්හාසු ආරම්මණාධිපතිපි සහජාතාධිපතිපි කාතබ්බා).

සඤ්ඤොජනො චෙව සඤ්ඤොජනසම්පයුත්තො ච සඤ්ඤොජනසම්පයුත්තො චෙව නො ච සඤ්ඤොජනො ච ධම්මා සඤ්ඤොජනස්ස චෙව සඤ්ඤොජනසම්පයුත්තස්ස ච ධම්මස්ස අධිපතිපච්චයෙන පච්චයො – ආරම්මණාධිපති… තීණි.

අනන්තරපච්චයාදි

109. සඤ්ඤොජනො චෙව සඤ්ඤොජනසම්පයුත්තො ච ධම්මො සඤ්ඤොජනස්ස චෙව සඤ්ඤොජනසම්පයුත්තස්ස ච ධම්මස්ස අනන්තරපච්චයෙන පච්චයො… නව (නින්නානාකරණං, විභජනා නත්ථි. ආරම්මණසදිසා)… සමනන්තරපච්චයෙන පච්චයො… නව… සහජාතපච්චයෙන පච්චයො… නව… අඤ්ඤමඤ්ඤපච්චයෙන පච්චයො… නව… නිස්සයපච්චයෙන පච්චයො… නව… උපනිස්සයපච්චයෙන පච්චයො… නව (ආරම්මණනයෙන කාතබ්බා)… ආසෙවනපච්චයෙන පච්චයො… නව.

කම්මපච්චයාදි

110. සඤ්ඤොජනසම්පයුත්තො චෙව නො ච සඤ්ඤොජනො ධම්මො සඤ්ඤොජනසම්පයුත්තස්ස චෙව නො ච සඤ්ඤොජනස්ස ධම්මස්ස කම්මපච්චයෙන පච්චයො… තීණි… ආහාරපච්චයෙන පච්චයො… තීණි… ඉන්ද්‍රියපච්චයෙන පච්චයො… තීණි… ඣානපච්චයෙන පච්චයො… තීණි… මග්ගපච්චයෙන පච්චයො… නව … සම්පයුත්තපච්චයෙන පච්චයො… නව… අත්ථිපච්චයෙන පච්චයො … නව… නත්ථිපච්චයෙන පච්චයො… නව… විගතපච්චයෙන පච්චයො… නව… අවිගතපච්චයෙන පච්චයො… නව.