1. විභඞ්ගවාරො

නහෙතුපච්චයො

5. සඤ්ඤොජනං ධම්මං පටිච්ච සඤ්ඤොජනො ධම්මො උප්පජ්ජති නහෙතුපච්චයා – විචිකිච්ඡාසඤ්ඤොජනං පටිච්ච අවිජ්ජාසඤ්ඤොජනං. (1)

නොසඤ්ඤොජනං ධම්මං පටිච්ච නොසඤ්ඤොජනො ධම්මො උප්පජ්ජති නහෙතුපච්චයා – අහෙතුකං නොසඤ්ඤොජනං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… (යාව අසඤ්ඤසත්තා). (1)

නොසඤ්ඤොජනං ධම්මං පටිච්ච සඤ්ඤොජනො ධම්මො උප්පජ්ජති නහෙතුපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච අවිජ්ජාසඤ්ඤොජනං. (2)

සඤ්ඤොජනඤ්ච නොසඤ්ඤොජනඤ්ච ධම්මං පටිච්ච සඤ්ඤොජනො ධම්මො උප්පජ්ජති නහෙතුපච්චයා – විචිකිච්ඡාසඤ්ඤොජනඤ්ච සම්පයුත්තකෙ ච ඛන්ධෙ පටිච්ච අවිජ්ජාසඤ්ඤොජනං. (3)

(සංඛිත්තං. ආසවගොච්ඡකසදිසං. නආරම්මණාපි සබ්බෙ උද්ධරිතබ්බා.)