1. විභඞ්ගවාරො

හෙතුපච්චයො

100. සඤ්ඤොජනඤ්චෙව සඤ්ඤොජනසම්පයුත්තඤ්ච ධම්මං පටිච්ච සඤ්ඤොජනො චෙව සඤ්ඤොජනසම්පයුත්තො ච ධම්මො උප්පජ්ජති හෙතුපච්චයා – කාමරාගසඤ්ඤොජනං පටිච්ච දිට්ඨිසඤ්ඤොජනං අවිජ්ජාසඤ්ඤොජනං (චක්කං). (1)

සඤ්ඤොජනඤ්චෙව සඤ්ඤොජනසම්පයුත්තඤ්ච ධම්මං පටිච්ච සඤ්ඤොජනසම්පයුත්තො චෙව නො ච සඤ්ඤොජනො ධම්මො උප්පජ්ජති හෙතුපච්චයා – සඤ්ඤොජනෙ පටිච්ච සම්පයුත්තකා ඛන්ධා. (2)

සඤ්ඤොජනඤ්චෙව සඤ්ඤොජනසම්පයුත්තඤ්ච ධම්මං පටිච්ච සඤ්ඤොජනො චෙව සඤ්ඤොජනසම්පයුත්තො ච සඤ්ඤොජනසම්පයුත්තො චෙව නො ච සඤ්ඤොජනො ච ධම්මා උප්පජ්ජන්ති හෙතුපච්චයා – කාමරාගසඤ්ඤොජනං පටිච්ච දිට්ඨිසඤ්ඤොජනං අවිජ්ජාසඤ්ඤොජනං සම්පයුත්තකා ච ඛන්ධා (චක්කං). (3)

101. සඤ්ඤොජනසම්පයුත්තඤ්චෙව නො ච සඤ්ඤොජනං ධම්මං පටිච්ච සඤ්ඤොජනසම්පයුත්තො චෙව නො ච සඤ්ඤොජනො ධම්මො උප්පජ්ජති හෙතුපච්චයා – සඤ්ඤොජනසම්පයුත්තඤ්චෙව නො ච සඤ්ඤොජනං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ…. (1)

සඤ්ඤොජනසම්පයුත්තඤ්චෙව නො ච සඤ්ඤොජනං ධම්මං පටිච්ච සඤ්ඤොජනො චෙව සඤ්ඤොජනසම්පයුත්තො ච ධම්මො උප්පජ්ජති හෙතුපච්චයා – සඤ්ඤොජනසම්පයුත්තෙ චෙව නො ච සඤ්ඤොජනෙ ඛන්ධෙ පටිච්ච සඤ්ඤොජනා (2)

සඤ්ඤොජනසම්පයුත්තඤ්චෙව නො ච සඤ්ඤොජනං ධම්මං පටිච්ච සඤ්ඤොජනො චෙව සඤ්ඤොජනසම්පයුත්තො ච සඤ්ඤොජනසම්පයුත්තො චෙව නො ච සඤ්ඤොජනො ච ධම්මා උප්පජ්ජන්ති හෙතුපච්චයා – සඤ්ඤොජනසම්පයුත්තඤ්චෙව නො ච සඤ්ඤොජනං එකං ඛන්ධං පටිච්ච තයො ඛන්ධා සඤ්ඤොජනා ච…පෙ… ද්වෙ ඛන්ධෙ…පෙ…. (3)

102. සඤ්ඤොජනඤ්චෙව සඤ්ඤොජනසම්පයුත්තඤ්ච සඤ්ඤොජනසම්පයුත්තඤ්චෙව නො ච සඤ්ඤොජනඤ්ච ධම්මං පටිච්ච සඤ්ඤොජනො චෙව සඤ්ඤොජනසම්පයුත්තො ච ධම්මො උප්පජ්ජති හෙතුපච්චයා – කාමරාගසඤ්ඤොජනඤ්ච සම්පයුත්තකෙ ච ඛන්ධෙ පටිච්ච දිට්ඨිසඤ්ඤොජනං අවිජ්ජාසඤ්ඤොජනං (චක්කං). (1)

සඤ්ඤොජනඤ්චෙව සඤ්ඤොජනසම්පයුත්තඤ්ච සඤ්ඤොජනසම්පයුත්තඤ්චෙව නො ච සඤ්ඤොජනඤ්ච ධම්මං පටිච්ච සඤ්ඤොජනසම්පයුත්තො චෙව නො ච සඤ්ඤොජනො ධම්මො උප්පජ්ජති හෙතුපච්චයා – සඤ්ඤොජනසම්පයුත්තඤ්චෙව නො ච සඤ්ඤොජනං එකං ඛන්ධඤ්ච සඤ්ඤොජනෙ ච පටිච්ච තයො ඛන්ධා…පෙ… ද්වෙ ඛන්ධෙ ච…පෙ…. (2)

සඤ්ඤොජනඤ්චෙව සඤ්ඤොජනසම්පයුත්තඤ්ච සඤ්ඤොජනසම්පයුත්තඤ්චෙව නො ච සඤ්ඤොජනඤ්ච ධම්මං පටිච්ච සඤ්ඤොජනො චෙව සඤ්ඤොජනසම්පයුත්තො ච සඤ්ඤොජනසම්පයුත්තො චෙව නො ච සඤ්ඤොජනො ච ධම්මා උප්පජ්ජන්ති හෙතුපච්චයා – සඤ්ඤොජනසම්පයුත්තඤ්චෙව නො ච සඤ්ඤොජනං එකං ඛන්ධඤ්ච කාමරාගසඤ්ඤොජනඤ්ච පටිච්ච තයො ඛන්ධා දිට්ඨිසඤ්ඤොජනං අවිජ්ජාසඤ්ඤොජනං…පෙ… ද්වෙ ඛන්ධෙ ච…පෙ… (චක්කං). (3)