1. විභඞ්ගවාරො

හෙතුපච්චයො

40. සඤ්ඤොජනසම්පයුත්තං ධම්මං පටිච්ච සඤ්ඤොජනසම්පයුත්තො ධම්මො උප්පජ්ජති හෙතුපච්චයා – සඤ්ඤොජනසම්පයුත්තං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ…. (1)

සඤ්ඤොජනසම්පයුත්තං ධම්මං පටිච්ච සඤ්ඤොජනවිප්පයුත්තො ධම්මො උප්පජ්ජති හෙතුපච්චයා – සඤ්ඤොජනසම්පයුත්තෙ ඛන්ධෙ පටිච්ච චිත්තසමුට්ඨානං රූපං. (2)

සඤ්ඤොජනසම්පයුත්තං ධම්මං පටිච්ච සඤ්ඤොජනසම්පයුත්තො ච සඤ්ඤොජනවිප්පයුත්තො ච ධම්මා උප්පජ්ජන්ති හෙතුපච්චයා – සඤ්ඤොජනසම්පයුත්තං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ…. (3)

41. සඤ්ඤොජනවිප්පයුත්තං ධම්මං පටිච්ච සඤ්ඤොජනවිප්පයුත්තො ධම්මො උප්පජ්ජති හෙතුපච්චයා – සඤ්ඤොජනවිප්පයුත්තං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං …පෙ… ද්වෙ ඛන්ධෙ…පෙ… උද්ධච්චසහගතං මොහං පටිච්ච චිත්තසමුට්ඨානං රූපං; පටිසන්ධික්ඛණෙ…පෙ… එකං මහාභූතං…පෙ…. (1)

සඤ්ඤොජනවිප්පයුත්තං ධම්මං පටිච්ච සඤ්ඤොජනසම්පයුත්තො ධම්මො උප්පජ්ජති හෙතුපච්චයා – උද්ධච්චසහගතං මොහං පටිච්ච සම්පයුත්තකා ඛන්ධා. (2)

සඤ්ඤොජනවිප්පයුත්තං ධම්මං පටිච්ච සඤ්ඤොජනසම්පයුත්තො ච සඤ්ඤොජනවිප්පයුත්තො ච ධම්මා උප්පජ්ජන්ති හෙතුපච්චයා – උද්ධච්චසහගතං මොහං පටිච්ච සම්පයුත්තකා ඛන්ධා චිත්තසමුට්ඨානඤ්ච රූපං. (3)

42. සඤ්ඤොජනසම්පයුත්තඤ්ච සඤ්ඤොජනවිප්පයුත්තඤ්ච ධම්මං පටිච්ච සඤ්ඤොජනසම්පයුත්තො ධම්මො උප්පජ්ජති හෙතුපච්චයා – උද්ධච්චසහගතං එකං ඛන්ධඤ්ච මොහඤ්ච පටිච්ච තයො ඛන්ධා…පෙ… ද්වෙ ඛන්ධෙ…පෙ…. (1)

සඤ්ඤොජනසම්පයුත්තඤ්ච සඤ්ඤොජනවිප්පයුත්තඤ්ච ධම්මං පටිච්ච සඤ්ඤොජනවිප්පයුත්තො ධම්මො උප්පජ්ජති හෙතුපච්චයා – සඤ්ඤොජනසම්පයුත්තෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං, උද්ධච්චසහගතෙ ඛන්ධෙ ච මොහඤ්ච පටිච්ච චිත්තසමුට්ඨානං රූපං. (2)

සඤ්ඤොජනසම්පයුත්තඤ්ච සඤ්ඤොජනවිප්පයුත්තඤ්ච ධම්මං පටිච්ච සඤ්ඤොජනසම්පයුත්තො ච සඤ්ඤොජනවිප්පයුත්තො ච ධම්මා උප්පජ්ජන්ති හෙතුපච්චයා – උද්ධච්චසහගතං එකං ඛන්ධඤ්ච මොහඤ්ච පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ…. (3)

ආරම්මණපච්චයො

43. සඤ්ඤොජනසම්පයුත්තං ධම්මං පටිච්ච සඤ්ඤොජනසම්පයුත්තො ධම්මො උප්පජ්ජති ආරම්මණපච්චයා – සඤ්ඤොජනසම්පයුත්තං එකං ඛන්ධං…පෙ… ද්වෙ ඛන්ධෙ…පෙ…. (1)

සඤ්ඤොජනසම්පයුත්තං ධම්මං පටිච්ච සඤ්ඤොජනවිප්පයුත්තො ධම්මො උප්පජ්ජති ආරම්මණපච්චයා – උද්ධච්චසහගතෙ ඛන්ධෙ පටිච්ච උද්ධච්චසහගතො මොහො. (2)

සඤ්ඤොජනසම්පයුත්තං ධම්මං පටිච්ච සඤ්ඤොජනසම්පයුත්තො ච සඤ්ඤොජනවිප්පයුත්තො ච ධම්මා උප්පජ්ජන්ති ආරම්මණපච්චයා – උද්ධච්චසහගතං එකං ඛන්ධං පටිච්ච තයො ඛන්ධා මොහො ච…පෙ… ද්වෙ ඛන්ධෙ…පෙ…. (3)

44. සඤ්ඤොජනවිප්පයුත්තං ධම්මං පටිච්ච සඤ්ඤොජනවිප්පයුත්තො ධම්මො උප්පජ්ජති ආරම්මණපච්චයා – සඤ්ඤොජනවිප්පයුත්තං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… වත්ථුං පටිච්ච ඛන්ධා. (1)

සඤ්ඤොජනවිප්පයුත්තං ධම්මං පටිච්ච සඤ්ඤොජනසම්පයුත්තො ධම්මො උප්පජ්ජති ආරම්මණපච්චයා – උද්ධච්චසහගතං මොහං පටිච්ච සම්පයුත්තකා ඛන්ධා. (2)

සඤ්ඤොජනසම්පයුත්තඤ්ච සඤ්ඤොජනවිප්පයුත්තඤ්ච ධම්මං පටිච්ච සඤ්ඤොජනසම්පයුත්තො ධම්මො උප්පජ්ජති ආරම්මණපච්චයා – උද්ධච්චසහගතං එකං ඛන්ධඤ්ච මොහඤ්ච පටිච්ච තයො ඛන්ධා…පෙ… ද්වෙ ඛන්ධෙ…පෙ…. (1)

අධිපතිපච්චයො

45. සඤ්ඤොජනසම්පයුත්තං ධම්මං පටිච්ච සඤ්ඤොජනසම්පයුත්තො ධම්මො උප්පජ්ජති අධිපතිපච්චයා… තීණි.

සඤ්ඤොජනවිප්පයුත්තං ධම්මං පටිච්ච සඤ්ඤොජනවිප්පයුත්තො ධම්මො උප්පජ්ජති අධිපතිපච්චයා… එකං.

සඤ්ඤොජනසම්පයුත්තඤ්ච සඤ්ඤොජනවිප්පයුත්තඤ්ච ධම්මං පටිච්ච සඤ්ඤොජනවිප්පයුත්තො ධම්මො උප්පජ්ජති අධිපතිපච්චයා – සඤ්ඤොජනසම්පයුත්තකෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං. (1) (සංඛිත්තං.)