1. පටිච්චවාරො

හෙතුපච්චයො

131. ආසවවිප්පයුත්තං සාසවං ධම්මං පටිච්ච ආසවවිප්පයුත්තො සාසවො ධම්මො උප්පජ්ජති හෙතුපච්චයා – ආසවවිප්පයුත්තං සාසවං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ …පෙ… ඛන්ධෙ පටිච්ච වත්ථු, වත්ථුං පටිච්ච ඛන්ධා, එකං මහාභූතං…පෙ…. (1)

ආසවවිප්පයුත්තං අනාසවං ධම්මං පටිච්ච ආසවවිප්පයුත්තො අනාසවො ධම්මො උප්පජ්ජති හෙතුපච්චයා… තීණි.

(යථා චූළන්තරදුකෙ ලොකියදුකං එවං විත්ථාරෙතබ්බං නින්නානාකරණං, සංඛිත්තං.)

ආසවවිප්පයුත්තසාසවදුකං නිට්ඨිතං.

ආසවගොච්ඡකං නිට්ඨිතං.