1. විභඞ්ගවාරො

හෙතුපච්චයො

121. ආසවො චෙව ආසවසම්පයුත්තො ච ධම්මො ආසවස්ස චෙව ආසවසම්පයුත්තස්ස ච ධම්මස්ස හෙතුපච්චයෙන පච්චයො… තීණි.

ආසවසම්පයුත්තො චෙව නො ච ආසවො ධම්මො ආසවසම්පයුත්තස්ස චෙව නො ච ආසවස්ස ධම්මස්ස හෙතුපච්චයෙන පච්චයො – ආසවසම්පයුත්තා චෙව නො ච ආසවා හෙතූ සම්පයුත්තකානං ඛන්ධානං හෙතුපච්චයෙන පච්චයො. (1)

ආරම්මණපච්චයාදි

122. ආසවො චෙව ආසවසම්පයුත්තො ච ධම්මො ආසවස්ස චෙව ආසවසම්පයුත්තස්ස ච ධම්මස්ස ආරම්මණපච්චයෙන පච්චයො… තීණි.

ආසවසම්පයුත්තො චෙව නො ච ආසවො ධම්මො ආසවසම්පයුත්තස්ස චෙව නො ච ආසවස්ස ධම්මස්ස ආරම්මණපච්චයෙන පච්චයො – ආසවසම්පයුත්තෙ චෙව නො ච ආසවෙ ඛන්ධෙ ආරබ්භ ආසවසම්පයුත්තා චෙව නො ච ආසවා ඛන්ධා උප්පජ්ජන්ති. (1)

ආසවසම්පයුත්තො චෙව නො ච ආසවො ධම්මො ආසවස්ස චෙව ආසවසම්පයුත්තස්ස ච ධම්මස්ස ආරම්මණපච්චයෙන පච්චයො – ආසවසම්පයුත්තෙ චෙව නො ච ආසවෙ ඛන්ධෙ ආරබ්භ ආසවා උප්පජ්ජන්ති. (2)

ආසවසම්පයුත්තො චෙව නො ච ආසවො ධම්මො ආසවස්ස චෙව ආසවසම්පයුත්තස්ස ච ආසවසම්පයුත්තස්ස චෙව නො ච ආසවස්ස ච ධම්මස්ස ආරම්මණපච්චයෙන පච්චයො – ආසවසම්පයුත්තෙ චෙව නො ච ආසවෙ ඛන්ධෙ ආරබ්භ ආසවා ච ආසවසම්පයුත්තකා ච ඛන්ධා උප්පජ්ජන්ති. (3)

ආසවො චෙව ආසවසම්පයුත්තො ච ආසවසම්පයුත්තො චෙව නො ච ආසවො ච ධම්මා ආසවස්ස චෙව ආසවසම්පයුත්තස්ස ච ධම්මස්ස ආරම්මණපච්චයෙන පච්චයො … තීණි.

අධිපතිපච්චයා… (ආරම්මණසදිසා, ගරුකාරම්මණා) අනන්තරපච්චයා… (ආරම්මණසදිසායෙව, පුරිමා පුරිමාති කාතබ්බා.) සමනන්තරපච්චයා… සහජාතපච්චයා… අඤ්ඤමඤ්ඤපච්චයා… නිස්සයපච්චයා… උපනිස්සයපච්චයා (ආරම්මණසදිසංයෙව, විභජනා නත්ථි… තීණි. උපනිස්සයං සබ්බං කාතබ්බං).

කම්මපච්චයාදි

123. ආසවසම්පයුත්තො චෙව නො ච ආසවො ධම්මො ආසවසම්පයුත්තස්ස චෙව නො ච ආසවස්ස ධම්මස්ස කම්මපච්චයෙන පච්චයො… තීණි… ආහාරපච්චයෙන පච්චයො… තීණි… ඉන්ද්‍රියපච්චයෙන පච්චයො… තීණි… ඣානපච්චයෙන පච්චයො… තීණි… මග්ගපච්චයෙන පච්චයො… නව… සම්පයුත්තපච්චයෙන පච්චයො… නව… අත්ථිපච්චයෙන පච්චයො… නත්ථිපච්චයෙන පච්චයො… විගතපච්චයෙන පච්චයො… අවිගතපච්චයෙන පච්චයො… නව.