1. පච්චයානුලොමං

1. විභඞ්ගවාරො

(පඤ්හාවාරෙ හෙතුපච්චයෙපි ආරම්මණපච්චයෙපි ලොකුත්තරං න කාතබ්බං, සෙඛා ගොත්‍රභුං පච්චවෙක්ඛන්ති, වොදානං පච්චවෙක්ඛන්තීති කාතබ්බා. අධිපතිපච්චයම්පි සබ්බං ජානිත්වා කාතබ්බං.)

අනන්තරපච්චයො

112. ආසවො චෙව සාසවො ච ධම්මො ආසවස්ස චෙව සාසවස්ස ච ධම්මස්ස අනන්තරපච්චයෙන පච්චයො – පුරිමා පුරිමා ආසවා පච්ඡිමානං පච්ඡිමානං ආසවානං අනන්තරපච්චයෙන පච්චයො. (1)

ආසවො චෙව සාසවො ච ධම්මො සාසවස්ස චෙව නො ච ආසවස්ස ධම්මස්ස අනන්තරපච්චයෙන පච්චයො – පුරිමා පුරිමා ආසවා පච්ඡිමානං පච්ඡිමානං සාසවඤ්චෙව නො ච ආසවානං ඛන්ධානං අනන්තරපච්චයෙන පච්චයො; ආසවා වුට්ඨානස්ස අනන්තරපච්චයෙන පච්චයො. (2)

ආසවො චෙව සාසවො ච ධම්මො ආසවස්ස චෙව සාසවස්ස ච සාසවස්ස චෙව නො ච ආසවස්ස ච ධම්මස්ස අනන්තරපච්චයෙන පච්චයො – පුරිමා පුරිමා ආසවා පච්ඡිමානං පච්ඡිමානං ආසවානං සම්පයුත්තකානඤ්ච ඛන්ධානං අනන්තරපච්චයෙන පච්චයො. (3)

113. සාසවො චෙව නො ච ආසවො ධම්මො සාසවස්ස චෙව නො ච ආසවස්ස ධම්මස්ස අනන්තරපච්චයෙන පච්චයො – පුරිමා පුරිමා සාසවා චෙව නො ච ආසවා ඛන්ධා පච්ඡිමානං පච්ඡිමානං සාසවානඤ්චෙව නො ච ආසවානං ඛන්ධානං අනන්තරපච්චයෙන පච්චයො; අනුලොමං ගොත්‍රභුස්ස, අනුලොමං වොදානස්ස, ආවජ්ජනා සාසවානඤ්චෙව නො ච ආසවානං ඛන්ධානං අනන්තරපච්චයෙන පච්චයො. (1)

සාසවො චෙව නො ච ආසවො ධම්මො ආසවස්ස චෙව සාසවස්ස ච ධම්මස්ස අනන්තරපච්චයෙන පච්චයො – පුරිමා පුරිමා සාසවා චෙව නො ච ආසවා ඛන්ධා පච්ඡිමානං පච්ඡිමානං ආසවානං අනන්තරපච්චයෙන පච්චයො; ආවජ්ජනා ආසවානං අනන්තරපච්චයෙන පච්චයො. (2)

සාසවො චෙව නො ච ආසවො ධම්මො ආසවස්ස චෙව සාසවස්ස ච සාසවස්ස චෙව නො ච ආසවස්ස ච ධම්මස්ස අනන්තරපච්චයෙන පච්චයො – පුරිමා පුරිමා සාසවා චෙව නො ච ආසවා ඛන්ධා පච්ඡිමානං පච්ඡිමානං ආසවානං සම්පයුත්තකානඤ්ච ඛන්ධානං අනන්තරපච්චයෙන පච්චයො; ආවජ්ජනා ආසවානං සම්පයුත්තකානඤ්ච ඛන්ධානං අනන්තරපච්චයෙන පච්චයො. (3)

114. ආසවො චෙව සාසවො ච සාසවො චෙව නො ච ආසවො ච ධම්මා ආසවස්ස චෙව සාසවස්ස ච ධම්මස්ස අනන්තරපච්චයෙන පච්චයො – පුරිමා පුරිමා ආසවා ච සම්පයුත්තකා ච ඛන්ධා පච්ඡිමානං පච්ඡිමානං ආසවානං අනන්තරපච්චයෙන පච්චයො. (1)

ආසවො චෙව සාසවො ච සාසවො චෙව නො ච ආසවො ච ධම්මා සාසවස්ස චෙව නො ච ආසවස්ස ධම්මස්ස අනන්තරපච්චයෙන පච්චයො – පුරිමා පුරිමා ආසවා ච සම්පයුත්තකා ච ඛන්ධා පච්ඡිමානං පච්ඡිමානං සාසවානඤ්චෙව නො ච ආසවානං ඛන්ධානං අනන්තරපච්චයෙන පච්චයො; ආසවා ච සම්පයුත්තකා ච ඛන්ධා වුට්ඨානස්ස අනන්තරපච්චයෙන පච්චයො. (2)

ආසවො චෙව සාසවො ච සාසවො චෙව නො ච ආසවො ච ධම්මා ආසවස්ස චෙව සාසවස්ස ච සාසවස්ස චෙව නො ච ආසවස්ස ච ධම්මස්ස අනන්තරපච්චයෙන පච්චයො – පුරිමා පුරිමා ආසවා ච සම්පයුත්තකා ච ඛන්ධා පච්ඡිමානං පච්ඡිමානං ආසවානං සම්පයුත්තකානඤ්ච ඛන්ධානං අනන්තරපච්චයෙන පච්චයො (එවං සබ්බං විත්ථාරෙතබ්බං). (3)

(ආසවදුකෙපි අනන්තරං ඉමිනා සදිසං කාතබ්බං. ආවජ්ජනාපි වුට්ඨානම්පි එවං සමුද්දිට්ඨං සංඛිත්තං. සබ්බං පරිපුණ්ණං. ආසවදුකසදිසං කාතබ්බං, නින්නානං.)

ආසවසාසවදුකං නිට්ඨිතං.