1. විභඞ්ගවාරො

නහෙතුපච්චයො

5. නොආසවං ධම්මං පටිච්ච නොආසවො ධම්මො උප්පජ්ජති නහෙතුපච්චයා – අහෙතුකං නොආසවං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… ඛන්ධෙ පටිච්ච වත්ථු, වත්ථුං පටිච්ච ඛන්ධා, එකං මහාභූතං…පෙ… (යාව අසඤ්ඤසත්තා). (1)

නොආසවං ධම්මං පටිච්ච ආසවො ධම්මො උප්පජ්ජති නහෙතුපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (2)

නආරම්මණපච්චයො

6. ආසවං ධම්මං පටිච්ච නොආසවො ධම්මො උප්පජ්ජති නආරම්මණපච්චයා – ආසවෙ පටිච්ච චිත්තසමුට්ඨානං රූපං. (1)

නොආසවං ධම්මං පටිච්ච නොආසවො ධම්මො උප්පජ්ජති නආරම්මණපච්චයා – නොආසවෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ… ඛන්ධෙ පටිච්ච වත්ථු, එකං මහාභූතං…පෙ… (යාව අසඤ්ඤසත්තා). (1)

ආසවඤ්ච නොආසවඤ්ච ධම්මං පටිච්ච නොආසවො ධම්මො උප්පජ්ජති නආරම්මණපච්චයා – ආසවෙ ච සම්පයුත්තකෙ ච ඛන්ධෙ පටිච්ච චිත්තසමුට්ඨානං රූපං (සංඛිත්තං). (1)