1. විභඞ්ගවාරො

හෙතුපච්චයො

66. ආසවසම්පයුත්තං ධම්මං පච්චයා ආසවසම්පයුත්තො ධම්මො උප්පජ්ජති හෙතුපච්චයා… තීණි (පටිච්චවාරසදිසො).

ආසවවිප්පයුත්තං ධම්මං පච්චයා ආසවවිප්පයුත්තො ධම්මො උප්පජ්ජති හෙතුපච්චයා – ආසවවිප්පයුත්තං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… දොමනස්සසහගතං විචිකිච්ඡාසහගතං උද්ධච්චසහගතං මොහං පච්චයා චිත්තසමුට්ඨානං රූපං; පටිසන්ධික්ඛණෙ…පෙ… ඛන්ධෙ පච්චයා වත්ථු, වත්ථුං පච්චයා ඛන්ධා, එකං මහාභූතං…පෙ… මහාභූතෙ පච්චයා චිත්තසමුට්ඨානං රූපං, කටත්තාරූපං, උපාදාරූපං. වත්ථුං පච්චයා ආසවවිප්පයුත්තා ඛන්ධා, වත්ථුං පච්චයා දොමනස්සසහගතො මොහො. (1)

ආසවවිප්පයුත්තං ධම්මං පච්චයා ආසවසම්පයුත්තො ධම්මො උප්පජ්ජති හෙතුපච්චයා – වත්ථුං පච්චයා ආසවසම්පයුත්තකා ඛන්ධා, දොමනස්සසහගතං විචිකිච්ඡාසහගතං උද්ධච්චසහගතං මොහං පච්චයා සම්පයුත්තකා ඛන්ධා. (2)

ආසවවිප්පයුත්තං ධම්මං පච්චයා ආසවසම්පයුත්තො ච ආසවවිප්පයුත්තො ච ධම්මා උප්පජ්ජන්ති හෙතුපච්චයා – වත්ථුං පච්චයා ආසවසම්පයුත්තකා ඛන්ධා, මහාභූතෙ පච්චයා චිත්තසමුට්ඨානං රූපං, දොමනස්සසහගතං විචිකිච්ඡාසහගතං උද්ධච්චසහගතං මොහං පච්චයා සම්පයුත්තකා ඛන්ධා චිත්තසමුට්ඨානඤ්ච රූපං, වත්ථුං පච්චයා දොමනස්සසහගතා ඛන්ධා ච මොහො ච. (3)

67. ආසවසම්පයුත්තඤ්ච ආසවවිප්පයුත්තඤ්ච ධම්මං පච්චයා ආසවසම්පයුත්තො ධම්මො උප්පජ්ජති හෙතුපච්චයා – ආසවසම්පයුත්තං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ… දොමනස්සසහගතං විචිකිච්ඡාසහගතං උද්ධච්චසහගතං එකං ඛන්ධඤ්ච මොහඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ…. (1)

ආසවසම්පයුත්තඤ්ච ආසවවිප්පයුත්තඤ්ච ධම්මං පච්චයා ආසවවිප්පයුත්තො ධම්මො උප්පජ්ජති හෙතුපච්චයා – ආසවසම්පයුත්තෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං, දොමනස්සසහගතෙ විචිකිච්ඡාසහගතෙ උද්ධච්චසහගතෙ ඛන්ධෙ ච මොහඤ්ච පච්චයා චිත්තසමුට්ඨානං රූපං, දොමනස්සසහගතෙ ඛන්ධෙ ච වත්ථුඤ්ච පච්චයා දොමනස්සසහගතො මොහො. (2)

ආසවසම්පයුත්තඤ්ච ආසවවිප්පයුත්තඤ්ච ධම්මං පච්චයා ආසවසම්පයුත්තො ච ආසවවිප්පයුත්තො ච ධම්මා උප්පජ්ජන්ති හෙතුපච්චයා – ආසවසම්පයුත්තං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… ආසවසම්පයුත්තෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං, දොමනස්සසහගතං විචිකිච්ඡාසහගතං උද්ධච්චසහගතං එකං ඛන්ධඤ්ච මොහඤ්ච පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… දොමනස්සසහගතං එකං ඛන්ධඤ්ච වත්ථුඤ්ච පච්චයා තයො ඛන්ධා මොහො ච…පෙ… ද්වෙ ඛන්ධෙ…පෙ…. (3)

ආරම්මණපච්චයාදි

68. ආසවසම්පයුත්තං ධම්මං පච්චයා ආසවසම්පයුත්තො ධම්මො උප්පජ්ජති ආරම්මණපච්චයා… තීණි (පටිච්චවාරසදිසා).

ආසවවිප්පයුත්තං ධම්මං පච්චයා ආසවවිප්පයුත්තො ධම්මො උප්පජ්ජති ආරම්මණපච්චයා – ආසවවිප්පයුත්තං එකං ඛන්ධං පච්චයා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… වත්ථුං පච්චයා ඛන්ධා, චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා ආසවවිප්පයුත්තා ඛන්ධා, වත්ථුං පච්චයා දොමනස්සසහගතො විචිකිච්ඡාසහගතො උද්ධච්චසහගතො මොහො. (1)

ආසවවිප්පයුත්තං ධම්මං පච්චයා ආසවසම්පයුත්තො ධම්මො උප්පජ්ජති ආරම්මණපච්චයා – වත්ථුං පච්චයා ආසවසම්පයුත්තකා ඛන්ධා, දොමනස්සසහගතං විචිකිච්ඡාසහගතං උද්ධච්චසහගතං මොහං පච්චයා සම්පයුත්තකා ඛන්ධා. (2)

ආසවවිප්පයුත්තං ධම්මං පච්චයා ආසවසම්පයුත්තො ච ආසවවිප්පයුත්තො ච ධම්මා උප්පජ්ජන්ති ආරම්මණපච්චයා – වත්ථුං පච්චයා දොමනස්සසහගතා විචිකිච්ඡාසහගතා උද්ධච්චසහගතා ඛන්ධා මොහො ච. (3)

69. ආසවසම්පයුත්තඤ්ච ආසවවිප්පයුත්තඤ්ච ධම්මං පච්චයා ආසවසම්පයුත්තො ධම්මො උප්පජ්ජති ආරම්මණපච්චයා – ආසවසම්පයුත්තං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ…. (1)

ආසවසම්පයුත්තඤ්ච ආසවවිප්පයුත්තඤ්ච ධම්මං පච්චයා ආසවවිප්පයුත්තො ධම්මො උප්පජ්ජති ආරම්මණපච්චයා – දොමනස්සසහගතෙ විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා දොමනස්සසහගතො විචිකිච්ඡාසහගතො උද්ධච්චසහගතො මොහො. (2)

ආසවසම්පයුත්තඤ්ච ආසවවිප්පයුත්තඤ්ච ධම්මං පච්චයා ආසවසම්පයුත්තො ච ආසවවිප්පයුත්තො ච ධම්මා උප්පජ්ජන්ති ආරම්මණපච්චයා – දොමනස්සසහගතං විචිකිච්ඡාසහගතං උද්ධච්චසහගතං එකං ඛන්ධඤ්ච වත්ථුඤ්ච පච්චයා තයො ඛන්ධා මොහො ච…පෙ… ද්වෙ ඛන්ධෙ…පෙ… අධිපතිපච්චයා… අනන්තරපච්චයා…පෙ… අවිගතපච්චයා. (3)