1. විභඞ්ගවාරො

හෙතුපච්චයො

1. ආසවං ධම්මං පටිච්ච ආසවො ධම්මො උප්පජ්ජති හෙතුපච්චයා – කාමාසවං පටිච්ච දිට්ඨාසවො අවිජ්ජාසවො, දිට්ඨාසවං පටිච්ච කාමාසවො අවිජ්ජාසවො, අවිජ්ජාසවං පටිච්ච කාමාසවො දිට්ඨාසවො, භවාසවං පටිච්ච අවිජ්ජාසවො, දිට්ඨාසවං පටිච්ච අවිජ්ජාසවො (එකෙකම්පි චක්කං කාතබ්බං). (1)

ආසවං ධම්මං පටිච්ච නොආසවො ධම්මො උප්පජ්ජති හෙතුපච්චයා – ආසවං පටිච්ච ආසවසම්පයුත්තකා ඛන්ධා චිත්තසමුට්ඨානඤ්ච රූපං. (2)

ආසවං ධම්මං පටිච්ච ආසවො ච නොආසවො ච ධම්මා උප්පජ්ජන්ති හෙතුපච්චයා – කාමාසවං පටිච්ච දිට්ඨාසවො අවිජ්ජාසවො සම්පයුත්තකා ච ඛන්ධා චිත්තසමුට්ඨානඤ්ච රූපං (චක්කං). (3)

2. නොආසවං ධම්මං පටිච්ච නොආසවො ධම්මො උප්පජ්ජති හෙතුපච්චයා – නොආසවං එකං ඛන්ධං පටිච්ච තයො ඛන්ධා චිත්තසමුට්ඨානං රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… ඛන්ධෙ පටිච්ච වත්ථු, වත්ථුං පටිච්ච ඛන්ධා, එකං මහාභූතං…පෙ… මහාභූතෙ පටිච්ච චිත්තසමුට්ඨානං රූපං කටත්තාරූපං උපාදාරූපං. (1)

නොආසවං ධම්මං පටිච්ච ආසවො ධම්මො උප්පජ්ජති හෙතුපච්චයා – නොආසවෙ ඛන්ධෙ පටිච්ච ආසවා. (2)

නොආසවං ධම්මං පටිච්ච ආසවො ච නොආසවො ච ධම්මා උප්පජ්ජන්ති හෙතුපච්චයා – නොආසවං එකං ඛන්ධං පටිච්ච තයො ඛන්ධා ආසවා ච චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ…. (3)

3. ආසවඤ්ච නොආසවඤ්ච ධම්මං පටිච්ච ආසවො ධම්මො උප්පජ්ජති හෙතුපච්චයා – කාමාසවඤ්ච සම්පයුත්තකෙ ච ඛන්ධෙ පටිච්ච දිට්ඨාසවො අවිජ්ජාසවො (චක්කං බන්ධිතබ්බං). (1)

ආසවඤ්ච නොආසවඤ්ච ධම්මං පටිච්ච නොආසවො ධම්මො උප්පජ්ජති හෙතුපච්චයා – නොආසවං එකං ඛන්ධඤ්ච ආසවෙ ච පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ…. (2)

ආසවඤ්ච නොආසවඤ්ච ධම්මං පටිච්ච ආසවො ච නොආසවො ච ධම්මා උප්පජ්ජන්ති හෙතුපච්චයා – නොආසවං එකං ඛන්ධඤ්ච කාමාසවඤ්ච පටිච්ච තයො ඛන්ධා දිට්ඨාසවො අවිජ්ජාසවො චිත්තසමුට්ඨානඤ්ච රූපං…පෙ… ද්වෙ ඛන්ධෙ ච…පෙ… (චක්කං. සංඛිත්තං). (3)