1. විභඞ්ගවාරො

නහෙතුපච්චයො

104. රූපිං ධම්මං පච්චයා රූපී ධම්මො උප්පජ්ජති නහෙතුපච්චයා – එකං මහාභූතං…පෙ… අසඤ්ඤසත්තානං එකං මහාභූතං…පෙ…. (1)

රූපිං ධම්මං පච්චයා අරූපී ධම්මො උප්පජ්ජති නහෙතුපච්චයා – චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා අහෙතුකා අරූපිනො ඛන්ධා; අහෙතුකපටිසන්ධික්ඛණෙ…පෙ… වත්ථුං පච්චයා විචිකිච්ඡාසහගතො උද්ධච්චසහගතො මොහො. (2)

රූපිං ධම්මං පච්චයා රූපී ච අරූපී ච ධම්මා උප්පජ්ජන්ති නහෙතුපච්චයා (පවත්තිපටිසන්ධි කාතබ්බා). (3)

105. අරූපිං ධම්මං පච්චයා අරූපී ධම්මො උප්පජ්ජති නහෙතුපච්චයා – අහෙතුකං අරූපිං එකං ඛන්ධං…පෙ… පටිසන්ධික්ඛණෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ පච්චයා විචිකිච්ඡාසහගතො උද්ධච්චසහගතො මොහො. (1)

අරූපිං ධම්මං පච්චයා රූපී ධම්මො උප්පජ්ජති නහෙතුපච්චයා – අහෙතුකෙ අරූපිනො ඛන්ධෙ පච්චයා චිත්තසමුට්ඨානං රූපං; පටිසන්ධික්ඛණෙ…පෙ…. (2)

අරූපිං ධම්මං පච්චයා රූපී ච අරූපී ච ධම්මා උප්පජ්ජන්ති නහෙතුපච්චයා – අහෙතුකං අරූපිං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (3)

106. රූපිඤ්ච අරූපිඤ්ච ධම්මං පච්චයා රූපී ධම්මො උප්පජ්ජති නහෙතුපච්චයා – අහෙතුකෙ අරූපිනො ඛන්ධෙ ච මහාභූතෙ ච පච්චයා චිත්තසමුට්ඨානං රූපං; පටිසන්ධික්ඛණෙ…පෙ…. (1)

රූපිඤ්ච අරූපිඤ්ච ධම්මං පච්චයා අරූපී ධම්මො උප්පජ්ජති නහෙතුපච්චයා – චක්ඛුවිඤ්ඤාණසහගතං එකං ඛන්ධඤ්ච චක්ඛායතනඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… කායවිඤ්ඤාණසහගතං…පෙ… අරූපිං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො උද්ධච්චසහගතො මොහො. (2)

රූපිඤ්ච අරූපිඤ්ච ධම්මං පච්චයා රූපී ච අරූපී ච ධම්මා උප්පජ්ජන්ති නහෙතුපච්චයා – අහෙතුකං අරූපිං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… අරූපිනො ඛන්ධෙ ච මහාභූතෙ ච පච්චයා චිත්තසමුට්ඨානං රූපං; පටිසන්ධික්ඛණෙ…පෙ…. (3)