1. විභඞ්ගවාරො

හෙතුපච්චයො

101. රූපිං ධම්මං පච්චයා රූපී ධම්මො උප්පජ්ජති හෙතුපච්චයා – එකං මහාභූතං…පෙ… (පටිච්චසදිසං). (1)

රූපිං ධම්මං පච්චයා අරූපී ධම්මො උප්පජ්ජති හෙතුපච්චයා – වත්ථුං පච්චයා අරූපිනො ඛන්ධා; පටිසන්ධික්ඛණෙ…පෙ…. (2)

රූපිං ධම්මං පච්චයා රූපී ච අරූපී ච ධම්මා උප්පජ්ජන්ති හෙතුපච්චයා – වත්ථුං පච්චයා අරූපිනො ඛන්ධා, මහාභූතෙ පච්චයා චිත්තසමුට්ඨානං රූපං; පටිසන්ධික්ඛණෙ…පෙ… (එවං අවසෙසා පඤ්හා, පවත්තිපටිසන්ධි විභජිතබ්බා). (3)

ආරම්මණපච්චයො

102. රූපිං ධම්මං පච්චයා අරූපී ධම්මො උප්පජ්ජති ආරම්මණපච්චයා – චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා අරූපිනො ඛන්ධා; පටිසන්ධික්ඛණෙ…පෙ…. (1)

අරූපිං ධම්මං පච්චයා අරූපී ධම්මො උප්පජ්ජති ආරම්මණපච්චයා – අරූපිං එකං ඛන්ධං…පෙ… ද්වෙ ඛන්ධෙ…පෙ…. (2)

රූපිඤ්ච අරූපිඤ්ච ධම්මං පච්චයා අරූපී ධම්මො උප්පජ්ජති ආරම්මණපච්චයා – චක්ඛුවිඤ්ඤාණසහගතං එකං ඛන්ධඤ්ච චක්ඛායතනඤ්ච පච්චයා තයො ඛන්ධා…පෙ… ද්වෙ ඛන්ධෙ …පෙ… කායවිඤ්ඤාණසහගතං…පෙ… අරූපිං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… (සංඛිත්තං). (3)