1. විභඞ්ගවාරො

හෙතුපච්චයො

93. රූපිං ධම්මං පටිච්ච රූපී ධම්මො උප්පජ්ජති හෙතුපච්චයා – එකං මහාභූතං පටිච්ච තයො මහාභූතා…පෙ… ද්වෙ මහාභූතෙ…පෙ… මහාභූතෙ පටිච්ච චිත්තසමුට්ඨානං රූපං කටත්තාරූපං උපාදාරූපං. (1)

රූපිං ධම්මං පටිච්ච අරූපී ධම්මො උප්පජ්ජති හෙතුපච්චයා – පටිසන්ධික්ඛණෙ වත්ථුං පටිච්ච අරූපිනො ඛන්ධා. (2)

රූපිං ධම්මං පටිච්ච රූපී ච අරූපී ච ධම්මා උප්පජ්ජන්ති හෙතුපච්චයා – පටිසන්ධික්ඛණෙ වත්ථුං පටිච්ච අරූපිනො ඛන්ධා, මහාභූතෙ පටිච්ච කටත්තාරූපං. (3)

94. අරූපිං ධම්මං පටිච්ච අරූපී ධම්මො උප්පජ්ජති හෙතුපච්චයා – අරූපිං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (1)

අරූපිං ධම්මං පටිච්ච රූපී ධම්මො උප්පජ්ජති හෙතුපච්චයා – අරූපිනො ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ…. (2)

අරූපිං ධම්මං පටිච්ච රූපී ච අරූපී ච ධම්මා උප්පජ්ජන්ති හෙතුපච්චයා – අරූපිං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (3)

95. රූපිඤ්ච අරූපිඤ්ච ධම්මං පටිච්ච රූපී ධම්මො උප්පජ්ජති හෙතුපච්චයා – අරූපිනො ඛන්ධෙ ච මහාභූතෙ ච පටිච්ච චිත්තසමුට්ඨානං රූපං; පටිසන්ධික්ඛණෙ…පෙ…. (1)

රූපිඤ්ච අරූපිඤ්ච ධම්මං පටිච්ච අරූපී ධම්මො උප්පජ්ජති හෙතුපච්චයා – පටිසන්ධික්ඛණෙ අරූපිං එකං ඛන්ධඤ්ච වත්ථුඤ්ච පටිච්ච තයො ඛන්ධා…පෙ… ද්වෙ ඛන්ධෙ…පෙ…. (2)

රූපිඤ්ච අරූපිඤ්ච ධම්මං පටිච්ච රූපී ච අරූපී ච ධම්මා උප්පජ්ජන්ති හෙතුපච්චයා – පටිසන්ධික්ඛණෙ අරූපිං එකං ඛන්ධඤ්ච වත්ථුඤ්ච පටිච්ච තයො ඛන්ධා…පෙ… ද්වෙ ඛන්ධෙ…පෙ… අරූපිනො ඛන්ධෙ ච මහාභූතෙ ච පටිච්ච කටත්තාරූපං (සංඛිත්තං). (3)