1. විභඞ්ගවාරො

හෙතුපච්චයො

65. සප්පටිඝං ධම්මං පච්චයා සප්පටිඝො ධම්මො උප්පජ්ජති හෙතුපච්චයා… තීණි.

අප්පටිඝං ධම්මං පච්චයා අප්පටිඝො ධම්මො උප්පජ්ජති හෙතුපච්චයා – අප්පටිඝං එකං ඛන්ධං පච්චයා තයො ඛන්ධා අප්පටිඝං චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ …පෙ… ආපොධාතුං පච්චයා අප්පටිඝං චිත්තසමුට්ඨානං රූපං, කටත්තාරූපං, උපාදාරූපං, ආපොධාතුං පච්චයා ඉත්ථින්ද්‍රියං…පෙ… කබළීකාරො ආහාරො, වත්ථුං පච්චයා අප්පටිඝා ඛන්ධා. (1)

(අවසෙසා පඤ්ච පඤ්හා පටිච්චවාරසදිසා.)

ආරම්මණපච්චයාදි

66. සප්පටිඝං ධම්මං පච්චයා අප්පටිඝො ධම්මො උප්පජ්ජති ආරම්මණපච්චයා – චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං. (1)

අප්පටිඝං ධම්මං පච්චයා අප්පටිඝො ධම්මො උප්පජ්ජති ආරම්මණපච්චයා – අප්පටිඝං එකං ඛන්ධං පච්චයා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… වත්ථුං පච්චයා අප්පටිඝා ඛන්ධා. (1)

සප්පටිඝඤ්ච අප්පටිඝඤ්ච ධම්මං පච්චයා අප්පටිඝො ධම්මො උප්පජ්ජති ආරම්මණපච්චයා – චක්ඛුවිඤ්ඤාණසහගතං එකං ඛන්ධඤ්ච චක්ඛායතනඤ්ච පච්චයා තයො ඛන්ධා…පෙ… කායවිඤ්ඤාණසහගතං එකං ඛන්ධඤ්ච කායායතනඤ්ච පච්චයා තයො ඛන්ධා…පෙ… අධිපතිපච්චයා… (සංඛිත්තං) අවිගතපච්චයා.