1. විභඞ්ගවාරො

හෙතුපච්චයො

18. අනිදස්සනං ධම්මං පටිච්ච අනිදස්සනො ධම්මො උප්පජ්ජති හෙතුපච්චයා – අනිදස්සනං එකං ඛන්ධං පටිච්ච තයො ඛන්ධා අනිදස්සනං චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ අනිදස්සනං එකං ඛන්ධං පටිච්ච තයො ඛන්ධා අනිදස්සනං කටත්තා ච රූපං…පෙ… ද්වෙ ඛන්ධෙ…පෙ… ඛන්ධෙ පටිච්ච වත්ථු, වත්ථුං පටිච්ච ඛන්ධා; එකං මහාභූතං…පෙ… මහාභූතෙ පටිච්ච අනිදස්සනං චිත්තසමුට්ඨානං රූපං කටත්තාරූපං උපාදාරූපං. (1)

අනිදස්සනං ධම්මං පටිච්ච සනිදස්සනො ධම්මො උප්පජ්ජති හෙතුපච්චයා – අනිදස්සනෙ ඛන්ධෙ පටිච්ච සනිදස්සනං චිත්තසමුට්ඨානං රූපං; පටිසන්ධික්ඛණෙ…පෙ… මහාභූතෙ පටිච්ච සනිදස්සනං චිත්තසමුට්ඨානං රූපං කටත්තාරූපං උපාදාරූපං. (2)

අනිදස්සනං ධම්මං පටිච්ච සනිදස්සනො ච අනිදස්සනො ච ධම්මා උප්පජ්ජන්ති හෙතුපච්චයා – අනිදස්සනං එකං ඛන්ධං පටිච්ච තයො ඛන්ධා සනිදස්සනඤ්ච අනිදස්සනඤ්ච චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… මහාභූතෙ පටිච්ච සනිදස්සනඤ්ච අනිදස්සනඤ්ච චිත්තසමුට්ඨානඤ්ච රූපං කටත්තාරූපං උපාදාරූපං. (3)

ආරම්මණපච්චයො

19. අනිදස්සනං ධම්මං පටිච්ච අනිදස්සනො ධම්මො උප්පජ්ජති ආරම්මණපච්චයා – අනිදස්සනං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… වත්ථුං පටිච්ච ඛන්ධා. (1)

අධිපතිපච්චයො

20. අනිදස්සනං ධම්මං පටිච්ච අනිදස්සනො ධම්මො උප්පජ්ජති අධිපතිපච්චයා – අනිදස්සනං එකං ඛන්ධං පටිච්ච තයො ඛන්ධා අනිදස්සනං චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… එකං මහාභූතං පටිච්ච තයො මහාභූතා…පෙ… ද්වෙ මහාභූතෙ…පෙ… මහාභූතෙ පටිච්ච අනිදස්සනං චිත්තසමුට්ඨානං රූපං උපාදාරූපං. (1)

අනිදස්සනං ධම්මං පටිච්ච සනිදස්සනො ධම්මො උප්පජ්ජති අධිපතිපච්චයා – අනිදස්සනෙ ඛන්ධෙ පටිච්ච සනිදස්සනං චිත්තසමුට්ඨානං රූපං, මහාභූතෙ පටිච්ච සනිදස්සනං චිත්තසමුට්ඨානං රූපං. (2)

අනිදස්සනං ධම්මං පටිච්ච සනිදස්සනො ච අනිදස්සනො ච ධම්මා උප්පජ්ජන්ති අධිපතිපච්චයා – අනිදස්සනං එකං ඛන්ධං පටිච්ච තයො ඛන්ධා සනිදස්සනඤ්ච අනිදස්සනඤ්ච චිත්තසමුට්ඨානං රූපං…පෙ… ද්වෙ ඛන්ධෙ…පෙ… මහාභූතෙ පටිච්ච සනිදස්සනඤ්ච අනිදස්සනඤ්ච චිත්තසමුට්ඨානං රූපං උපාදාරූපං. (3) (සංඛිත්තං, සබ්බෙ කාතබ්බා.)