1. විභඞ්ගවාරො

හෙතුපච්චයො

140. ලොකියං ධම්මං පච්චයා ලොකියො ධම්මො උප්පජ්ජති හෙතුපච්චයා – ලොකියං එකං ඛන්ධං පච්චයා…පෙ… එකං මහාභූතං…පෙ… මහාභූතෙ පච්චයා චිත්තසමුට්ඨානං රූපං, කටත්තාරූපං, උපාදාරූපං, වත්ථුං පච්චයා ලොකියා ඛන්ධා. (1)

ලොකියං ධම්මං පච්චයා ලොකුත්තරො ධම්මො උප්පජ්ජති හෙතුපච්චයා – වත්ථුං පච්චයා ලොකුත්තරා ඛන්ධා. (2)

ලොකියං ධම්මං පච්චයා ලොකියො ච ලොකුත්තරො ච ධම්මා උප්පජ්ජන්ති හෙතුපච්චයා – වත්ථුං පච්චයා ලොකුත්තරා ඛන්ධා, මහාභූතෙ පච්චයා චිත්තසමුට්ඨානං රූපං. (3)

141. ලොකුත්තරං ධම්මං පච්චයා ලොකුත්තරො ධම්මො උප්පජ්ජති හෙතුපච්චයා… තීණි.

ලොකියඤ්ච ලොකුත්තරඤ්ච ධම්මං පච්චයා ලොකියො ධම්මො උප්පජ්ජති හෙතුපච්චයා – ලොකුත්තරෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං. (1)

ලොකියඤ්ච ලොකුත්තරඤ්ච ධම්මං පච්චයා ලොකුත්තරො ධම්මො උප්පජ්ජති හෙතුපච්චයා – ලොකුත්තරං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ…. (2)

ලොකියඤ්ච ලොකුත්තරඤ්ච ධම්මං පච්චයා ලොකියො ච ලොකුත්තරො ච ධම්මා උප්පජ්ජන්ති හෙතුපච්චයා – ලොකුත්තරං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… ලොකුත්තරෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං (සංඛිත්තං). (3)