1. විභඞ්ගවාරො

නහෙතුපච්චයො

6. නොඋපාදානං ධම්මං පටිච්ච නොඋපාදානො ධම්මො උප්පජ්ජති නහෙතුපච්චයා – අහෙතුකං නොඋපාදානං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… ඛන්ධෙ පටිච්ච වත්ථු, වත්ථුං පටිච්ච ඛන්ධා, එකං මහාභූතං…පෙ… මහාභූතෙ පටිච්ච චිත්තසමුට්ඨානං රූපං කටත්තාරූපං උපාදාරූපං; බාහිරං… ආහාරසමුට්ඨානං… උතුසමුට්ඨානං… අසඤ්ඤසත්තානං…පෙ… විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

නආරම්මණපච්චයාදි

7. උපාදානං ධම්මං පටිච්ච නොඋපාදානො ධම්මො උප්පජ්ජති නආරම්මණපච්චයා – උපාදානෙ පටිච්ච චිත්තසමුට්ඨානං රූපං. (1)

නොඋපාදානං ධම්මං පටිච්ච නොඋපාදානො ධම්මො උප්පජ්ජති නආරම්මණපච්චයා – නොඋපාදානෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ නොඋපාදානෙ ඛන්ධෙ පටිච්ච කටත්තාරූපං, ඛන්ධෙ පටිච්ච වත්ථු, එකං මහාභූතං…පෙ… (යාව අසඤ්ඤසත්තා). (1)

උපාදානඤ්ච නොඋපාදානං ච ධම්මං පටිච්ච නොඋපාදානො ධම්මො උප්පජ්ජති නආරම්මණපච්චයා – උපාදානෙ ච සම්පයුත්තකෙ ච ඛන්ධෙ පටිච්ච චිත්තසමුට්ඨානං රූපං, උපාදානෙ ච මහාභූතෙ ච පටිච්ච චිත්තසමුට්ඨානං රූපං. (1)

නඅධිපතිපච්චයා… නඅනන්තරපච්චයා…පෙ… නඋපනිස්සයපච්චයා.

නපුරෙජාතපච්චයො

8. උපාදානං ධම්මං පටිච්ච උපාදානො ධම්මො උප්පජ්ජති නපුරෙජාතපච්චයා – අරූපෙ අත්තවාදුපාදානං පටිච්ච කාමුපාදානං, කාමුපාදානං පටිච්ච අත්තවාදුපාදානං. (1)

උපාදානං ධම්මං පටිච්ච නොඋපාදානො ධම්මො උප්පජ්ජති නපුරෙජාතපච්චයා – අරූපෙ උපාදානෙ පටිච්ච සම්පයුත්තකා ඛන්ධා, උපාදානෙ පටිච්ච චිත්තසමුට්ඨානං රූපං (සංඛිත්තං, නවපි පඤ්හා අරූපෙ ද්වෙ උපාදානා).