1. විභඞ්ගවාරො

හෙතුපච්චයො

101. උපාදානඤ්චෙව උපාදානසම්පයුත්තඤ්ච ධම්මං පටිච්ච උපාදානො චෙව උපාදානසම්පයුත්තො ච ධම්මො උප්පජ්ජති හෙතුපච්චයා – දිට්ඨුපාදානං පටිච්ච කාමුපාදානං (චක්කං කාතබ්බං). (1)

උපාදානඤ්චෙව උපාදානසම්පයුත්තඤ්ච ධම්මං පටිච්ච උපාදානසම්පයුත්තො චෙව නො ච උපාදානො ධම්මො උප්පජ්ජති හෙතුපච්චයා – උපාදානෙ පටිච්ච සම්පයුත්තකා ඛන්ධා. (2)

උපාදානඤ්චෙව උපාදානසම්පයුත්තඤ්ච ධම්මං පටිච්ච උපාදානො චෙව උපාදානසම්පයුත්තො ච උපාදානසම්පයුත්තො චෙව නො ච උපාදානො ච ධම්මා උප්පජ්ජන්ති හෙතුපච්චයා – දිට්ඨුපාදානං පටිච්ච කාමුපාදානං සම්පයුත්තකා ච ඛන්ධා (චක්කං). (3)