1. විභඞ්ගවාරො

හෙතුපච්චයො

95. උපාදානඤ්චෙව උපාදානියඤ්ච ධම්මං පටිච්ච උපාදානො චෙව උපාදානියො ච ධම්මො උප්පජ්ජති හෙතුපච්චයා – දිට්ඨුපාදානං පටිච්ච කාමුපාදානං, කාමුපාදානං පටිච්ච දිට්ඨුපාදානං (චක්කං). (1)

උපාදානඤ්චෙව උපාදානියඤ්ච ධම්මං පටිච්ච උපාදානියො චෙව නො ච උපාදානො ධම්මො උප්පජ්ජති හෙතුපච්චයා – උපාදානෙ පටිච්ච සම්පයුත්තකා ඛන්ධා චිත්තසමුට්ඨානඤ්ච රූපං. (1)

උපාදානඤ්චෙව උපාදානියඤ්ච ධම්මං පටිච්ච උපාදානො චෙව උපාදානියො ච උපාදානියො චෙව නො ච උපාදානො ච ධම්මා උප්පජ්ජන්ති හෙතුපච්චයා – දිට්ඨුපාදානං පටිච්ච කාමුපාදානං සම්පයුත්තකා ච ඛන්ධා චිත්තසමුට්ඨානානඤ්ච රූපං (චක්කං). (3)

96. උපාදානියඤ්චෙව නො ච උපාදානං ධම්මං පටිච්ච උපාදානියො චෙව නො ච උපාදානො ධම්මො උප්පජ්ජති හෙතුපච්චයා – උපාදානියඤ්චෙව නො ච උපාදානං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… (යාව අජ්ඣත්තිකා මහාභූතා). (1)

උපාදානියඤ්චෙව නො ච උපාදානං ධම්මං පටිච්ච උපාදානො චෙව උපාදානියො ච ධම්මො උප්පජ්ජති හෙතුපච්චයා – උපාදානියෙ චෙව නො ච උපාදානෙ ඛන්ධෙ පටිච්ච උපාදානා. (2)

උපාදානියඤ්චෙව නො ච උපාදානං ධම්මං පටිච්ච උපාදානො චෙව උපාදානියො ච උපාදානියො චෙව නො ච උපාදානො ච ධම්මා උප්පජ්ජන්ති හෙතුපච්චයා – උපාදානියඤ්චෙව නො ච උපාදානං එකං ඛන්ධං පටිච්ච තයො ඛන්ධා උපාදානා ච චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ…. (3)

97. උපාදානඤ්චෙව උපාදානියඤ්ච උපාදානියඤ්චෙව නො ච උපාදානඤ්ච ධම්මං පටිච්ච උපාදානො චෙව උපාදානියො ච ධම්මො උප්පජ්ජති හෙතුපච්චයා – දිට්ඨුපාදානඤ්ච සම්පයුත්තකෙ ච ඛන්ධෙ පටිච්ච කාමුපාදානං (චක්කං). (1)

උපාදානඤ්චෙව උපාදානියඤ්ච උපාදානියඤ්චෙව නො ච උපාදානඤ්ච ධම්මං පටිච්ච උපාදානියො චෙව නො ච උපාදානො ධම්මො උප්පජ්ජති හෙතුපච්චයා – උපාදානියඤ්චෙව නො ච උපාදානං එකං ඛන්ධඤ්ච උපාදානෙ ච පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ ච…පෙ… උපාදානෙ ච මහාභූතෙ ච පටිච්ච චිත්තසමුට්ඨානං රූපං. (2)

උපාදානඤ්චෙව උපාදානියඤ්ච උපාදානියඤ්චෙව නො ච උපාදානඤ්ච ධම්මං පටිච්ච උපාදානො චෙව උපාදානියො ච උපාදානියො චෙව නො ච උපාදානො ච ධම්මා උප්පජ්ජන්ති හෙතුපච්චයා – උපාදානියඤ්චෙව නො ච උපාදානං එකං ඛන්ධඤ්ච දිට්ඨුපාදානඤ්ච පටිච්ච තයො ඛන්ධා කාමුපාදානඤ්ච චිත්තසමුට්ඨානඤ්ච රූපං…පෙ… ද්වෙ ඛන්ධෙ ච…පෙ… (චක්කං). (3)