1. විභඞ්ගවාරො

නහෙතුපච්චයො

60. උපාදානවිප්පයුත්තං ධම්මං පච්චයා උපාදානවිප්පයුත්තො ධම්මො උප්පජ්ජති නහෙතුපච්චයා – අහෙතුකං උපාදානවිප්පයුත්තං එකං ඛන්ධං පච්චයා…පෙ… (යාව අසඤ්ඤසත්තා ) චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං…පෙ… වත්ථුං පච්චයා අහෙතුකා උපාදානවිප්පයුත්තා ඛන්ධා, විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො උද්ධච්චසහගතො මොහො (සංඛිත්තං).