1. විභඞ්ගවාරො

හෙතුපච්චයො

57. උපාදානසම්පයුත්තං ධම්මං පච්චයා උපාදානසම්පයුත්තො ධම්මො උප්පජ්ජති හෙතුපච්චයා… තීණි (පටිච්චසදිසං).

උපාදානවිප්පයුත්තං ධම්මං පච්චයා උපාදානවිප්පයුත්තො ධම්මො උප්පජ්ජති හෙතුපච්චයා – උපාදානවිප්පයුත්තං එකං ඛන්ධං පච්චයා…පෙ… (යාව අජ්ඣත්තිකා මහාභූතා) වත්ථුං පච්චයා උපාදානවිප්පයුත්තා ඛන්ධා, වත්ථුං පච්චයා දිට්ඨිගතවිප්පයුත්තො ලොභො. (1)

උපාදානවිප්පයුත්තං ධම්මං පච්චයා උපාදානසම්පයුත්තො ධම්මො උප්පජ්ජති හෙතුපච්චයා – වත්ථුං පච්චයා උපාදානසම්පයුත්තා ඛන්ධා, දිට්ඨිගතවිප්පයුත්තං ලොභං පච්චයා සම්පයුත්තකා ඛන්ධා. (2)

උපාදානවිප්පයුත්තං ධම්මං පච්චයා උපාදානසම්පයුත්තො ච උපාදානවිප්පයුත්තො ච ධම්මා උප්පජ්ජන්ති හෙතුපච්චයා – වත්ථුං පච්චයා උපාදානසම්පයුත්තකා ඛන්ධා, මහාභූතෙ පච්චයා චිත්තසමුට්ඨානං රූපං; දිට්ඨිගතවිප්පයුත්තං ලොභං පච්චයා සම්පයුත්තකා ඛන්ධා චිත්තසමුට්ඨානඤ්ච රූපං, වත්ථුං පච්චයා දිට්ඨිගතවිප්පයුත්තලොභසහගතා ඛන්ධා ච ලොභො ච. (3)

58. උපාදානසම්පයුත්තඤ්ච උපාදානවිප්පයුත්තඤ්ච ධම්මං පච්චයා උපාදානසම්පයුත්තො ධම්මො උප්පජ්ජති හෙතුපච්චයා – උපාදානසම්පයුත්තං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ… දිට්ඨිගතවිප්පයුත්තලොභසහගතං එකං ඛන්ධඤ්ච ලොභඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ…. (1)

උපාදානසම්පයුත්තඤ්ච උපාදානවිප්පයුත්තඤ්ච ධම්මං පච්චයා උපාදානවිප්පයුත්තො ධම්මො උප්පජ්ජති හෙතුපච්චයා – උපාදානසම්පයුත්තෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං, දිට්ඨිගතවිප්පයුත්තලොභසහගතෙ ඛන්ධෙ ච ලොභඤ්ච පච්චයා චිත්තසමුට්ඨානං රූපං, දිට්ඨිගතවිප්පයුත්තලොභසහගතෙ ඛන්ධෙ ච වත්ථුඤ්ච පච්චයා ලොභො. (2)

උපාදානසම්පයුත්තඤ්ච උපාදානවිප්පයුත්තඤ්ච ධම්මං පච්චයා උපාදානසම්පයුත්තො ච උපාදානවිප්පයුත්තො ච ධම්මා උප්පජ්ජන්ති හෙතුපච්චයා – උපාදානසම්පයුත්තං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ… උපාදානසම්පයුත්තෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං; දිට්ඨිගතවිප්පයුත්තලොභසහගතං එකං ඛන්ධඤ්ච වත්ථුඤ්ච පච්චයා තයො ඛන්ධා ලොභො ච…පෙ… ද්වෙ ඛන්ධෙ ච…පෙ…. (3) (සංඛිත්තං. ආරම්මණපච්චයම්හි පඤ්ච විඤ්ඤාණා කාතබ්බා.)