1. විභඞ්ගවාරො

හෙතුපච්චයො

17. උපාදානො ධම්මො උපාදානස්ස ධම්මස්ස හෙතුපච්චයෙන පච්චයො – උපාදානා හෙතූ සම්පයුත්තකානං උපාදානානං හෙතුපච්චයෙන පච්චයො. (මූලං කාතබ්බං) උපාදානා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො. (මූලං කාතබ්බං) උපාදානා හෙතූ සම්පයුත්තකානං ඛන්ධානං උපාදානානඤ්ච චිත්තසමුට්ඨානානං රූපානං හෙතුපච්චයෙන පච්චයො. (3)

18. නොඋපාදානො ධම්මො නොඋපාදානස්ස ධම්මස්ස හෙතුපච්චයෙන පච්චයො – නොඋපාදානා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (1)

නොඋපාදානො ධම්මො උපාදානස්ස ධම්මස්ස හෙතුපච්චයෙන පච්චයො – නොඋපාදානා හෙතූ සම්පයුත්තකානං උපාදානානං හෙතුපච්චයෙන පච්චයො. (මූලං කාතබ්බං) නොඋපාදානා හෙතූ සම්පයුත්තකානං ඛන්ධානං උපාදානානඤ්ච චිත්තසමුට්ඨානානං රූපානං හෙතුපච්චයෙන පච්චයො. (3)

19. උපාදානො ච නොඋපාදානො ච ධම්මා උපාදානස්ස ධම්මස්ස හෙතුපච්චයෙන පච්චයො – උපාදානා ච නොඋපාදානා ච හෙතූ සම්පයුත්තකානං උපාදානානං හෙතුපච්චයෙන පච්චයො. (මූලං කාතබ්බං) උපාදානා ච නොඋපාදානා ච හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො. (මූලං කාතබ්බං) උපාදානා ච නොඋපාදානා ච හෙතූ සම්පයුත්තකානං ඛන්ධානං උපාදානානඤ්ච චිත්තසමුට්ඨානානං රූපානං හෙතුපච්චයෙන පච්චයො. (3)

ආරම්මණපච්චයො

20. උපාදානො ධම්මො උපාදානස්ස ධම්මස්ස ආරම්මණපච්චයෙන පච්චයො – උපාදානෙ ආරබ්භ උපාදානා උප්පජ්ජන්ති… තීණි (ආරබ්භ කාතබ්බා).

නොඋපාදානො ධම්මො නොඋපාදානස්ස ධම්මස්ස ආරම්මණපච්චයෙන පච්චයො – දානං දත්වා සීලං…පෙ… උපොසථකම්මං කත්වා තං පච්චවෙක්ඛති අස්සාදෙති අභිනන්දති, තං ආරබ්භ රාගො උප්පජ්ජති, දිට්ඨි උප්පජ්ජති; විචිකිච්ඡා…පෙ… උද්ධච්චං…පෙ… දොමනස්සං උප්පජ්ජති; පුබ්බෙ සුචිණ්ණානි…පෙ… ඣානා වුට්ඨහිත්වා ඣානං පච්චවෙක්ඛති, අරියා මග්ගා වුට්ඨහිත්වා මග්ගං පච්චවෙක්ඛන්ති, ඵලං…පෙ… නිබ්බානං පච්චවෙක්ඛන්ති; නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස, ආවජ්ජනාය ආරම්මණපච්චයෙන පච්චයො. අරියා නොඋපාදානෙ පහීනෙ කිලෙසෙ …පෙ… වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ…පෙ… චක්ඛුං…පෙ… වත්ථුං නොඋපාදානෙ ඛන්ධෙ අනිච්චතො…පෙ… දොමනස්සං උප්පජ්ජති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. චෙතොපරියඤාණෙන නොඋපාදානචිත්තසමඞ්ගිස්ස චිත්තං ජානාති, ආකාසානඤ්චායතනං විඤ්ඤාණඤ්චායතනස්ස…පෙ… ආකිඤ්චඤ්ඤායතනං නෙවසඤ්ඤානාසඤ්ඤායතනස්ස…පෙ… රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස…පෙ… නොඋපාදානා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (1)

නොඋපාදානො ධම්මො උපාදානස්ස ධම්මස්ස ආරම්මණපච්චයෙන පච්චයො – දානං…පෙ… සීලං…පෙ… උපොසථකම්මං කත්වා තං අස්සාදෙති අභිනන්දති, තං ආරබ්භ රාගො උප්පජ්ජති, දිට්ඨි උප්පජ්ජති; පුබ්බෙ සුචිණ්ණානි…පෙ… ඣානා…පෙ… චක්ඛුං…පෙ… වත්ථුං නොඋපාදානෙ ඛන්ධෙ අස්සාදෙති අභිනන්දති, තං ආරබ්භ රාගො උප්පජ්ජති, දිට්ඨි උප්පජ්ජති. (2)

නොඋපාදානො ධම්මො උපාදානස්ස ච නොඋපාදානස්ස ච ධම්මස්ස ආරම්මණපච්චයෙන පච්චයො – දානං…පෙ… සීලං…පෙ… උපොසථකම්මං කත්වා…පෙ… පුබ්බෙ සුචිණ්ණානි …පෙ… ඣානා වුට්ඨහිත්වා ඣානං…පෙ… චක්ඛුං…පෙ… වත්ථුං නොඋපාදානෙ ඛන්ධෙ අස්සාදෙති අභිනන්දති, තං ආරබ්භ උපාදානා ච සම්පයුත්තකා ච ඛන්ධා උප්පජ්ජන්ති. (3)

උපාදානො ච නොඋපාදානො ච ධම්මා උපාදානස්ස ධම්මස්ස ආරම්මණපච්චයෙන පච්චයො… තීණි (ආරබ්භ කාතබ්බා).

අධිපතිපච්චයො

21. උපාදානො ධම්මො උපාදානස්ස ධම්මස්ස අධිපතිපච්චයෙන පච්චයො. ආරම්මණාධිපති – උපාදානෙ ගරුං කත්වා උපාදානා උප්පජ්ජන්ති… තීණි (ආරම්මණාධිපතියෙව).

22. නොඋපාදානො ධම්මො නොඋපාදානස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං දත්වා සීලං…පෙ… උපොසථකම්මං…පෙ… පුබ්බෙ…පෙ… ඣානා වුට්ඨහිත්වා ඣානං ගරුං කත්වා පච්චවෙක්ඛති, අස්සාදෙති අභිනන්දති, අරියා මග්ගා වුට්ඨහිත්වා මග්ගං ගරුං කත්වා පච්චවෙක්ඛන්ති…පෙ… ඵලස්ස අධිපතිපච්චයෙන පච්චයො; චක්ඛුං…පෙ… වත්ථුං නොඋපාදානෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති. සහජාතාධිපති – නොඋපාදානාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (1)

නොඋපාදානො ධම්මො උපාදානස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං…පෙ… සීලං…පෙ… උපොසථකම්මං කත්වා තං ගරුං කත්වා අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති; පුබ්බෙ…පෙ… ඣානා…පෙ… චක්ඛුං…පෙ… වත්ථුං නොඋපාදානෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති. සහජාතාධිපති – නොඋපාදානාධිපති සම්පයුත්තකානං උපාදානානං අධිපතිපච්චයෙන පච්චයො. (2)

නොඋපාදානො ධම්මො උපාදානස්ස ච නොඋපාදානස්ස ච ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං…පෙ… සීලං…පෙ… උපොසථකම්මං…පෙ… පුබ්බෙ…පෙ… ඣානං…පෙ… චක්ඛුං…පෙ… වත්ථුං නොඋපාදානෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා උපාදානා ච සම්පයුත්තකා ච ඛන්ධා උප්පජ්ජන්ති. සහජාතාධිපති – නොඋපාදානාධිපති සම්පයුත්තකානං ඛන්ධානං උපාදානානඤ්ච චිත්තසමුට්ඨානානං රූපානං අධිපතිපච්චයෙන පච්චයො. (3)

උපාදානො ච නොඋපාදානො ච ධම්මා උපාදානස්ස ධම්මස්ස අධිපතිපච්චයෙන පච්චයො… තීණි… ආරම්මණාධිපති… තීණි (ආරබ්භ කාතබ්බා, ආරම්මණාධිපතියෙව).

අනන්තරපච්චයාදි

23. උපාදානො ධම්මො උපාදානස්ස ධම්මස්ස අනන්තරපච්චයෙන පච්චයො – පුරිමා පුරිමා උපාදානා පච්ඡිමානං පච්ඡිමානං උපාදානානං අනන්තරපච්චයෙන පච්චයො. (මූලං කාතබ්බං) පුරිමා පුරිමා උපාදානා පච්ඡිමානං පච්ඡිමානං නොඋපාදානානං ඛන්ධානං අනන්තරපච්චයෙන පච්චයො; උපාදානං වුට්ඨානස්ස අනන්තරපච්චයෙන පච්චයො. (මූලං කාතබ්බං) පුරිමා පුරිමා උපාදානා පච්ඡිමානං පච්ඡිමානං උපාදානානං සම්පයුත්තකානඤ්ච ඛන්ධානං අනන්තරපච්චයෙන පච්චයො. (3)

24. නොඋපාදානො ධම්මො නොඋපාදානස්ස ධම්මස්ස අනන්තරපච්චයෙන පච්චයො – පුරිමා පුරිමා නොඋපාදානා ඛන්ධා පච්ඡිමානං පච්ඡිමානං නොඋපාදානානං ඛන්ධානං අනන්තරපච්චයෙන පච්චයො; අනුලොමං ගොත්‍රභුස්ස…පෙ… ඵලසමාපත්තියා අනන්තරපච්චයෙන පච්චයො. (1)

නොඋපාදානො ධම්මො උපාදානස්ස ධම්මස්ස අනන්තරපච්චයෙන පච්චයො – පුරිමා පුරිමා නොඋපාදානා ඛන්ධා පච්ඡිමානං පච්ඡිමානං උපාදානානං ඛන්ධානං අනන්තරපච්චයෙන පච්චයො; ආවජ්ජනා උපාදානානං අනන්තරපච්චයෙන පච්චයො. (2)

නොඋපාදානො ධම්මො උපාදානස්ස ච නොඋපාදානස්ස ච ධම්මස්ස අනන්තරපච්චයෙන පච්චයො – පුරිමා පුරිමා නොඋපාදානා ඛන්ධා පච්ඡිමානං පච්ඡිමානං උපාදානානං සම්පයුත්තකානඤ්ච ඛන්ධානං අනන්තරපච්චයෙන පච්චයො; ආවජ්ජනා උපාදානානං සම්පයුත්තකානඤ්ච ඛන්ධානං අනන්තරපච්චයෙන පච්චයො. (3)

25. උපාදානො ච නොඋපාදානො ච ධම්මා උපාදානස්ස ධම්මස්ස අනන්තරපච්චයෙන පච්චයො – පුරිමා පුරිමා උපාදානා ච සම්පයුත්තකා ච ඛන්ධා පච්ඡිමානං පච්ඡිමානං උපාදානානං අනන්තරපච්චයෙන පච්චයො. (මූලං කාතබ්බං) පුරිමා පුරිමා උපාදානා ච සම්පයුත්තකා ච ඛන්ධා පච්ඡිමානං පච්ඡිමානං නොඋපාදානානං ඛන්ධානං අනන්තරපච්චයෙන පච්චයො; උපාදානා ච සම්පයුත්තකා ච ඛන්ධා වුට්ඨානස්ස අනන්තරපච්චයෙන පච්චයො. (මූලං කාතබ්බං) පුරිමා පුරිමා උපාදානා ච සම්පයුත්තකා ච ඛන්ධා පච්ඡිමානං පච්ඡිමානං උපාදානානං සම්පයුත්තකානඤ්ච ඛන්ධානං අනන්තරපච්චයෙන පච්චයො. (3)

සමනන්තරපච්චයෙන පච්චයො… සහජාතපච්චයෙන පච්චයො (පටිච්චසදිසං)… අඤ්ඤමඤ්ඤපච්චයෙන පච්චයො (පටිච්චසදිසං)… නිස්සයපච්චයෙන පච්චයො (පච්චයසදිසං).

උපනිස්සයපච්චයො

26. උපාදානො ධම්මො උපාදානස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො …පෙ…. පකතූපනිස්සයො – උපාදානා උපාදානානං උපනිස්සයපච්චයෙන පච්චයො… තීණි.

27. නොඋපාදානො ධම්මො නොඋපාදානස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – සද්ධං උපනිස්සාය දානං දෙති…පෙ… සමාපත්තිං උප්පාදෙති, මානං ජප්පෙති, දිට්ඨිං ගණ්හාති; සීලං…පෙ… පඤ්ඤං… රාගං…පෙ… පත්ථනං… කායිකං සුඛං…පෙ… සෙනාසනං උපනිස්සාය දානං දෙති…පෙ… සමාපත්තිං උප්පාදෙති, මානං ජප්පෙති, දිට්ඨිං ගණ්හාති; පාණං හනති…පෙ… සඞ්ඝං භින්දති, සද්ධා…පෙ… සෙනාසනං සද්ධාය…පෙ… ඵලසමාපත්තියා උපනිස්සයපච්චයෙන පච්චයො. (1)

නොඋපාදානො ධම්මො උපාදානස්ස ධම්මස්ස උපනිස්සයපච්චයෙන පච්චයො. පකතූපනිස්සයො – සද්ධං උපනිස්සාය මානං ජප්පෙති, දිට්ඨිං ගණ්හාති; සීලං…පෙ… සෙනාසනං උපනිස්සාය අදින්නං…පෙ… මුසා…පෙ… පිසුණං…පෙ… සම්ඵං…පෙ… සන්ධිං…පෙ… නිල්ලොපං…පෙ… එකාගාරිකං…පෙ… පරිපන්ථෙ…පෙ… පරදාරං…පෙ… ගාමඝාතං…පෙ… නිගමඝාතං කරොති; සද්ධා…පෙ… සෙනාසනං උපාදානානං උපනිස්සයපච්චයෙන පච්චයො. (මූලං කාතබ්බං) සද්ධං උපනිස්සාය මානං ජප්පෙති, දිට්ඨිං ගණ්හාති; සීලං…පෙ… සෙනාසනං උපනිස්සාය අදින්නං ආදියති, මුසා…පෙ… පිසුණං…පෙ… සම්ඵං…පෙ… සන්ධිං…පෙ… නිල්ලොපං…පෙ… එකාගාරිකං…පෙ… පරිපන්ථෙ…පෙ… පරදාරං…පෙ… ගාමඝාතං…පෙ… නිගමඝාතං කරොති; සද්ධා…පෙ… සෙනාසනං උපාදානානං සම්පයුත්තකානඤ්ච ඛන්ධානං උපනිස්සයපච්චයෙන පච්චයො. (3)

උපාදානො ච නොඋපාදානො ච ධම්මා උපාදානස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො… තීණි.

පුරෙජාතපච්චයො

28. නොඋපාදානො ධම්මො නොඋපාදානස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අනිච්චතො…පෙ… දොමනස්සං උප්පජ්ජති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස…පෙ…. වත්ථුපුරෙජාතං – චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස…පෙ… වත්ථු නොඋපාදානානං ඛන්ධානං පුරෙජාතපච්චයෙන පච්චයො. (1)

නොඋපාදානො ධම්මො උපාදානස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අස්සාදෙති අභිනන්දති, තං ආරබ්භ රාගො උප්පජ්ජති, දිට්ඨි උප්පජ්ජති. වත්ථුපුරෙජාතං – වත්ථු උපාදානානං පුරෙජාතපච්චයෙන පච්චයො. (2)

නොඋපාදානො ධම්මො උපාදානස්ස ච නොඋපාදානස්ස ච ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අස්සාදෙති අභිනන්දති, තං ආරබ්භ උපාදානා ච සම්පයුත්තකා ච ඛන්ධා උප්පජ්ජන්ති. වත්ථුපුරෙජාතං – වත්ථු උපාදානානං සම්පයුත්තකානඤ්ච ඛන්ධානං පුරෙජාතපච්චයෙන පච්චයො. (3)

පච්ඡාජාතාසෙවනපච්චයා

29. උපාදානො ධම්මො නොඋපාදානස්ස ධම්මස්ස පච්ඡාජාතපච්චයෙන පච්චයො (සංඛිත්තං). (1)

නොඋපාදානො ධම්මො නොඋපාදානස්ස ධම්මස්ස පච්ඡාජාතපච්චයෙන පච්චයො (සංඛිත්තං). (1)

උපාදානො ච නොඋපාදානො ච ධම්මා නොඋපාදානස්ස ධම්මස්ස පච්ඡාජාතපච්චයෙන පච්චයො (සංඛිත්තං). (1) …ආසෙවනපච්චයෙන පච්චයො.

කම්මපච්චයො

30. නොඋපාදානො ධම්මො නොඋපාදානස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – නොඋපාදානා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – නොඋපාදානා චෙතනා විපාකානං ඛන්ධානං කටත්තා ච රූපානං කම්මපච්චයෙන පච්චයො. (1)

නොඋපාදානො ධම්මො උපාදානස්ස ධම්මස්ස කම්මපච්චයෙන පච්චයො – නොඋපාදානා චෙතනා සම්පයුත්තකානං උපාදානානං කම්මපච්චයෙන පච්චයො. (2)

නොඋපාදානො ධම්මො උපාදානස්ස ච නොඋපාදානස්ස ච ධම්මස්ස කම්මපච්චයෙන පච්චයො – නොඋපාදානා චෙතනා සම්පයුත්තකානං ඛන්ධානං උපාදානානඤ්ච චිත්තසමුට්ඨානානං රූපානං කම්මපච්චයෙන පච්චයො. (3)

විපාකපච්චයාදි

31. නොඋපාදානො ධම්මො නොඋපාදානස්ස ධම්මස්ස විපාකපච්චයෙන පච්චයො – විපාකො නොඋපාදානො එකො ඛන්ධො…පෙ… එකං.

නොඋපාදානො ධම්මො නොඋපාදානස්ස ධම්මස්ස ආහාරපච්චයෙන පච්චයො… තීණි (එකොයෙව කබළීකාරො ආහාරො)… ඉන්ද්‍රියපච්චයෙන පච්චයො… තීණි (රූපජීවිතින්ද්‍රියං එකංයෙව)… ඣානපච්චයෙන පච්චයො… තීණි.

උපාදානො ධම්මො උපාදානස්ස ධම්මස්ස මග්ගපච්චයෙන පච්චයො – උපාදානානි මග්ගඞ්ගානි සම්පයුත්තකානං උපාදානානං මග්ගපච්චයෙන පච්චයො (ඉමිනා කාරණෙන නව පඤ්හා කාතබ්බා)… සම්පයුත්තපච්චයෙන පච්චයො… නව.

විප්පයුත්තපච්චයො

32. උපාදානො ධම්මො නොඋපාදානස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං. සහජාතා – උපාදානා චිත්තසමුට්ඨානානං රූපානං විප්පයුත්තපච්චයෙන පච්චයො. පච්ඡාජාතං – පච්ඡාජාතා උපාදානා පුරෙජාතස්ස ඉමස්ස කායස්ස විප්පයුත්තපච්චයෙන පච්චයො. (1)

නොඋපාදානො ධම්මො නොඋපාදානස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං, පච්ඡාජාතං (සංඛිත්තං). (1)

නොඋපාදානො ධම්මො උපාදානස්ස ධම්මස්ස විප්පයුත්තපච්චයෙන පච්චයො. පුරෙජාතං – වත්ථු උපාදානානං විප්පයුත්තපච්චයෙන පච්චයො. (2)

නොඋපාදානො ධම්මො උපාදානස්ස ච නොඋපාදානස්ස ච ධම්මස්ස විප්පයුත්තපච්චයෙන පච්චයො. පුරෙජාතං – වත්ථු උපාදානානං සම්පයුත්තකානඤ්ච ඛන්ධානං විප්පයුත්තපච්චයෙන පච්චයො. (3)

33. උපාදානො ච නොඋපාදානො ච ධම්මා නොඋපාදානස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං. සහජාතා – උපාදානා ච සම්පයුත්තකා ච ඛන්ධා චිත්තසමුට්ඨානානං රූපානං විප්පයුත්තපච්චයෙන පච්චයො. පච්ඡාජාතා – උපාදානා ච සම්පයුත්තකා ච ඛන්ධා පුරෙජාතස්ස ඉමස්ස කායස්ස විප්පයුත්තපච්චයෙන පච්චයො. (1)

අත්ථිපච්චයො

34. උපාදානො ධම්මො උපාදානස්ස ධම්මස්ස අත්ථිපච්චයෙන පච්චයො – දිට්ඨුපාදානං කාමුපාදානස්ස අත්ථිපච්චයෙන පච්චයො (චක්කං). (1)

උපාදානො ධම්මො නොඋපාදානස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං. සහජාතා – උපාදානා සම්පයුත්තකානං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො. පච්ඡාජාතා – උපාදානා පුරෙජාතස්ස ඉමස්ස කායස්ස අත්ථිපච්චයෙන පච්චයො. (2)

උපාදානො ධම්මො උපාදානස්ස ච නොඋපාදානස්ස ච ධම්මස්ස අත්ථිපච්චයෙන පච්චයො (සංඛිත්තං, පටිච්චසදිසං). (3)

35. නොඋපාදානො ධම්මො නොඋපාදානස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං (සංඛිත්තං, විත්ථාරෙතබ්බං). (1)

නොඋපාදානො ධම්මො උපාදානස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතං (සහජාතසදිසං). පුරෙජාතං (පුරෙජාතසදිසං). (2)

නොඋපාදානො ධම්මො උපාදානස්ස ච නොඋපාදානස්ස ච ධම්මස්ස අත්ථිපච්චයෙන පච්චයො – සහජාතං, පුරෙජාතං (සංඛිත්තං, සහජාතසදිසං සහජාතං විභජිතබ්බං, පුරෙජාතසදිසං පුරෙජාතං). (3)

36. උපාදානො ච නොඋපාදානො ච ධම්මා උපාදානස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතං – දිට්ඨුපාදානඤ්ච සම්පයුත්තකා ච ඛන්ධා කාමුපාදානස්ස අත්ථිපච්චයෙන පච්චයො (චක්කං). සහජාතං – දිට්ඨුපාදානඤ්ච වත්ථු ච කාමුපාදානස්ස අත්ථිපච්චයෙන පච්චයො (චක්කං). (1)

උපාදානො ච නොඋපාදානො ච ධම්මා නොඋපාදානස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං. සහජාතො – නොඋපාදානො එකො ඛන්ධො ච උපාදානා ච තිණ්ණන්නං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො…පෙ… ද්වෙ ඛන්ධා ච…පෙ…. සහජාතා – උපාදානා ච මහාභූතා ච චිත්තසමුට්ඨානානං රූපානං අත්ථිපච්චයෙන පච්චයො. සහජාතා – උපාදානා ච වත්ථු ච නොඋපාදානානං ඛන්ධානං අත්ථිපච්චයෙන පච්චයො. පච්ඡාජාතා – උපාදානා ච සම්පයුත්තකා ච ඛන්ධා පුරෙජාතස්ස ඉමස්ස කායස්ස අත්ථිපච්චයෙන පච්චයො. පච්ඡාජාතා – උපාදානා ච සම්පයුත්තකා ච ඛන්ධා කබළීකාරො ආහාරො ච ඉමස්ස කායස්ස අත්ථිපච්චයෙන පච්චයො. පච්ඡාජාතා – උපාදානා ච සම්පයුත්තකා ච ඛන්ධා රූපජීවිතින්ද්‍රියඤ්ච කටත්තාරූපානං අත්ථිපච්චයෙන පච්චයො. (2)

උපාදානො ච නොඋපාදානො ච ධම්මා උපාදානස්ස ච නොඋපාදානස්ස ච ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – නොඋපාදානො එකො ඛන්ධො ච දිට්ඨුපාදානඤ්ච තිණ්ණන්නං ඛන්ධානං කාමුපාදානස්ස ච චිත්තසමුට්ඨානානං රූපානං අත්ථිපච්චයෙන පච්චයො…පෙ… ද්වෙ ඛන්ධා ච…පෙ… (චක්කං). සහජාතං – දිට්ඨුපාදානඤ්ච වත්ථු ච කාමුපාදානස්ස සම්පයුත්තකානඤ්ච ඛන්ධානං අත්ථිපච්චයෙන පච්චයො (චක්කං). (3)