1-4. පච්චයානුලොමාදි

හෙතුපච්චයො

12. උපාදානං ධම්මං පච්චයා උපාදානො ධම්මො උප්පජ්ජති හෙතුපච්චයා – දිට්ඨුපාදානං පච්චයා කාමුපාදානං… තීණි (පටිච්චසදිසා).

නොඋපාදානං ධම්මං පච්චයා නොඋපාදානො ධම්මො උප්පජ්ජති හෙතුපච්චයා – නොඋපාදානං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… ඛන්ධෙ පච්චයා වත්ථු…පෙ… (යාව අජ්ඣත්තිකා මහාභූතා) වත්ථුං පච්චයා නොඋපාදානා ඛන්ධා. (1)

නොඋපාදානං ධම්මං පච්චයා උපාදානො ධම්මො උප්පජ්ජති හෙතුපච්චයා – නොඋපාදානෙ ඛන්ධෙ පච්චයා උපාදානා, වත්ථුං පච්චයා උපාදානා. (2)

නොඋපාදානං ධම්මං පච්චයා උපාදානො ච නොඋපාදානො ච ධම්මා උප්පජ්ජන්ති හෙතුපච්චයා – නොඋපාදානං එකං ඛන්ධං පච්චයා තයො ඛන්ධා උපාදානා ච චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… වත්ථුං පච්චයා උපාදානා, මහාභූතෙ පච්චයා චිත්තසමුට්ඨානං රූපං, වත්ථුං පච්චයා උපාදානා සම්පයුත්තකා ච ඛන්ධා. (3)

13. උපාදානඤ්ච නොඋපාදානඤ්ච ධම්මං පච්චයා උපාදානො ධම්මො උප්පජ්ජති හෙතුපච්චයා – දිට්ඨුපාදානඤ්ච සම්පයුත්තකෙ ච ඛන්ධෙ පච්චයා කාමුපාදානං, කාමුපාදානඤ්ච සම්පයුත්තකෙ ච ඛන්ධෙ පච්චයා දිට්ඨුපාදානං (චක්කං කාතබ්බං). දිට්ඨුපාදානඤ්ච වත්ථුඤ්ච පච්චයා කාමුපාදානං (චක්කං කාතබ්බං). (1)

උපාදානඤ්ච නොඋපාදානඤ්ච ධම්මං පච්චයා නොඋපාදානො ධම්මො උප්පජ්ජති හෙතුපච්චයා – නොඋපාදානං එකං ඛන්ධඤ්ච උපාදානඤ්ච පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ ච…පෙ… (චක්කං කාතබ්බං). උපාදානෙ ච මහාභූතෙ ච පච්චයා චිත්තසමුට්ඨානං රූපං, උපාදානඤ්ච වත්ථුඤ්ච පච්චයා නොඋපාදානා ඛන්ධා. (2)

උපාදානඤ්ච නොඋපාදානඤ්ච ධම්මං පච්චයා උපාදානො ච නොඋපාදානො ච ධම්මා උප්පජ්ජන්ති හෙතුපච්චයා – නොඋපාදානං එකං ඛන්ධඤ්ච දිට්ඨුපාදානඤ්ච පච්චයා තයො ඛන්ධා කාමුපාදානං චිත්තසමුට්ඨානඤ්ච රූපං…පෙ… (චක්කං). දිට්ඨුපාදානඤ්ච වත්ථුඤ්ච පච්චයා කාමුපාදානං සම්පයුත්තකා ච ඛන්ධා…පෙ… (චක්කං). (3)

ආරම්මණපච්චයා… (ආරම්මණෙ නොඋපාදානමූලකෙ පඤ්චායතනඤ්ච වත්ථුඤ්ච කාතබ්බා).

හෙතුයා නව, ආරම්මණෙ නව, අධිපතියා නව (සබ්බත්ථ නව), විපාකෙ එකං…පෙ… අවිගතෙ නව.

අනුලොමං.

14. නොඋපාදානං ධම්මං පච්චයා නොඋපාදානො ධම්මො උප්පජ්ජති නහෙතුපච්චයා – අහෙතුකං නොඋපාදානං එකං ඛන්ධං පච්චයා…පෙ… අහෙතුකපටිසන්ධික්ඛණෙ…පෙ… (යාව අසඤ්ඤසත්තා) චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා අහෙතුකා නොඋපාදානා ඛන්ධා, විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො උද්ධච්චසහගතො මොහො.

නහෙතුයා එකං, නආරම්මණෙ තීණි, නඅධිපතියා නව, නඅනන්තරෙ තීණි, නසමනන්තරෙ තීණි…පෙ… නපුරෙජාතෙ නව…පෙ… නකම්මෙ තීණි, නවිපාකෙ නව (පටිච්චසදිසං)…පෙ… නොවිගතෙ තීණි.

පච්චනීයං.