1. විභඞ්ගවාරො

හෙතුපච්චයො

106. චෙතසිකං ධම්මං පච්චයා චෙතසිකො ධම්මො උප්පජ්ජති හෙතුපච්චයා… තීණි (පටිච්චසදිසා).

අචෙතසිකං ධම්මං පච්චයා අචෙතසිකො ධම්මො උප්පජ්ජති හෙතුපච්චයා – චිත්තං පච්චයා චිත්තසමුට්ඨානං රූපං, වත්ථුං පච්චයා චිත්තං; පටිසන්ධික්ඛණෙ චිත්තං පච්චයා කටත්තාරූපං, චිත්තං පච්චයා වත්ථු, වත්ථුං පච්චයා චිත්තං, එකං මහාභූතං…පෙ…. (1)

අචෙතසිකං ධම්මං පච්චයා චෙතසිකො ධම්මො උප්පජ්ජති හෙතුපච්චයා – චිත්තං පච්චයා සම්පයුත්තකා ඛන්ධා, වත්ථුං පච්චයා චෙතසිකා ඛන්ධා (පටිසන්ධික්ඛණෙ ද්වෙපි කාතබ්බා). (2)

අචෙතසිකං ධම්මං පච්චයා චෙතසිකො ච අචෙතසිකො ච ධම්මා උප්පජ්ජන්ති හෙතුපච්චයා – චිත්තං පච්චයා සම්පයුත්තකා ඛන්ධා චිත්තසමුට්ඨානඤ්ච රූපං, වත්ථුං පච්චයා චිත්තඤ්ච සම්පයුත්තකා ච ඛන්ධා (පටිසන්ධික්ඛණෙ ද්වෙපි කාතබ්බා). (3)

107. චෙතසිකඤ්ච අචෙතසිකඤ්ච ධම්මං පච්චයා චෙතසිකො ධම්මො උප්පජ්ජති හෙතුපච්චයා – චෙතසිකං එකං ඛන්ධඤ්ච චිත්තඤ්ච පච්චයා ද්වෙ ඛන්ධා, ද්වෙ ඛන්ධෙ ච…පෙ… චෙතසිකං එකං ඛන්ධඤ්ච වත්ථුඤ්ච පච්චයා ද්වෙ ඛන්ධා, ද්වෙ ඛන්ධෙ ච…පෙ… (පටිසන්ධික්ඛණෙ ද්වෙපි කාතබ්බා). (1)

චෙතසිකඤ්ච අචෙතසිකඤ්ච ධම්මං පච්චයා අචෙතසිකො ධම්මො උප්පජ්ජති හෙතුපච්චයා – චෙතසිකෙ ඛන්ධෙ ච චිත්තඤ්ච පච්චයා චිත්තසමුට්ඨානං රූපං, චෙතසිකෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං, චෙතසිකෙ ඛන්ධෙ ච වත්ථුඤ්ච පච්චයා චිත්තං (පටිසන්ධික්ඛණෙ තීණිපි කාතබ්බා). (2)

චෙතසිකඤ්ච අචෙතසිකඤ්ච ධම්මං පච්චයා චෙතසිකො ච අචෙතසිකො ච ධම්මා උප්පජ්ජන්ති හෙතුපච්චයා – චෙතසිකං එකං ඛන්ධඤ්ච චිත්තඤ්ච පච්චයා ද්වෙ ඛන්ධා චිත්තසමුට්ඨානඤ්ච රූපං, ද්වෙ ඛන්ධෙ ච…පෙ… චෙතසිකං එකං ඛන්ධඤ්ච වත්ථුඤ්ච පච්චයා ද්වෙ ඛන්ධා චිත්තඤ්ච, ද්වෙ ඛන්ධෙ ච…පෙ… (පටිසන්ධික්ඛණෙ ද්වෙපි කාතබ්බා). (3)

ආරම්මණපච්චයො

108. චෙතසිකං ධම්මං පච්චයා චෙතසිකො ධම්මො උප්පජ්ජති ආරම්මණපච්චයා… තීණි (පටිච්චසදිසා).

අචෙතසිකං ධම්මං පච්චයා අචෙතසිකො ධම්මො උප්පජ්ජති ආරම්මණපච්චයා – චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා චිත්තං; පටිසන්ධික්ඛණෙ…පෙ…. (1)

අචෙතසිකං ධම්මං පච්චයා චෙතසිකො ධම්මො උප්පජ්ජති ආරම්මණපච්චයා – චක්ඛායතනං පච්චයා චක්ඛුවිඤ්ඤාණසහගතා ඛන්ධා…පෙ… කායායතනං පච්චයා…පෙ… චිත්තං පච්චයා සම්පයුත්තකා ඛන්ධා, වත්ථුං පච්චයා චෙතසිකා ඛන්ධා (පටිසන්ධික්ඛණෙ ද්වෙපි කාතබ්බා). (2)

අචෙතසිකං ධම්මං පච්චයා චෙතසිකො ච අචෙතසිකො ච ධම්මා උප්පජ්ජන්ති ආරම්මණපච්චයා – චක්ඛායතනං පච්චයා චක්ඛුවිඤ්ඤාණං සම්පයුත්තකා ච ඛන්ධා…පෙ… කායායතනං පච්චයා…පෙ… වත්ථුං පච්චයා චිත්තං සම්පයුත්තකා ච ඛන්ධා (පටිසන්ධික්ඛණෙ එකං). (3)

109. චෙතසිකඤ්ච අචෙතසිකඤ්ච ධම්මං පච්චයා චෙතසිකො ධම්මො උප්පජ්ජති ආරම්මණපච්චයා – චක්ඛුවිඤ්ඤාණසහගතං එකං ඛන්ධඤ්ච චක්ඛුවිඤ්ඤාණඤ්ච පච්චයා ද්වෙ ඛන්ධා, ද්වෙ ඛන්ධෙ ච…පෙ… චක්ඛුවිඤ්ඤාණසහගතං එකං ඛන්ධඤ්ච චක්ඛායතනඤ්ච පච්චයා ද්වෙ ඛන්ධා, ද්වෙ ඛන්ධෙ ච…පෙ… කායවිඤ්ඤාණසහගතං…පෙ… චෙතසිකං එකං ඛන්ධඤ්ච චිත්තඤ්ච පච්චයා ද්වෙ ඛන්ධා, ද්වෙ ඛන්ධෙ ච…පෙ… චෙතසිකං එකං ඛන්ධඤ්ච වත්ථුඤ්ච පච්චයා ද්වෙ ඛන්ධා, ද්වෙ ඛන්ධෙ ච…පෙ… (පටිසන්ධික්ඛණෙ ද්වෙ). (1)

චෙතසිකඤ්ච අචෙතසිකඤ්ච ධම්මං පච්චයා අචෙතසිකො ධම්මො උප්පජ්ජති ආරම්මණපච්චයා – චක්ඛුවිඤ්ඤාණසහගතෙ ඛන්ධෙ ච චක්ඛායතනඤ්ච පච්චයා චක්ඛුවිඤ්ඤාණං…පෙ… කායවිඤ්ඤාණසහගතෙ…පෙ… චෙතසිකෙ ඛන්ධෙ ච වත්ථුඤ්ච පච්චයා චිත්තං (පටිසන්ධික්ඛණෙ එකං). (2)

චෙතසිකඤ්ච අචෙතසිකඤ්ච ධම්මං පච්චයා චෙතසිකො ච අචෙතසිකො ච ධම්මා උප්පජ්ජන්ති ආරම්මණපච්චයා – චක්ඛුවිඤ්ඤාණසහගතං එකං ඛන්ධඤ්ච චක්ඛායතනඤ්ච පච්චයා ද්වෙ ඛන්ධා චක්ඛුවිඤ්ඤාණඤ්ච, ද්වෙ ඛන්ධෙ ච…පෙ… චෙතසිකං එකං ඛන්ධඤ්ච වත්ථුඤ්ච පච්චයා ද්වෙ ඛන්ධා චිත්තඤ්ච, ද්වෙ ඛන්ධෙ ච…පෙ… (පටිසන්ධික්ඛණෙ එකං, සංඛිත්තං). (3)