1. විභඞ්ගවාරො

නහෙතුපච්චයො

6. සාරම්මණං ධම්මං පටිච්ච සාරම්මණො ධම්මො උප්පජ්ජති නහෙතුපච්චයා – අහෙතුකං සාරම්මණං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

සාරම්මණං ධම්මං පටිච්ච අනාරම්මණො ධම්මො උප්පජ්ජති නහෙතුපච්චයා – අහෙතුකෙ සාරම්මණෙ ඛන්ධෙ පටිච්ච චිත්තසමුට්ඨානං රූපං; අහෙතුකපටිසන්ධික්ඛණෙ…පෙ…. (2)

සාරම්මණං ධම්මං පටිච්ච සාරම්මණො ච අනාරම්මණො ච ධම්මා උප්පජ්ජන්ති නහෙතුපච්චයා – අහෙතුකං සාරම්මණං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ…. (3)

7. අනාරම්මණං ධම්මං පටිච්ච අනාරම්මණො ධම්මො උප්පජ්ජති නහෙතුපච්චයා – එකං මහාභූතං…පෙ… අසඤ්ඤසත්තානං එකං මහාභූතං…පෙ…. (1)

අනාරම්මණං ධම්මං පටිච්ච සාරම්මණො ධම්මො උප්පජ්ජති නහෙතුපච්චයා – අහෙතුකපටිසන්ධික්ඛණෙ වත්ථුං පටිච්ච සාරම්මණා ඛන්ධා. (2)

අනාරම්මණං ධම්මං පටිච්ච සාරම්මණො ච අනාරම්මණො ච ධම්මා උප්පජ්ජන්ති නහෙතුපච්චයා – අහෙතුකපටිසන්ධික්ඛණෙ වත්ථුං පටිච්ච සාරම්මණා ඛන්ධා, මහාභූතෙ පටිච්ච කටත්තාරූපං. (3)

8. සාරම්මණඤ්ච අනාරම්මණඤ්ච ධම්මං පටිච්ච සාරම්මණො ධම්මො උප්පජ්ජති නහෙතුපච්චයා – අහෙතුකපටිසන්ධික්ඛණෙ සාරම්මණං එකං ඛන්ධඤ්ච වත්ථුඤ්ච පටිච්ච තයො ඛන්ධා…පෙ… ද්වෙ ඛන්ධෙ ච…පෙ…. (1)

සාරම්මණඤ්ච අනාරම්මණඤ්ච ධම්මං පටිච්ච අනාරම්මණො ධම්මො උප්පජ්ජති නහෙතුපච්චයා – අහෙතුකෙ සාරම්මණෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං; අහෙතුකපටිසන්ධික්ඛණෙ…පෙ…. (2)

සාරම්මණඤ්ච අනාරම්මණඤ්ච ධම්මං පටිච්ච සාරම්මණො ච අනාරම්මණො ච ධම්මා උප්පජ්ජන්ති නහෙතුපච්චයා – අහෙතුකපටිසන්ධික්ඛණෙ සාරම්මණං එකං ඛන්ධඤ්ච වත්ථුඤ්ච පටිච්ච තයො ඛන්ධා…පෙ… ද්වෙ ඛන්ධෙ ච…පෙ… සාරම්මණෙ ඛන්ධෙ ච මහාභූතෙ ච පටිච්ච කටත්තාරූපං. (3)

නආරම්මණපච්චයො

9. සාරම්මණං ධම්මං පටිච්ච අනාරම්මණො ධම්මො උප්පජ්ජති නආරම්මණපච්චයා – සාරම්මණෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ…. (1)

අනාරම්මණං ධම්මං පටිච්ච අනාරම්මණො ධම්මො උප්පජ්ජති නආරම්මණපච්චයා (යාව අසඤ්ඤසත්තා). (1)

සාරම්මණඤ්ච අනාරම්මණඤ්ච ධම්මං පටිච්ච අනාරම්මණො ධම්මො උප්පජ්ජති නආරම්මණපච්චයා – සාරම්මණෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං; පටිසන්ධික්ඛණෙ…පෙ… (සංඛිත්තං). (1)