1. විභඞ්ගවාරො

නහෙතුපච්චයො

99. චෙතසිකං ධම්මං පටිච්ච චෙතසිකො ධම්මො උප්පජ්ජති නහෙතුපච්චයා – අහෙතුකං චෙතසිකං එකං ඛන්ධං පටිච්ච ද්වෙ ඛන්ධා, ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

චෙතසිකං ධම්මං පටිච්ච අචෙතසිකො ධම්මො උප්පජ්ජති නහෙතුපච්චයා – අහෙතුකෙ චෙතසිකෙ ඛන්ධෙ පටිච්ච චිත්තඤ්ච චිත්තසමුට්ඨානඤ්ච රූපං; අහෙතුකපටිසන්ධික්ඛණෙ…පෙ…. (2)

චෙතසිකං ධම්මං පටිච්ච චෙතසිකො ච අචෙතසිකො ච ධම්මා උප්පජ්ජන්ති නහෙතුපච්චයා – අහෙතුකං චෙතසිකං එකං ඛන්ධං පටිච්ච ද්වෙ ඛන්ධා චිත්තඤ්ච චිත්තසමුට්ඨානඤ්ච රූපං, ද්වෙ ඛන්ධෙ…පෙ… අහෙතුකපටිසන්ධික්ඛණෙ …පෙ…. (3)

100. අචෙතසිකං ධම්මං පටිච්ච අචෙතසිකො ධම්මො උප්පජ්ජති නහෙතුපච්චයා – අහෙතුකං චිත්තං පටිච්ච චිත්තසමුට්ඨානං රූපං; අහෙතුකපටිසන්ධික්ඛණෙ චිත්තං පටිච්ච කටත්තාරූපං, චිත්තං පටිච්ච වත්ථු, වත්ථුං පටිච්ච චිත්තං, එකං මහාභූතං…පෙ… අසඤ්ඤසත්තානං එකං මහාභූතං…පෙ…. (1)

අචෙතසිකං ධම්මං පටිච්ච චෙතසිකො ධම්මො උප්පජ්ජති නහෙතුපච්චයා – අහෙතුකං චිත්තං පටිච්ච සම්පයුත්තකා ඛන්ධා; අහෙතුකපටිසන්ධික්ඛණෙ චිත්තං පටිච්ච සම්පයුත්තකා ඛන්ධා, අහෙතුකපටිසන්ධික්ඛණෙ වත්ථුං පටිච්ච චෙතසිකා ඛන්ධා, විචිකිච්ඡාසහගතං උද්ධච්චසහගතං චිත්තං පටිච්ච විචිකිච්ඡාසහගතො උද්ධච්චසහගතො මොහො. (2)

අචෙතසිකං ධම්මං පටිච්ච චෙතසිකො ච අචෙතසිකො ච ධම්මා උප්පජ්ජන්ති නහෙතුපච්චයා – අහෙතුකං චිත්තං පටිච්ච සම්පයුත්තකා ඛන්ධා චිත්තසමුට්ඨානඤ්ච රූපං; අහෙතුකපටිසන්ධික්ඛණෙ චිත්තං පටිච්ච සම්පයුත්තකා ඛන්ධා කටත්තා ච රූපං, අහෙතුකපටිසන්ධික්ඛණෙ වත්ථුං පටිච්ච චිත්තඤ්ච සම්පයුත්තකා ච ඛන්ධා. (3)

101. චෙතසිකඤ්ච අචෙතසිකඤ්ච ධම්මං පටිච්ච චෙතසිකො ධම්මො උප්පජ්ජති නහෙතුපච්චයා – අහෙතුකං චෙතසිකං එකං ඛන්ධඤ්ච චිත්තඤ්ච පටිච්ච ද්වෙ ඛන්ධා, ද්වෙ ඛන්ධෙ ච…පෙ… අහෙතුකපටිසන්ධික්ඛණෙ චෙතසිකං එකං ඛන්ධඤ්ච චිත්තඤ්ච පටිච්ච ද්වෙ ඛන්ධා, ද්වෙ ඛන්ධෙ ච…පෙ… අහෙතුකපටිසන්ධික්ඛණෙ චෙතසිකං එකං ඛන්ධඤ්ච වත්ථුඤ්ච පටිච්ච ද්වෙ ඛන්ධා, ද්වෙ ඛන්ධෙ ච…පෙ… විචිකිච්ඡාසහගතෙ උද්ධච්චසහගතෙ ඛන්ධෙ ච චිත්තඤ්ච පටිච්ච විචිකිච්ඡාසහගතො උද්ධච්චසහගතො මොහො. (1)

චෙතසිකඤ්ච අචෙතසිකඤ්ච ධම්මං පටිච්ච අචෙතසිකො ධම්මො උප්පජ්ජති නහෙතුපච්චයා – අහෙතුකෙ චෙතසිකෙ ඛන්ධෙ ච චිත්තඤ්ච පටිච්ච චිත්තසමුට්ඨානං රූපං, අහෙතුකෙ චෙතසිකෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං; අහෙතුකපටිසන්ධික්ඛණෙ චෙතසිකෙ ඛන්ධෙ ච චිත්තඤ්ච පටිච්ච කටත්තාරූපං, අහෙතුකපටිසන්ධික්ඛණෙ චෙතසිකෙ ඛන්ධෙ ච මහාභූතෙ ච පටිච්ච කටත්තාරූපං, අහෙතුකපටිසන්ධික්ඛණෙ චෙතසිකෙ ඛන්ධෙ ච වත්ථුඤ්ච පටිච්ච චිත්තං. (2)

චෙතසිකඤ්ච අචෙතසිකඤ්ච ධම්මං පටිච්ච චෙතසිකො ච අචෙතසිකො ච ධම්මා උප්පජ්ජන්ති නහෙතුපච්චයා – අහෙතුකං චෙතසිකං එකං ඛන්ධඤ්ච චිත්තඤ්ච පටිච්ච ද්වෙ ඛන්ධා චිත්තසමුට්ඨානඤ්ච රූපං; අහෙතුකපටිසන්ධික්ඛණෙ චෙතසිකං එකං ඛන්ධඤ්ච චිත්තඤ්ච පටිච්ච ද්වෙ ඛන්ධා කටත්තා ච රූපං, අහෙතුකපටිසන්ධික්ඛණෙ චෙතසිකං එකං ඛන්ධඤ්ච වත්ථුඤ්ච පටිච්ච ද්වෙ ඛන්ධා චිත්තඤ්ච, ද්වෙ ඛන්ධෙ ච…පෙ…. (3)

නආරම්මණපච්චයො

102. චෙතසිකං ධම්මං පටිච්ච අචෙතසිකො ධම්මො උප්පජ්ජති නආරම්මණපච්චයා – චෙතසිකෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ…. (1)

අචෙතසිකං ධම්මං පටිච්ච අචෙතසිකො ධම්මො උප්පජ්ජති නආරම්මණපච්චයා – චිත්තං පටිච්ච චිත්තසමුට්ඨානං රූපං; පටිසන්ධික්ඛණෙ …පෙ… (යාව අසඤ්ඤසත්තා). (1)

චෙතසිකඤ්ච අචෙතසිකඤ්ච ධම්මං පටිච්ච අචෙතසිකො ධම්මො උප්පජ්ජති නආරම්මණපච්චයා – චෙතසිකෙ ඛන්ධෙ ච චිත්තඤ්ච පටිච්ච චිත්තසමුට්ඨානං රූපං, චෙතසිකෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං (පටිසන්ධික්ඛණෙ ද්වෙපි කාතබ්බා, සංඛිත්තං).