1-4. පච්චයානුලොමාදි

හෙතුපච්චයො

69. චිත්තං ධම්මං සංසට්ඨො නොචිත්තො ධම්මො උප්පජ්ජති හෙතුපච්චයා – චිත්තං සංසට්ඨා සම්පයුත්තකා ඛන්ධා; පටිසන්ධික්ඛණෙ…පෙ…. (1)

නොචිත්තං ධම්මං සංසට්ඨො නොචිත්තො ධම්මො උප්පජ්ජති හෙතුපච්චයා – නොචිත්තං එකං ඛන්ධං සංසට්ඨා ද්වෙ ඛන්ධා, ද්වෙ ඛන්ධෙ සංසට්ඨො එකො ඛන්ධො; පටිසන්ධික්ඛණෙ…පෙ…. (1)

නොචිත්තං ධම්මං සංසට්ඨො චිත්තො ධම්මො උප්පජ්ජති හෙතුපච්චයා – නොචිත්තෙ ඛන්ධෙ සංසට්ඨං චිත්තං; පටිසන්ධික්ඛණෙ…පෙ…. (2)

නොචිත්තං ධම්මං සංසට්ඨො චිත්තො ච නොචිත්තො ච ධම්මා උප්පජ්ජන්ති හෙතුපච්චයා – නොචිත්තං එකං ඛන්ධං සංසට්ඨා ද්වෙ ඛන්ධා චිත්තඤ්ච, ද්වෙ ඛන්ධෙ…පෙ… පටිසන්ධික්ඛණෙ…පෙ…. (3)

චිත්තඤ්ච නොචිත්තඤ්ච ධම්මං සංසට්ඨො නොචිත්තො ධම්මො උප්පජ්ජති හෙතුපච්චයා – නොචිත්තං එකං ඛන්ධඤ්ච චිත්තඤ්ච සංසට්ඨා ද්වෙ ඛන්ධා, ද්වෙ ඛන්ධෙ ච…පෙ… පටිසන්ධික්ඛණෙ…පෙ… (සංඛිත්තං).

හෙතුයා පඤ්ච, ආරම්මණෙ පඤ්ච, අධිපතියා පඤ්ච (සබ්බත්ථ පඤ්ච), අවිගතෙ පඤ්ච (සංඛිත්තං).

නහෙතුයා පඤ්ච, නඅධිපතියා පඤ්ච, නපුරෙජාතෙ පඤ්ච, නපච්ඡාජාතෙ පඤ්ච, නආසෙවනෙ පඤ්ච, නකම්මෙ තීණි, නවිපාකෙ පඤ්ච, නඣානෙ පඤ්ච, නමග්ගෙ පඤ්ච, නවිප්පයුත්තෙ පඤ්ච.