1. විභඞ්ගවාරො

නහෙතුපච්චයො

64. චිත්තං ධම්මං පච්චයා නොචිත්තො ධම්මො උප්පජ්ජති නහෙතුපච්චයා – අහෙතුකං චිත්තං පච්චයා සම්පයුත්තකා ඛන්ධා චිත්තසමුට්ඨානඤ්ච රූපං; අහෙතුකපටිසන්ධික්ඛණෙ…පෙ… විචිකිච්ඡාසහගතං උද්ධච්චසහගතං චිත්තං පච්චයා විචිකිච්ඡාසහගතො උද්ධච්චසහගතො මොහො. (1)

65. නොචිත්තං ධම්මං පච්චයා නොචිත්තො ධම්මො උප්පජ්ජති නහෙතුපච්චයා – අහෙතුකං නොචිත්තං එකං ඛන්ධං පච්චයා ද්වෙ ඛන්ධා චිත්තසමුට්ඨානඤ්ච රූපං, ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… (යාව අසඤ්ඤසත්තා), චක්ඛායතනං පච්චයා චක්ඛුවිඤ්ඤාණසහගතා ඛන්ධා…පෙ… කායායතනං පච්චයා කායවිඤ්ඤාණසහගතා ඛන්ධා, වත්ථුං පච්චයා අහෙතුකා නොචිත්තෙ ඛන්ධා විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො උද්ධච්චසහගතො මොහො. (1)

නොචිත්තං ධම්මං පච්චයා චිත්තො ධම්මො උප්පජ්ජති නහෙතුපච්චයා – අහෙතුකෙ නොචිත්තෙ ඛන්ධෙ පච්චයා චිත්තං, වත්ථුං පච්චයා චිත්තං; අහෙතුකපටිසන්ධික්ඛණෙ…පෙ… අහෙතුකපටිසන්ධික්ඛණෙ වත්ථුං පච්චයා චිත්තං, චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං. (2)

නොචිත්තං ධම්මං පච්චයා චිත්තො ච නොචිත්තො ච ධම්මා උප්පජ්ජන්ති නහෙතුපච්චයා – අහෙතුකං නොචිත්තං එකං ඛන්ධං පච්චයා ද්වෙ ඛන්ධා චිත්තඤ්ච චිත්තසමුට්ඨානඤ්ච රූපං, ද්වෙ ඛන්ධෙ…පෙ… වත්ථුං පච්චයා චිත්තඤ්ච සම්පයුත්තකා ච ඛන්ධා; අහෙතුකපටිසන්ධික්ඛණෙ…පෙ… අහෙතුකපටිසන්ධික්ඛණෙ වත්ථුං පච්චයා චිත්තඤ්ච සම්පයුත්තකා ච ඛන්ධා, චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං. (3)

චිත්තඤ්ච නොචිත්තඤ්ච ධම්මං පච්චයා නොචිත්තො ධම්මො උප්පජ්ජති නහෙතුපච්චයා – අහෙතුකං නොචිත්තං එකං ඛන්ධඤ්ච චිත්තඤ්ච පච්චයා ද්වෙ ඛන්ධා චිත්තසමුට්ඨානඤ්ච රූපං, ද්වෙ ඛන්ධෙ ච…පෙ… චිත්තඤ්ච වත්ථුඤ්ච පච්චයා නොචිත්තා ඛන්ධා; අහෙතුකපටිසන්ධික්ඛණෙ…පෙ… අහෙතුකපටිසන්ධික්ඛණෙ චිත්තඤ්ච වත්ථුඤ්ච පච්චයා නොචිත්තා ඛන්ධා, චක්ඛායතනඤ්ච චක්ඛුවිඤ්ඤාණඤ්ච පච්චයා චක්ඛුවිඤ්ඤාණසහගතා ඛන්ධා…පෙ… කායායතනං ච…පෙ… විචිකිච්ඡාසහගතෙ උද්ධච්චසහගතෙ ඛන්ධෙ ච චිත්තඤ්ච පච්චයා විචිකිච්ඡාසහගතො උද්ධච්චසහගතො මොහො. (1) (සංඛිත්තං.)