1. විභඞ්ගවාරො

හෙතුපච්චයො

61. චිත්තං ධම්මං පච්චයා නොචිත්තො ධම්මො උප්පජ්ජති හෙතුපච්චයා – චිත්තං පච්චයා සම්පයුත්තකා ඛන්ධා චිත්තසමුට්ඨානඤ්ච රූපං; පටිසන්ධික්ඛණෙ…පෙ…. (1)

නොචිත්තං ධම්මං පච්චයා නොචිත්තො ධම්මො උප්පජ්ජති හෙතුපච්චයා – නොචිත්තං එකං ඛන්ධං පච්චයා ද්වෙ ඛන්ධා චිත්තසමුට්ඨානඤ්ච රූපං, ද්වෙ ඛන්ධෙ…පෙ… පටිසන්ධික්ඛණෙ…පෙ… (යාව මහාභූතා), වත්ථුං පච්චයා නොචිත්තා ඛන්ධා. (1)

නොචිත්තං ධම්මං පච්චයා චිත්තො ධම්මො උප්පජ්ජති හෙතුපච්චයා – නොචිත්තෙ ඛන්ධෙ පච්චයා චිත්තං, වත්ථුං පච්චයා චිත්තං; පටිසන්ධික්ඛණෙ නොචිත්තෙ ඛන්ධෙ පච්චයා චිත්තං, පටිසන්ධික්ඛණෙ වත්ථුං පච්චයා චිත්තං. (2)

නොචිත්තං ධම්මං පච්චයා චිත්තො ච නොචිත්තො ච ධම්මා උප්පජ්ජන්ති හෙතුපච්චයා – නොචිත්තං එකං ඛන්ධං පච්චයා ද්වෙ ඛන්ධා චිත්තඤ්ච චිත්තසමුට්ඨානඤ්ච රූපං, ද්වෙ ඛන්ධෙ…පෙ… වත්ථුං පච්චයා චිත්තඤ්ච සම්පයුත්තකා ච ඛන්ධා; පටිසන්ධික්ඛණෙ නොචිත්තං එකං ඛන්ධං පච්චයා ද්වෙ ඛන්ධා චිත්තඤ්ච කටත්තා ච රූපං, ද්වෙ ඛන්ධෙ…පෙ… පටිසන්ධික්ඛණෙ වත්ථුං පච්චයා චිත්තඤ්ච සම්පයුත්තකා ච ඛන්ධා. (3)

චිත්තඤ්ච නොචිත්තඤ්ච ධම්මං පච්චයා නොචිත්තො ධම්මො උප්පජ්ජති හෙතුපච්චයා – නොචිත්තං එකං ඛන්ධඤ්ච චිත්තඤ්ච පච්චයා ද්වෙ ඛන්ධා චිත්තසමුට්ඨානඤ්ච රූපං, ද්වෙ ඛන්ධෙ ච…පෙ… චිත්තඤ්ච මහාභූතෙ ච පච්චයා චිත්තසමුට්ඨානං රූපං, චිත්තඤ්ච වත්ථුඤ්ච පච්චයා නොචිත්තා ඛන්ධා, පටිසන්ධික්ඛණෙ නොචිත්තං එකං ඛන්ධඤ්ච චිත්තඤ්ච පච්චයා ද්වෙ ඛන්ධා කටත්තා ච රූපං, ද්වෙ ඛන්ධෙ ච…පෙ… පටිසන්ධික්ඛණෙ චිත්තඤ්ච මහාභූතෙ ච පච්චයා කටත්තාරූපං; පටිසන්ධික්ඛණෙ චිත්තඤ්ච වත්ථුඤ්ච පච්චයා නොචිත්තා ඛන්ධා. (1)

ආරම්මණපච්චයො

62. චිත්තං ධම්මං පච්චයා නොචිත්තො ධම්මො උප්පජ්ජති ආරම්මණපච්චයා… එකං (පටිච්චවාරසදිසං).

නොචිත්තං ධම්මං පච්චයා නොචිත්තො ධම්මො උප්පජ්ජති ආරම්මණපච්චයා – නොචිත්තං එකං ඛන්ධං පච්චයා ද්වෙ ඛන්ධා, ද්වෙ ඛන්ධෙ…පෙ… පටිසන්ධික්ඛණෙ…පෙ… පටිසන්ධික්ඛණෙ වත්ථුං පච්චයා ඛන්ධා, චක්ඛායතනං පච්චයා චක්ඛුවිඤ්ඤාණසහගතා ඛන්ධා…පෙ… කායායතනං පච්චයා කායවිඤ්ඤාණසහගතා ඛන්ධා, වත්ථුං පච්චයා නොචිත්තා ඛන්ධා. (1)

නොචිත්තං ධම්මං පච්චයා චිත්තො ධම්මො උප්පජ්ජති ආරම්මණපච්චයා – නොචිත්තෙ ඛන්ධෙ පච්චයා චිත්තං, වත්ථුං පච්චයා චිත්තං; පටිසන්ධික්ඛණෙ නොචිත්තෙ ඛන්ධෙ පච්චයා චිත්තං, පටිසන්ධික්ඛණෙ වත්ථුං පච්චයා චිත්තං, චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං. (2)

නොචිත්තං ධම්මං පච්චයා චිත්තො ච නොචිත්තො ච ධම්මා උප්පජ්ජන්ති ආරම්මණපච්චයා – නොචිත්තං එකං ඛන්ධං පච්චයා ද්වෙ ඛන්ධා චිත්තඤ්ච, ද්වෙ ඛන්ධෙ…පෙ… වත්ථුං පච්චයා චිත්තඤ්ච සම්පයුත්තකා ච ඛන්ධා; පටිසන්ධික්ඛණෙ…පෙ… පටිසන්ධික්ඛණෙ වත්ථුං පච්චයා චිත්තඤ්ච සම්පයුත්තකා ච ඛන්ධා, චක්ඛායතනං පච්චයා චක්ඛුවිඤ්ඤාණං සම්පයුත්තකා ච ඛන්ධා…පෙ… කායායතනං පච්චයා කායවිඤ්ඤාණං සම්පයුත්තකා ච ඛන්ධා. (3)

චිත්තඤ්ච නොචිත්තඤ්ච ධම්මං පච්චයා නොචිත්තො ධම්මො උප්පජ්ජති ආරම්මණපච්චයා – නොචිත්තං එකං ඛන්ධඤ්ච චිත්තඤ්ච පච්චයා ද්වෙ ඛන්ධා, ද්වෙ ඛන්ධෙ ච…පෙ… චිත්තඤ්ච වත්ථුඤ්ච පච්චයා නොචිත්තා ඛන්ධා, පටිසන්ධික්ඛණෙ…පෙ… පටිසන්ධික්ඛණෙ චිත්තඤ්ච වත්ථුඤ්ච පච්චයා නොචිත්තා ඛන්ධා, චක්ඛායතනඤ්ච චක්ඛුවිඤ්ඤාණඤ්ච පච්චයා චක්ඛුවිඤ්ඤාණසහගතා ඛන්ධා…පෙ… කායායතනං ච…පෙ… (සංඛිත්තං). (1)