1. විභඞ්ගවාරො

නහෙතුපච්චයො

53. චිත්තං ධම්මං පටිච්ච නොචිත්තො ධම්මො උප්පජ්ජති නහෙතුපච්චයා – අහෙතුකං චිත්තං පටිච්ච සම්පයුත්තකා ඛන්ධා චිත්තසමුට්ඨානඤ්ච රූපං; අහෙතුකපටිසන්ධික්ඛණෙ චිත්තං…පෙ… විචිකිච්ඡාසහගතං උද්ධච්චසහගතං චිත්තං පටිච්ච විචිකිච්ඡාසහගතො උද්ධච්චසහගතො මොහො. (1)

නොචිත්තං ධම්මං පටිච්ච නොචිත්තො ධම්මො උප්පජ්ජති නහෙතුපච්චයා – අහෙතුකං නොචිත්තං එකං ඛන්ධං පටිච්ච ද්වෙ ඛන්ධා චිත්තසමුට්ඨානඤ්ච රූපං, ද්වෙ ඛන්ධෙ…පෙ… අහෙතුකපටිසන්ධික්ඛණෙ …පෙ… (යාව අසඤ්ඤසත්තා) විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

නොචිත්තං ධම්මං පටිච්ච චිත්තො ධම්මො උප්පජ්ජති නහෙතුපච්චයා – අහෙතුකෙ නොචිත්තෙ ඛන්ධෙ පටිච්ච චිත්තං; අහෙතුකපටිසන්ධික්ඛණෙ නොචිත්තෙ ඛන්ධෙ පටිච්ච චිත්තං; අහෙතුකපටිසන්ධික්ඛණෙ වත්ථුං පටිච්ච චිත්තං. (2)

නොචිත්තං ධම්මං පටිච්ච චිත්තො ච නොචිත්තො ච ධම්මා උප්පජ්ජන්ති නහෙතුපච්චයා – අහෙතුකං නොචිත්තං එකං ඛන්ධං පටිච්ච ද්වෙ ඛන්ධා චිත්තඤ්ච චිත්තසමුට්ඨානඤ්ච රූපං, ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… අහෙතුකපටිසන්ධික්ඛණෙ වත්ථුං පටිච්ච චිත්තඤ්ච සම්පයුත්තකා ච ඛන්ධා. (3)

චිත්තඤ්ච නොචිත්තඤ්ච ධම්මං පටිච්ච නොචිත්තො ධම්මො උප්පජ්ජති නහෙතුපච්චයා – අහෙතුකං නොචිත්තං එකං ඛන්ධඤ්ච චිත්තඤ්ච පටිච්ච ද්වෙ ඛන්ධා චිත්තසමුට්ඨානඤ්ච රූපං, ද්වෙ ඛන්ධෙ ච…පෙ… අහෙතුකපටිසන්ධික්ඛණෙ නොචිත්තං එකං ඛන්ධඤ්ච චිත්තඤ්ච පටිච්ච ද්වෙ ඛන්ධා කටත්තා ච රූපං, ද්වෙ ඛන්ධෙ ච…පෙ… අහෙතුකපටිසන්ධික්ඛණෙ චිත්තඤ්ච වත්ථුඤ්ච පටිච්ච නොචිත්තා ඛන්ධා, විචිකිච්ඡාසහගතං උද්ධච්චසහගතං චිත්තඤ්ච සම්පයුත්තකෙ ච ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

නආරම්මණපච්චයො

54. චිත්තං ධම්මං පටිච්ච නොචිත්තො ධම්මො උප්පජ්ජති නආරම්මණපච්චයා – චිත්තං පටිච්ච චිත්තසමුට්ඨානං රූපං; පටිසන්ධික්ඛණෙ…පෙ…. (1)

නොචිත්තං ධම්මං පටිච්ච නොචිත්තො ධම්මො උප්පජ්ජති නආරම්මණපච්චයා – නොචිත්තෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ… (යාව අසඤ්ඤසත්තා). (2)

චිත්තඤ්ච නොචිත්තඤ්ච ධම්මං පටිච්ච නොචිත්තො ධම්මො උප්පජ්ජති නආරම්මණපච්චයා – චිත්තඤ්ච සම්පයුත්තකෙ ච ඛන්ධෙ පටිච්ච චිත්තසමුට්ඨානං රූපං, චිත්තඤ්ච මහාභූතෙ ච පටිච්ච චිත්තසමුට්ඨානං රූපං; පටිසන්ධික්ඛණෙ චිත්තඤ්ච සම්පයුත්තකෙ ච ඛන්ධෙ පටිච්ච කටත්තාරූපං, චිත්තඤ්ච මහාභූතෙ ච පටිච්ච කටත්තාරූපං. (1)

නඅධිපතිපච්චයාදි

55. චිත්තං ධම්මං පටිච්ච නොචිත්තො ධම්මො උප්පජ්ජති නඅධිපතිපච්චයා … පඤ්ච… නඅනන්තරපච්චයා…පෙ… නඋපනිස්සයපච්චයා… තීණි.

නපුරෙජාතපච්චයාදි

56. චිත්තං ධම්මං පටිච්ච නොචිත්තො ධම්මො උප්පජ්ජති නපුරෙජාතපච්චයා – අරූපෙ චිත්තං පටිච්ච සම්පයුත්තකා ඛන්ධා, චිත්තං පටිච්ච චිත්තසමුට්ඨානං රූපං; පටිසන්ධික්ඛණෙ චිත්තං පටිච්ච සම්පයුත්තකා ඛන්ධා කටත්තා ච රූපං. (1)

නොචිත්තං ධම්මං පටිච්ච නොචිත්තො ධම්මො උප්පජ්ජති නපුරෙජාතපච්චයා – අරූපෙ නොචිත්තං එකං ඛන්ධං පටිච්ච ද්වෙ ඛන්ධා, ද්වෙ ඛන්ධෙ…පෙ… නොචිත්තෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ… (යාව අසඤ්ඤසත්තා). (1)

නොචිත්තං ධම්මං පටිච්ච චිත්තො ධම්මො උප්පජ්ජති නපුරෙජාතපච්චයා – අරූපෙ නොචිත්තෙ ඛන්ධෙ පටිච්ච චිත්තං; පටිසන්ධික්ඛණෙ… වත්ථුං පටිච්ච චිත්තං. (2)

නොචිත්තං ධම්මං පටිච්ච චිත්තො ච නොචිත්තො ච ධම්මා උප්පජ්ජන්ති නපුරෙජාතපච්චයා – අරූපෙ නොචිත්තං එකං ඛන්ධං පටිච්ච ද්වෙ ඛන්ධා චිත්තඤ්ච, ද්වෙ ඛන්ධෙ…පෙ… පටිසන්ධික්ඛණෙ වත්ථුං පටිච්ච චිත්තඤ්ච සම්පයුත්තකා ච ඛන්ධා. (3)

චිත්තඤ්ච නොචිත්තඤ්ච ධම්මං පටිච්ච නොචිත්තො ධම්මො උප්පජ්ජති නපුරෙජාතපච්චයා – අරූපෙ නොචිත්තං එකං ඛන්ධඤ්ච චිත්තඤ්ච පටිච්ච ද්වෙ ඛන්ධා, ද්වෙ ඛන්ධෙ ච…පෙ… නොචිත්තෙ ඛන්ධෙ ච චිත්තඤ්ච පටිච්ච චිත්තසමුට්ඨානං රූපං, චිත්තඤ්ච මහාභූතෙ ච පටිච්ච චිත්තසමුට්ඨානං රූපං; පටිසන්ධික්ඛණෙ චිත්තඤ්ච වත්ථුඤ්ච පටිච්ච නොචිත්තා ඛන්ධා; පටිසන්ධික්ඛණෙ චිත්තඤ්ච සම්පයුත්තකෙ ච ඛන්ධෙ පටිච්ච කටත්තාරූපං, චිත්තඤ්ච මහාභූතෙ ච පටිච්ච කටත්තාරූපං. (1)

නපච්ඡාජාතපච්චයා… නආසෙවනපච්චයා….

නකම්මපච්චයො

57. චිත්තං ධම්මං පටිච්ච නොචිත්තො ධම්මො උප්පජ්ජති නකම්මපච්චයා – චිත්තං පටිච්ච සම්පයුත්තකා චෙතනා. (1)

නොචිත්තං ධම්මං පටිච්ච නොචිත්තො ධම්මො උප්පජ්ජති නකම්මපච්චයා – නොචිත්තෙ ඛන්ධෙ පටිච්ච සම්පයුත්තකා චෙතනා; බාහිරං… ආහාරසමුට්ඨානං… උතුසමුට්ඨානං…පෙ…. (1)

චිත්තඤ්ච නොචිත්තඤ්ච ධම්මං පටිච්ච නොචිත්තො ධම්මො උප්පජ්ජති නකම්මපච්චයා – නොචිත්තෙ ඛන්ධෙ ච චිත්තඤ්ච පටිච්ච සම්පයුත්තකා චෙතනා (සංඛිත්තං). (1)