1. විභඞ්ගවාරො

හෙතුපච්චයො

50. චිත්තං ධම්මං පටිච්ච නොචිත්තො ධම්මො උප්පජ්ජති හෙතුපච්චයා – චිත්තං පටිච්ච සම්පයුත්තකා ඛන්ධා චිත්තසමුට්ඨානඤ්ච රූපං; පටිසන්ධික්ඛණෙ චිත්තං පටිච්ච සම්පයුත්තකා ඛන්ධා කටත්තා ච රූපං. (1)

නොචිත්තං ධම්මං පටිච්ච නොචිත්තො ධම්මො උප්පජ්ජති හෙතුපච්චයා – නොචිත්තං එකං ඛන්ධං පටිච්ච ද්වෙ ඛන්ධා චිත්තසමුට්ඨානඤ්ච රූපං, ද්වෙ ඛන්ධෙ පටිච්ච එකො ඛන්ධො චිත්තසමුට්ඨානඤ්ච රූපං; පටිසන්ධික්ඛණෙ…පෙ… ඛන්ධෙ පටිච්ච වත්ථු, වත්ථුං පටිච්ච ඛන්ධා, එකං මහාභූතං පටිච්ච…පෙ…. (1)

නොචිත්තං ධම්මං පටිච්ච චිත්තො ධම්මො උප්පජ්ජති හෙතුපච්චයා – නොචිත්තෙ ඛන්ධෙ පටිච්ච චිත්තං; පටිසන්ධික්ඛණෙ නොචිත්තෙ ඛන්ධෙ පටිච්ච චිත්තං; පටිසන්ධික්ඛණෙ වත්ථුං පටිච්ච චිත්තං. (2)

නොචිත්තං ධම්මං පටිච්ච චිත්තො ච නොචිත්තො ච ධම්මා උප්පජ්ජන්ති හෙතුපච්චයා – නොචිත්තං එකං ඛන්ධං පටිච්ච ද්වෙ ඛන්ධා චිත්තඤ්ච චිත්තසමුට්ඨානඤ්ච රූපං, ද්වෙ ඛන්ධෙ…පෙ… පටිසන්ධික්ඛණෙ නොචිත්තං එකං ඛන්ධං පටිච්ච ද්වෙ ඛන්ධා චිත්තඤ්ච කටත්තා ච රූපං, ද්වෙ ඛන්ධෙ පටිච්ච එකො ඛන්ධො චිත්තඤ්ච කටත්තා ච රූපං; පටිසන්ධික්ඛණෙ වත්ථුං පටිච්ච චිත්තඤ්ච සම්පයුත්තකා ච ඛන්ධා. (3)

චිත්තඤ්ච නොචිත්තඤ්ච ධම්මං පටිච්ච නොචිත්තො ධම්මො උප්පජ්ජති හෙතුපච්චයා – නොචිත්තං එකං ඛන්ධඤ්ච චිත්තඤ්ච පටිච්ච ද්වෙ ඛන්ධා චිත්තසමුට්ඨානඤ්ච රූපං, ද්වෙ ඛන්ධෙ ච…පෙ… චිත්තඤ්ච මහාභූතෙ ච පටිච්ච චිත්තසමුට්ඨානං රූපං; පටිසන්ධික්ඛණෙ නොචිත්තං එකං ඛන්ධඤ්ච චිත්තඤ්ච පටිච්ච ද්වෙ ඛන්ධා කටත්තා ච රූපං, ද්වෙ ඛන්ධෙ…පෙ… පටිසන්ධික්ඛණෙ චිත්තඤ්ච වත්ථුඤ්ච පටිච්ච නොචිත්තා ඛන්ධා; පටිසන්ධික්ඛණෙ චිත්තඤ්ච මහාභූතෙ ච පටිච්ච කටත්තාරූපං. (1)

ආරම්මණපච්චයො

51. චිත්තං ධම්මං පටිච්ච නොචිත්තො ධම්මො උප්පජ්ජති ආරම්මණපච්චයා – චිත්තං පටිච්ච සම්පයුත්තකා ඛන්ධා; පටිසන්ධික්ඛණෙ…පෙ…. (1)

නොචිත්තං ධම්මං පටිච්ච නොචිත්තො ධම්මො උප්පජ්ජති ආරම්මණපච්චයා – නොචිත්තං එකං ඛන්ධං පටිච්ච ද්වෙ ඛන්ධා, ද්වෙ ඛන්ධෙ…පෙ… පටිසන්ධික්ඛණෙ…පෙ… පටිසන්ධික්ඛණෙ වත්ථුං පටිච්ච ඛන්ධා. (1)

නොචිත්තං ධම්මං පටිච්ච චිත්තො ධම්මො උප්පජ්ජති ආරම්මණපච්චයා – නොචිත්තෙ ඛන්ධෙ පටිච්ච චිත්තං; පටිසන්ධික්ඛණෙ නොචිත්තෙ ඛන්ධෙ පටිච්ච චිත්තං; පටිසන්ධික්ඛණෙ වත්ථුං පටිච්ච චිත්තං. (2)

නොචිත්තං ධම්මං පටිච්ච චිත්තො ච නොචිත්තො ච ධම්මා උප්පජ්ජන්ති ආරම්මණපච්චයා – නොචිත්තං එකං ඛන්ධං පටිච්ච ද්වෙ ඛන්ධා චිත්තඤ්ච, ද්වෙ ඛන්ධෙ පටිච්ච…පෙ… පටිසන්ධික්ඛණෙ නොචිත්තං එකං ඛන්ධං පටිච්ච ද්වෙ ඛන්ධා චිත්තඤ්ච, ද්වෙ ඛන්ධෙ…පෙ… පටිසන්ධික්ඛණෙ වත්ථුං පටිච්ච චිත්තඤ්ච සම්පයුත්තකා ච ඛන්ධා. (3)

චිත්තඤ්ච නොචිත්තඤ්ච ධම්මං පටිච්ච නොචිත්තො ධම්මො උප්පජ්ජති ආරම්මණපච්චයා – නොචිත්තං එකං ඛන්ධඤ්ච චිත්තඤ්ච පටිච්ච ද්වෙ ඛන්ධා, ද්වෙ ඛන්ධෙ ච…පෙ… පටිසන්ධික්ඛණෙ…පෙ… පටිසන්ධික්ඛණෙ චිත්තඤ්ච වත්ථුඤ්ච පටිච්ච නොචිත්තා ඛන්ධා. (1) (සංඛිත්තං).