1. විභඞ්ගවාරො

හෙතුපච්චයො

1. සාරම්මණං ධම්මං පටිච්ච සාරම්මණො ධම්මො උප්පජ්ජති හෙතුපච්චයා – සාරම්මණං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (1)

සාරම්මණං ධම්මං පටිච්ච අනාරම්මණො ධම්මො උප්පජ්ජති හෙතුපච්චයා – සාරම්මණෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ…. (2)

සාරම්මණං ධම්මං පටිච්ච සාරම්මණො ච අනාරම්මණො ච ධම්මා උප්පජ්ජන්ති හෙතුපච්චයා – සාරම්මණං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (3)

2. අනාරම්මණං ධම්මං පටිච්ච අනාරම්මණො ධම්මො උප්පජ්ජති හෙතුපච්චයා – එකං මහාභූතං…පෙ… මහාභූතෙ පටිච්ච චිත්තසමුට්ඨානං රූපං කටත්තාරූපං උපාදාරූපං. (1)

අනාරම්මණං ධම්මං පටිච්ච සාරම්මණො ධම්මො උප්පජ්ජති හෙතුපච්චයා – පටිසන්ධික්ඛණෙ වත්ථුං පටිච්ච සාරම්මණා ඛන්ධා. (2)

අනාරම්මණං ධම්මං පටිච්ච සාරම්මණො ච අනාරම්මණො ච ධම්මො උප්පජ්ජන්ති හෙතුපච්චයා – පටිසන්ධික්ඛණෙ වත්ථුං පටිච්ච සාරම්මණා ඛන්ධා, මහාභූතෙ පටිච්ච කටත්තාරූපං. (3)

3. සාරම්මණඤ්ච අනාරම්මණඤ්ච ධම්මං පටිච්ච සාරම්මණො ධම්මො උප්පජ්ජති හෙතුපච්චයා – පටිසන්ධික්ඛණෙ සාරම්මණං එකං ඛන්ධඤ්ච වත්ථුඤ්ච පටිච්ච තයො ඛන්ධා…පෙ… ද්වෙ ඛන්ධෙ ච…පෙ…. (1)

සාරම්මණඤ්ච අනාරම්මණඤ්ච ධම්මං පටිච්ච අනාරම්මණො ධම්මො උප්පජ්ජති හෙතුපච්චයා – සාරම්මණෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං; පටිසන්ධික්ඛණෙ…පෙ…. (2)

සාරම්මණඤ්ච අනාරම්මණඤ්ච ධම්මං පටිච්ච සාරම්මණො ච අනාරම්මණො ච ධම්මා උප්පජ්ජන්ති හෙතුපච්චයා – පටිසන්ධික්ඛණෙ සාරම්මණං එකං ඛන්ධඤ්ච වත්ථුඤ්ච පටිච්ච තයො ඛන්ධා…පෙ… ද්වෙ ඛන්ධෙ ච…පෙ… සාරම්මණෙ ඛන්ධෙ ච මහාභූතෙ ච පටිච්ච කටත්තාරූපං. (3)

ආරම්මණපච්චයො

4. සාරම්මණං ධම්මං පටිච්ච සාරම්මණො ධම්මො උප්පජ්ජති ආරම්මණපච්චයා – සාරම්මණං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ….

අනාරම්මණං ධම්මං පටිච්ච සාරම්මණො ධම්මො උප්පජ්ජති ආරම්මණපච්චයා – පටිසන්ධික්ඛණෙ වත්ථුං පටිච්ච සාරම්මණා ඛන්ධා.

සාරම්මණඤ්ච අනාරම්මණඤ්ච ධම්මං පටිච්ච සාරම්මණො ධම්මො උප්පජ්ජති ආරම්මණපච්චයා – පටිසන්ධික්ඛණෙ සාරම්මණං එකං ඛන්ධඤ්ච වත්ථුඤ්ච පටිච්ච තයො ඛන්ධා…පෙ… ද්වෙ ඛන්ධෙ ච…පෙ… (සංඛිත්තං).