1. විභඞ්ගවාරො

නහෙතුපච්චයො

438. උපාදින්නං ධම්මං පච්චයා උපාදින්නො ධම්මො උප්පජ්ජති නහෙතුපච්චයා – අහෙතුකං උපාදින්නං එකං ඛන්ධං පච්චයා තයො ඛන්ධා…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… ඛන්ධෙ පච්චයා වත්ථු, වත්ථුං පච්චයා ඛන්ධා, එකං මහාභූතං…පෙ… මහාභූතෙ පච්චයා කටත්තාරූපං උපාදාරූපං, අසඤ්ඤසත්තානං එකං මහාභූතං…පෙ… චක්ඛායතනං පච්චයා චක්ඛුවිඤ්ඤාණං…පෙ… කායායතනං…පෙ… වත්ථුං පච්චයා අහෙතුකා උපාදින්නා ඛන්ධා. (1)

උපාදින්නං ධම්මං පච්චයා අනුපාදින්නො ධම්මො උප්පජ්ජති නහෙතුපච්චයා – අහෙතුකෙ උපාදින්නෙ ඛන්ධෙ පච්චයා චිත්තසමුට්ඨානං රූපං, වත්ථුං පච්චයා අහෙතුකා අනුපාදින්නා ඛන්ධා, වත්ථුං පච්චයා විචිකිච්ඡාසහගතො උද්ධච්චසහගතො මොහො. (2)

උපාදින්නං ධම්මං පච්චයා උපාදින්නො ච අනුපාදින්නො ච ධම්මා උප්පජ්ජන්ති නහෙතුපච්චයා – අහෙතුකං උපාදින්නං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ…. (3)

439. අනුපාදින්නං ධම්මං පච්චයා අනුපාදින්නො ධම්මො උප්පජ්ජති නහෙතුපච්චයා – අහෙතුකං අනුපාදින්නං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… එකං මහාභූතං…පෙ… බාහිරං… ආහාරසමුට්ඨානං… උතුසමුට්ඨානං…පෙ… විචිකිච්ඡාසහගතෙ උද්ධච්චසහගතෙ ඛන්ධෙ පච්චයා විචිකිච්ඡාසහගතො උද්ධච්චසහගතො මොහො. (1)

උපාදින්නඤ්ච අනුපාදින්නඤ්ච ධම්මං පච්චයා අනුපාදින්නො ධම්මො උප්පජ්ජති නහෙතුපච්චයා – අහෙතුකෙ උපාදින්නෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං, අහෙතුකං අනුපාදින්නං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ… විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො උද්ධච්චසහගතො මොහො. (1) (සංඛිත්තං.)