1. විභඞ්ගවාරො

හෙතුපච්චයො

416. උපාදින්නං ධම්මං පටිච්ච උපාදින්නො ධම්මො උප්පජ්ජති හෙතුපච්චයා – උපාදින්නං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ උපාදින්නං එකං ඛන්ධං පටිච්ච තයො ඛන්ධා කටත්තා ච රූපං…පෙ… ද්වෙ ඛන්ධෙ…පෙ… ඛන්ධෙ පටිච්ච වත්ථු, වත්ථුං පටිච්ච ඛන්ධා, එකං මහාභූතං…පෙ… මහාභූතෙ පටිච්ච කටත්තාරූපං උපාදාරූපං. (1)

උපාදින්නං ධම්මං පටිච්ච අනුපාදින්නො ධම්මො උප්පජ්ජති හෙතුපච්චයා – උපාදින්නෙ ඛන්ධෙ පටිච්ච චිත්තසමුට්ඨානං රූපං. (2)

උපාදින්නං ධම්මං පටිච්ච උපාදින්නො ච අනුපාදින්නො ච ධම්මා උප්පජ්ජන්ති හෙතුපච්චයා – උපාදින්නං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ…. (3)

අනුපාදින්නං ධම්මං පටිච්ච අනුපාදින්නො ධම්මො උප්පජ්ජති හෙතුපච්චයා – අනුපාදින්නං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… එකං මහාභූතං පටිච්ච…පෙ… මහාභූතෙ පටිච්ච චිත්තසමුට්ඨානං රූපං උපාදාරූපං. (1)

උපාදින්නඤ්ච අනුපාදින්නඤ්ච ධම්මං පටිච්ච අනුපාදින්නො ධම්මො උප්පජ්ජති හෙතුපච්චයා – උපාදින්නෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං. (1)

ආරම්මණපච්චයො

417. උපාදින්නං ධම්මං පටිච්ච උපාදින්නො ධම්මො උප්පජ්ජති ආරම්මණපච්චයා – උපාදින්නං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… වත්ථුං පටිච්ච ඛන්ධා. (1)

අනුපාදින්නං ධම්මං පටිච්ච අනුපාදින්නො ධම්මො උප්පජ්ජති ආරම්මණපච්චයා – අනුපාදින්නං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ…. (1)

අධිපතිපච්චයො

418. අනුපාදින්නං ධම්මං පටිච්ච අනුපාදින්නො ධම්මො උප්පජ්ජති අධිපතිපච්චයා – අනුපාදින්නං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… එකං මහාභූතං පටිච්ච…පෙ… මහාභූතෙ පටිච්ච චිත්තසමුට්ඨානං රූපං උපාදාරූපං (සංඛිත්තං).