1. විභඞ්ගවාරො

නහෙතුපච්චයාදි

389. උපාදා ධම්මං පච්චයා නොඋපාදා ධම්මො උප්පජ්ජති නහෙතුපච්චයා – චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා අහෙතුකා නොඋපාදා ඛන්ධා; අහෙතුකපටිසන්ධික්ඛණෙ…පෙ… වත්ථුං පච්චයා විචිකිච්ඡාසහගතො උද්ධච්චසහගතො මොහො. (1)

නොඋපාදා ධම්මං පච්චයා නොඋපාදා ධම්මො උප්පජ්ජති නහෙතුපච්චයා – අහෙතුකං නොඋපාදා එකං ඛන්ධං පච්චයා තයො ඛන්ධා නොඋපාදා ච චිත්තසමුට්ඨානං රූපං…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… එකං මහාභූතං…පෙ… (යාව අසඤ්ඤසත්තා) විචිකිච්ඡාසහගතෙ උද්ධච්චසහගතෙ ඛන්ධෙ පච්චයා විචිකිච්ඡාසහගතො උද්ධච්චසහගතො මොහො (තීණිපි පටිච්චසදිසා, නින්නානාකරණා). (3)

උපාදා ච නොඋපාදා ච ධම්මං පච්චයා නොඋපාදා ධම්මො උප්පජ්ජති නහෙතුපච්චයා – චක්ඛුවිඤ්ඤාණසහගතං එකං ඛන්ධඤ්ච චක්ඛායතනඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ… කායවිඤ්ඤාණසහගතං…පෙ… අහෙතුකං නොඋපාදා එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ… පටිසන්ධික්ඛණෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො උද්ධච්චසහගතො මොහො. (1)

නආරම්මණපච්චයා තීණි, නආසෙවනපච්චයා පඤ්ච.

නකම්මපච්චයාදි

390. උපාදා ධම්මං පච්චයා නොඋපාදා ධම්මො උප්පජ්ජති නකම්මපච්චයා – වත්ථුං පච්චයා නොඋපාදා චෙතනා. (1)

නොඋපාදා ධම්මං පච්චයා නොඋපාදා ධම්මො උප්පජ්ජති නකම්මපච්චයා – නොඋපාදා ඛන්ධෙ පච්චයා සම්පයුත්තකා චෙතනා; බාහිරං ආහාරසමුට්ඨානං උතුසමුට්ඨානං…පෙ… ද්වෙ මහාභූතෙ පච්චයා ද්වෙ මහාභූතා. (1)

නොඋපාදා ධම්මං පච්චයා උපාදා ධම්මො උප්පජ්ජති නකම්මපච්චයා – බාහිරෙ ආහාරසමුට්ඨානෙ උතුසමුට්ඨානෙ මහාභූතෙ පච්චයා උපාදාරූපං. (2)

නොඋපාදා ධම්මං පච්චයා උපාදා ච නොඋපාදා ච ධම්මා උප්පජ්ජන්ති නකම්මපච්චයා – බාහිරං ආහාරසමුට්ඨානං උතුසමුට්ඨානං එකං මහාභූතං පච්චයා තයො මහාභූතා උපාදා ච රූපං…පෙ… ද්වෙ මහාභූතෙ…පෙ…. (3)

උපාදා ච නොඋපාදා ච ධම්මං පච්චයා නොඋපාදා ධම්මො උප්පජ්ජති නකම්මපච්චයා – නොඋපාදා ඛන්ධෙ ච වත්ථුඤ්ච පච්චයා නොඋපාදා චෙතනා. (1)

නවිපාකපච්චයා පඤ්ච, නආහාරපච්චයා තීණි, නඉන්ද්‍රියපච්චයා තීණි.

නඣානපච්චයාදි

391. උපාදා ධම්මං පච්චයා නොඋපාදා ධම්මො උප්පජ්ජති නඣානපච්චයා – චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං. (1)

නොඋපාදා ධම්මං පච්චයා නොඋපාදා ධම්මො උප්පජ්ජති නඣානපච්චයා – පඤ්චවිඤ්ඤාණසහගතං එකං ඛන්ධං පච්චයා තයො ඛන්ධා…පෙ… ද්වෙ ඛන්ධෙ…පෙ… බාහිරං ආහාරසමුට්ඨානං උතුසමුට්ඨානං අසඤ්ඤසත්තානං…පෙ… ද්වෙ මහාභූතෙ පච්චයා ද්වෙ මහාභූතා. (1)

නොඋපාදා ධම්මං පච්චයා උපාදා ධම්මො උප්පජ්ජති නඣානපච්චයා – බාහිරෙ ආහාරසමුට්ඨානෙ උතුසමුට්ඨානෙ අසඤ්ඤසත්තානං මහාභූතෙ පච්චයා උපාදා කටත්තාරූපං. (2)

නොඋපාදා ධම්මං පච්චයා උපාදා ච නොඋපාදා ච ධම්මා උප්පජ්ජන්ති නඣානපච්චයා – බාහිරං ආහාරසමුට්ඨානං උතුසමුට්ඨානං අසඤ්ඤසත්තානං එකං මහාභූතං පච්චයා තයො මහාභූතා උපාදා ච කටත්තාරූපං…පෙ… ද්වෙ…පෙ…. (3)

උපාදා ච නොඋපාදා ච ධම්මං පච්චයා නොඋපාදා ධම්මො උප්පජ්ජති නඣානපච්චයා – චක්ඛුවිඤ්ඤාණසහගතං එකං ඛන්ධඤ්ච චක්ඛායතනඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ…. (1)

නමග්ගපච්චයා පඤ්ච, නසම්පයුත්තපච්චයා තීණි, නවිප්පයුත්තපච්චයා තීණි, නොනත්ථිපච්චයා තීණි, නොවිගතපච්චයා තීණි.