1. විභඞ්ගවාරො

හෙතුපච්චයො

386. උපාදා ධම්මං පච්චයා නොඋපාදා ධම්මො උප්පජ්ජති හෙතුපච්චයා – වත්ථුං පච්චයා නොඋපාදා ඛන්ධා; පටිසන්ධික්ඛණෙ…පෙ…. (1)

නොඋපාදා ධම්මං පච්චයා නොඋපාදා ධම්මො උප්පජ්ජති හෙතුපච්චයා… තීණි (නොඋපාදාමූලකෙ තීණිපි පටිච්චසදිසා, නින්නානාකරණා). (3)

උපාදා ච නොඋපාදා ච ධම්මං පච්චයා නොඋපාදා ධම්මො උප්පජ්ජති හෙතුපච්චයා – නොඋපාදා එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ… පටිසන්ධික්ඛණෙ…පෙ…. (1)

ආරම්මණපච්චයො

387. උපාදා ධම්මං පච්චයා නොඋපාදා ධම්මො උප්පජ්ජති ආරම්මණපච්චයා – චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා නොඋපාදා ඛන්ධා; පටිසන්ධික්ඛණෙ…පෙ…. (1)

නොඋපාදා ධම්මං පච්චයා නොඋපාදා ධම්මො උප්පජ්ජති ආරම්මණපච්චයා… එකං (පටිච්චසදිසං). (1)

උපාදා ධම්මඤ්ච නොඋපාදා ධම්මඤ්ච ධම්මං පච්චයා නොඋපාදා ධම්මො උප්පජ්ජති ආරම්මණපච්චයා – චක්ඛුවිඤ්ඤාණසහගතං එකං ඛන්ධඤ්ච චක්ඛායතනඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ… කායවිඤ්ඤාණසහගතං…පෙ… නොඋපාදා එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ… පටිසන්ධික්ඛණෙ…පෙ… (සංඛිත්තං). (1)