1. විභඞ්ගවාරො

හෙතුපච්චයො

332. අජ්ඣත්තිකං ධම්මං පච්චයා අජ්ඣත්තිකො ධම්මො උප්පජ්ජති හෙතුපච්චයා… තීණි (පටිච්චසදිසා).

බාහිරං ධම්මං පච්චයා බාහිරො ධම්මො උප්පජ්ජති හෙතුපච්චයා – බාහිරං එකං ඛන්ධං පච්චයා ද්වෙ ඛන්ධා චිත්තසමුට්ඨානඤ්ච රූපං, ද්වෙ ඛන්ධෙ…පෙ… (පටිසන්ධික්ඛණෙ ද්වෙපි කාතබ්බා, යාව අජ්ඣත්තිකා මහාභූතා) වත්ථුං පච්චයා බාහිරා ඛන්ධා. බාහිරං ධම්මං පච්චයා අජ්ඣත්තිකො ධම්මො උප්පජ්ජති හෙතුපච්චයා – බාහිරෙ ඛන්ධෙ පච්චයා චිත්තං, වත්ථුං පච්චයා චිත්තං (පටිසන්ධික්ඛණෙ ද්වෙපි කාතබ්බා). බාහිරං ධම්මං පච්චයා අජ්ඣත්තිකො ච බාහිරො ච ධම්මා උප්පජ්ජන්ති හෙතුපච්චයා – බාහිරං එකං ඛන්ධං පච්චයා ද්වෙ ඛන්ධා චිත්තඤ්ච චිත්තසමුට්ඨානඤ්ච රූපං, ද්වෙ ඛන්ධෙ…පෙ… වත්ථුං පච්චයා චිත්තං සම්පයුත්තකා ච ඛන්ධා (පටිසන්ධික්ඛණෙ ද්වෙපි කාතබ්බා). (3)

333. අජ්ඣත්තිකඤ්ච බාහිරඤ්ච ධම්මං පච්චයා අජ්ඣත්තිකො ධම්මො උප්පජ්ජති හෙතුපච්චයා – පටිසන්ධික්ඛණෙ චිත්තඤ්ච සම්පයුත්තකෙ ච ඛන්ධෙ පච්චයා අජ්ඣත්තිකං කටත්තාරූපං. අජ්ඣත්තිකඤ්ච බාහිරඤ්ච ධම්මං පච්චයා බාහිරො ධම්මො උප්පජ්ජති හෙතුපච්චයා – බාහිරං එකං ඛන්ධඤ්ච චිත්තඤ්ච පච්චයා ද්වෙ ඛන්ධා චිත්තසමුට්ඨානඤ්ච රූපං, ද්වෙ ඛන්ධෙ…පෙ… චිත්තඤ්ච මහාභූතෙ ච පච්චයා චිත්තසමුට්ඨානං රූපං, චිත්තඤ්ච වත්ථුඤ්ච පච්චයා බාහිරා ඛන්ධා (පටිසන්ධික්ඛණෙ තීණිපි කාතබ්බා). අජ්ඣත්තිකඤ්ච බාහිරඤ්ච ධම්මං පච්චයා අජ්ඣත්තිකො ච බාහිරො ච ධම්මා උප්පජ්ජන්ති හෙතුපච්චයා – පටිසන්ධික්ඛණෙ බාහිරං එකං ඛන්ධඤ්ච චිත්තඤ්ච පච්චයා ද්වෙ ඛන්ධා අජ්ඣත්තිකඤ්ච බාහිරඤ්ච කටත්තාරූපං, ද්වෙ ඛන්ධෙ…පෙ…. (3)

ආරම්මණපච්චයො

334. අජ්ඣත්තිකං ධම්මං පච්චයා අජ්ඣත්තිකො ධම්මො උප්පජ්ජති ආරම්මණපච්චයා – චක්ඛායතනං පච්චයා චක්ඛුවිඤ්ඤාණං…පෙ… කායායතනං …පෙ…. අජ්ඣත්තිකං ධම්මං පච්චයා බාහිරො ධම්මො උප්පජ්ජති ආරම්මණපච්චයා – චක්ඛායතනඤ්ච චක්ඛුවිඤ්ඤාණඤ්ච පච්චයා චක්ඛුවිඤ්ඤාණසහගතා ඛන්ධා…පෙ… කායායතනඤ්ච…පෙ… චිත්තං පච්චයා සම්පයුත්තකා ඛන්ධා; පටිසන්ධික්ඛණෙ…පෙ…. අජ්ඣත්තිකං ධම්මං පච්චයා අජ්ඣත්තිකො ච බාහිරො ච ධම්මා උප්පජ්ජන්ති ආරම්මණපච්චයා – චක්ඛායතනං පච්චයා චක්ඛුවිඤ්ඤාණං සම්පයුත්තකා ච ඛන්ධා…පෙ… කායායතනං…පෙ…. (3)

බාහිරං ධම්මං පච්චයා බාහිරො ධම්මො උප්පජ්ජති ආරම්මණපච්චයා – බාහිරං එකං ඛන්ධං පච්චයා ද්වෙ ඛන්ධා, ද්වෙ ඛන්ධෙ…පෙ… පටිසන්ධික්ඛණෙ…පෙ… වත්ථුං පච්චයා බාහිරා ඛන්ධා. බාහිරං ධම්මං පච්චයා අජ්ඣත්තිකො ධම්මො උප්පජ්ජති ආරම්මණපච්චයා – බාහිරෙ ඛන්ධෙ පච්චයා චිත්තං, වත්ථුං පච්චයා චිත්තං (පටිසන්ධික්ඛණෙ ද්වෙපි කාතබ්බා). බාහිරං ධම්මං පච්චයා අජ්ඣත්තිකො ච බාහිරො ච ධම්මා උප්පජ්ජන්ති ආරම්මණපච්චයා – වත්ථුං පච්චයා චිත්තඤ්ච සම්පයුත්තකා ච ඛන්ධා (පටිසන්ධික්ඛණෙ එකං කාතබ්බං). (3)

335. අජ්ඣත්තිකඤ්ච බාහිරඤ්ච ධම්මං පච්චයා අජ්ඣත්තිකො ධම්මො උප්පජ්ජති ආරම්මණපච්චයා – චක්ඛුවිඤ්ඤාණසහගතෙ ඛන්ධෙ ච චක්ඛායතනඤ්ච පච්චයා චක්ඛුවිඤ්ඤාණං…පෙ… කායවිඤ්ඤාණසහගතෙ…පෙ….

අජ්ඣත්තිකඤ්ච බාහිරඤ්ච ධම්මං පච්චයා බාහිරො ධම්මො උප්පජ්ජති ආරම්මණපච්චයා – චක්ඛුවිඤ්ඤාණසහගතං එකං ඛන්ධඤ්ච චක්ඛායතනඤ්ච චක්ඛුවිඤ්ඤාණඤ්ච පච්චයා ද්වෙ ඛන්ධා, ද්වෙ ඛන්ධෙ…පෙ… කායවිඤ්ඤාණසහගතං…පෙ… බාහිරං එකං ඛන්ධඤ්ච චිත්තඤ්ච පච්චයා ද්වෙ ඛන්ධා, ද්වෙ ඛන්ධෙ…පෙ… චිත්තඤ්ච වත්ථුඤ්ච පච්චයා බාහිරා ඛන්ධා (පටිසන්ධික්ඛණෙ ද්වෙපි කාතබ්බා). අජ්ඣත්තිකඤ්ච බාහිරඤ්ච ධම්මං පච්චයා අජ්ඣත්තිකො ච බාහිරො ච ධම්මා උප්පජ්ජන්ති ආරම්මණපච්චයා – චක්ඛුවිඤ්ඤාණසහගතං එකං ඛන්ධඤ්ච චක්ඛායතනඤ්ච පච්චයා ද්වෙ ඛන්ධා චක්ඛුවිඤ්ඤාණඤ්ච, ද්වෙ ඛන්ධෙ…පෙ… (සංඛිත්තං). (3)