1. විභඞ්ගවාරො

නහෙතුපච්චයො

323. අජ්ඣත්තිකං ධම්මං පටිච්ච අජ්ඣත්තිකො ධම්මො උප්පජ්ජති නහෙතුපච්චයා – අහෙතුකපටිසන්ධික්ඛණෙ චිත්තං පටිච්ච අජ්ඣත්තිකං කටත්තාරූපං. (1)

අජ්ඣත්තිකං ධම්මං පටිච්ච බාහිරො ධම්මො උප්පජ්ජති නහෙතුපච්චයා – අහෙතුකං චිත්තං පටිච්ච සම්පයුත්තකා ඛන්ධා චිත්තසමුට්ඨානඤ්ච රූපං; අහෙතුකපටිසන්ධික්ඛණෙ චිත්තං පටිච්ච සම්පයුත්තකා ඛන්ධා බාහිරං කටත්තා ච රූපං, විචිකිච්ඡාසහගතං උද්ධච්චසහගතං චිත්තං පටිච්ච විචිකිච්ඡාසහගතො උද්ධච්චසහගතො මොහො. (2)

අජ්ඣත්තිකං ධම්මං පටිච්ච අජ්ඣත්තිකො ච බාහිරො ච ධම්මා උප්පජ්ජන්ති නහෙතුපච්චයා – අහෙතුකපටිසන්ධික්ඛණෙ චිත්තං පටිච්ච සම්පයුත්තකා ඛන්ධා අජ්ඣත්තිකඤ්ච බාහිරඤ්ච කටත්තාරූපං. (3)

324. බාහිරං ධම්මං පටිච්ච බාහිරො ධම්මො උප්පජ්ජති නහෙතුපච්චයා – අහෙතුකං බාහිරං එකං ඛන්ධං පටිච්ච ද්වෙ ඛන්ධා චිත්තසමුට්ඨානඤ්ච රූපං, ද්වෙ ඛන්ධෙ…පෙ… අහෙතුකපටිසන්ධික්ඛණෙ …පෙ… (යාව අසඤ්ඤසත්තා) විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

බාහිරං ධම්මං පටිච්ච අජ්ඣත්තිකො ධම්මො උප්පජ්ජති නහෙතුපච්චයා – අහෙතුකෙ බාහිරෙ ඛන්ධෙ පටිච්ච චිත්තං; අහෙතුකපටිසන්ධික්ඛණෙ බාහිරෙ ඛන්ධෙ පටිච්ච චිත්තං අජ්ඣත්තිකං කටත්තා ච රූපං, අහෙතුකපටිසන්ධික්ඛණෙ වත්ථුං පටිච්ච චිත්තං. (2)

බාහිරං ධම්මං පටිච්ච අජ්ඣත්තිකො ච බාහිරො ච ධම්මා උප්පජ්ජන්ති නහෙතුපච්චයා – අහෙතුකං බාහිරං එකං ඛන්ධං පටිච්ච ද්වෙ ඛන්ධා චිත්තඤ්ච චිත්තසමුට්ඨානඤ්ච රූපං, ද්වෙ ඛන්ධෙ …පෙ… අහෙතුකපටිසන්ධික්ඛණෙ බාහිරං එකං ඛන්ධං පටිච්ච ද්වෙ ඛන්ධා චිත්තඤ්ච අජ්ඣත්තිකඤ්ච බාහිරඤ්ච කටත්තාරූපං, අහෙතුකපටිසන්ධික්ඛණෙ වත්ථුං පටිච්ච චිත්තං සම්පයුත්තකා ච ඛන්ධා. (3)

325. අජ්ඣත්තිකඤ්ච බාහිරඤ්ච ධම්මං පටිච්ච අජ්ඣත්තිකො ධම්මො උප්පජ්ජති නහෙතුපච්චයා – අහෙතුකපටිසන්ධික්ඛණෙ චිත්තඤ්ච සම්පයුත්තකෙ ච ඛන්ධෙ පටිච්ච අජ්ඣත්තිකං කටත්තාරූපං. (1)

අජ්ඣත්තිකඤ්ච බාහිරඤ්ච ධම්මං පටිච්ච බාහිරො ධම්මො උප්පජ්ජති නහෙතුපච්චයා – අහෙතුකං බාහිරං එකං ඛන්ධඤ්ච චිත්තඤ්ච පටිච්ච ද්වෙ ඛන්ධා චිත්තසමුට්ඨානඤ්ච රූපං, ද්වෙ ඛන්ධෙ…පෙ… අහෙතුකං චිත්තඤ්ච මහාභූතෙ ච පටිච්ච චිත්තසමුට්ඨානං රූපං; අහෙතුකපටිසන්ධික්ඛණෙ බාහිරං එකං ඛන්ධඤ්ච චිත්තඤ්ච පටිච්ච ද්වෙ ඛන්ධා බාහිරං කටත්තා ච රූපං; අහෙතුකපටිසන්ධික්ඛණෙ චිත්තඤ්ච මහාභූතෙ ච පටිච්ච බාහිරං කටත්තාරූපං, අහෙතුකපටිසන්ධික්ඛණෙ චිත්තඤ්ච වත්ථුඤ්ච පටිච්ච බාහිරා ඛන්ධා, විචිකිච්ඡාසහගතෙ උද්ධච්චසහගතෙ ඛන්ධෙ ච චිත්තඤ්ච පටිච්ච විචිකිච්ඡාසහගතො උද්ධච්චසහගතො මොහො. (2)

අජ්ඣත්තිකඤ්ච බාහිරඤ්ච ධම්මං පටිච්ච අජ්ඣත්තිකො ච බාහිරො ච ධම්මා උප්පජ්ජන්ති නහෙතුපච්චයා – අහෙතුකපටිසන්ධික්ඛණෙ බාහිරං එකං ඛන්ධඤ්ච චිත්තඤ්ච පටිච්ච ද්වෙ ඛන්ධා අජ්ඣත්තිකඤ්ච බාහිරඤ්ච කටත්තාරූපං, ද්වෙ ඛන්ධෙ ච…පෙ…. (3)

නආරම්මණපච්චයො

326. අජ්ඣත්තිකං ධම්මං පටිච්ච අජ්ඣත්තිකො ධම්මො උප්පජ්ජති නආරම්මණපච්චයා – පටිසන්ධික්ඛණෙ චිත්තං පටිච්ච අජ්ඣත්තිකං කටත්තාරූපං. (1)

අජ්ඣත්තිකං ධම්මං පටිච්ච බාහිරො ධම්මො උප්පජ්ජති නආරම්මණපච්චයා – චිත්තං පටිච්ච චිත්තසමුට්ඨානං රූපං; පටිසන්ධික්ඛණෙ චිත්තං පටිච්ච බාහිරං කටත්තාරූපං. (2)

අජ්ඣත්තිකං ධම්මං පටිච්ච අජ්ඣත්තිකො ච බාහිරො ච ධම්මා උප්පජ්ජන්ති නආරම්මණපච්චයා; පටිසන්ධික්ඛණෙ චිත්තං පටිච්ච අජ්ඣත්තිකඤ්ච බාහිරඤ්ච කටත්තාරූපං. (3)

බාහිරං ධම්මං පටිච්ච බාහිරො ධම්මො උප්පජ්ජති නආරම්මණපච්චයා – බාහිරෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ බාහිරෙ ඛන්ධෙ පටිච්ච බාහිරං කටත්තාරූපං, බාහිරෙ ඛන්ධෙ පටිච්ච වත්ථු, එකං මහාභූතං…පෙ… (යාව අසඤ්ඤසත්තා). (1)

බාහිරං ධම්මං පටිච්ච අජ්ඣත්තිකො ධම්මො උප්පජ්ජති නආරම්මණපච්චයා – පටිසන්ධික්ඛණෙ බාහිරෙ ඛන්ධෙ පටිච්ච අජ්ඣත්තිකං කටත්තාරූපං. (2)

බාහිරං ධම්මං පටිච්ච අජ්ඣත්තිකො ච බාහිරො ච ධම්මා උප්පජ්ජන්ති නආරම්මණපච්චයා – පටිසන්ධික්ඛණෙ බාහිරෙ ඛන්ධෙ පටිච්ච අජ්ඣත්තිකඤ්ච බාහිරඤ්ච කටත්තාරූපං. (3)

327. අජ්ඣත්තිකඤ්ච බාහිරඤ්ච ධම්මං පටිච්ච අජ්ඣත්තිකො ධම්මො උප්පජ්ජති නආරම්මණපච්චයා – පටිසන්ධික්ඛණෙ චිත්තඤ්ච සම්පයුත්තකෙ ච ඛන්ධෙ පටිච්ච අජ්ඣත්තිකං කටත්තාරූපං. (1)

අජ්ඣත්තිකඤ්ච බාහිරඤ්ච ධම්මං පටිච්ච බාහිරො ධම්මො උප්පජ්ජති නආරම්මණපච්චයා – බාහිරෙ ඛන්ධෙ ච චිත්තඤ්ච පටිච්ච චිත්තසමුට්ඨානං රූපං, චිත්තඤ්ච මහාභූතෙ ච පටිච්ච චිත්තසමුට්ඨානං රූපං (පටිසන්ධික්ඛණෙ ද්වෙ කාතබ්බා).

අජ්ඣත්තිකඤ්ච බාහිරඤ්ච ධම්මං පටිච්ච අජ්ඣත්තිකො ච බාහිරො ච ධම්මා උප්පජ්ජන්ති නආරම්මණපච්චයා – පටිසන්ධික්ඛණෙ චිත්තඤ්ච සම්පයුත්තකෙ ච ඛන්ධෙ පටිච්ච අජ්ඣත්තිකඤ්ච බාහිරඤ්ච කටත්තාරූපං (සංඛිත්තං). (3)

නඣානපච්චයො

328. අජ්ඣත්තිකං ධම්මං පටිච්ච බාහිරො ධම්මො උප්පජ්ජති නඣානපච්චයා – චක්ඛුවිඤ්ඤාණං පටිච්ච සම්පයුත්තකා ඛන්ධා…පෙ… කායවිඤ්ඤාණං…පෙ….

බාහිරං ධම්මං පටිච්ච බාහිරො ධම්මො උප්පජ්ජති නඣානපච්චයා – චක්ඛුවිඤ්ඤාණසහගතං එකං ඛන්ධං පටිච්ච ද්වෙ ඛන්ධා, ද්වෙ ඛන්ධෙ…පෙ… කායවිඤ්ඤාණසහගතං…පෙ… බාහිරං… ආහාරසමුට්ඨානං… උතුසමුට්ඨානං… අසඤ්ඤසත්තානං…පෙ…. බාහිරං ධම්මං පටිච්ච අජ්ඣත්තිකො ධම්මො උප්පජ්ජති නඣානපච්චයා – චක්ඛුවිඤ්ඤාණසහගතෙ ඛන්ධෙ පටිච්ච චක්ඛුවිඤ්ඤාණං…පෙ… කායවිඤ්ඤාණසහගතෙ ඛන්ධෙ පටිච්ච කායවිඤ්ඤාණං. බාහිරං ධම්මං පටිච්ච අජ්ඣත්තිකො ච බාහිරො ච ධම්මා උප්පජ්ජන්ති නඣානපච්චයා – චක්ඛුවිඤ්ඤාණසහගතං එකං ඛන්ධං පටිච්ච ද්වෙ ඛන්ධා චක්ඛුවිඤ්ඤාණඤ්ච, ද්වෙ ඛන්ධෙ…පෙ… කායවිඤ්ඤාණසහගතං එකං ඛන්ධං…පෙ…. (3)

අජ්ඣත්තිකඤ්ච බාහිරඤ්ච ධම්මං පටිච්ච බාහිරො ධම්මො උප්පජ්ජති නඣානපච්චයා – චක්ඛුවිඤ්ඤාණසහගතං එකං ඛන්ධඤ්ච චක්ඛුවිඤ්ඤාණඤ්ච පටිච්ච ද්වෙ ඛන්ධා, ද්වෙ ඛන්ධෙ…පෙ… කායවිඤ්ඤාණං (චක්කං).