1. විභඞ්ගවාරො

හෙතුපච්චයො

300. චිත්තසංසට්ඨසමුට්ඨානො ධම්මො චිත්තසංසට්ඨසමුට්ඨානස්ස ධම්මස්ස හෙතුපච්චයෙන පච්චයො – චිත්තසංසට්ඨසමුට්ඨානා හෙතූ සම්පයුත්තකානං ඛන්ධානං හෙතුපච්චයෙන පච්චයො; පටිසන්ධික්ඛණෙ…පෙ…. (මූලං කාතබ්බං) චිත්තසංසට්ඨසමුට්ඨානා හෙතූ චිත්තස්ස චිත්තසමුට්ඨානානඤ්ච රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (මූලං කාතබ්බං) චිත්තසංසට්ඨසමුට්ඨානා හෙතූ සම්පයුත්තකානං ඛන්ධානං චිත්තස්ස ච චිත්තසමුට්ඨානානඤ්ච රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (3)

ආරම්මණපච්චයො

301. චිත්තසංසට්ඨසමුට්ඨානො ධම්මො චිත්තසංසට්ඨසමුට්ඨානස්ස ධම්මස්ස ආරම්මණපච්චයෙන පච්චයො – චිත්තසංසට්ඨසමුට්ඨානෙ ඛන්ධෙ ආරබ්භ චිත්තසංසට්ඨසමුට්ඨානා ඛන්ධා උප්පජ්ජන්ති. (මූලං කාතබ්බං) චිත්තසංසට්ඨසමුට්ඨානෙ ඛන්ධෙ ආරබ්භ චිත්තං උප්පජ්ජති. (මූලං කාතබ්බං) චිත්තසංසට්ඨසමුට්ඨානෙ ඛන්ධෙ ආරබ්භ චිත්තඤ්ච සම්පයුත්තකා ච ඛන්ධා උප්පජ්ජන්ති. (3)

නොචිත්තසංසට්ඨසමුට්ඨානො ධම්මො නොචිත්තසංසට්ඨසමුට්ඨානස්ස ධම්මස්ස ආරම්මණපච්චයෙන පච්චයො – අරියා මග්ගා වුට්ඨහිත්වා මග්ගං පච්චවෙක්ඛන්ති…පෙ… නිබ්බානං පච්චවෙක්ඛන්ති. නිබ්බානං ගොත්‍රභුස්ස…පෙ…. (සංඛිත්තං. යථා චිත්තසහභූදුකෙ ආරම්මණං එවං කාතබ්බං, නින්නානාකරණං. නවපි පඤ්හා.)

අධිපතිපච්චයො

302. චිත්තසංසට්ඨසමුට්ඨානො ධම්මො චිත්තසංසට්ඨසමුට්ඨානස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති… තීණි (ද්වෙපි අධිපතී කාතබ්බා). (3)

නොචිත්තසංසට්ඨසමුට්ඨානො ධම්මො නොචිත්තසංසට්ඨසමුට්ඨානස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති… තීණි (ද්වෙපි අධිපති කාතබ්බා). (3)

චිත්තසංසට්ඨසමුට්ඨානො ච නොචිත්තසංසට්ඨසමුට්ඨානො ච ධම්මා චිත්තසංසට්ඨසමුට්ඨානස්ස ධම්මස්ස අධිපතිපච්චයෙන පච්චයො – ආරම්මණාධිපති. (එකායෙව අධිපති කාතබ්බා, නවපි පඤ්හා. යථා චිත්තසහභූදුකං, එවං කාතබ්බං, නින්නානාකරණං).

අනන්තරපච්චයාදි

303. චිත්තසංසට්ඨසමුට්ඨානො ධම්මො චිත්තසංසට්ඨසමුට්ඨානස්ස ධම්මස්ස අනන්තරපච්චයෙන පච්චයො (නවපි පඤ්හා චිත්තසහභූදුකසදිසා)… සමනන්තරපච්චයෙන පච්චයො… නව… සහජාතපච්චයෙන පච්චයො… නව (පටිච්චසදිසා)… අඤ්ඤමඤ්ඤපච්චයෙන පච්චයො… නව (පටිච්චසදිසා)… නිස්සයපච්චයෙන පච්චයො… නව (පච්චයසදිසා)… උපනිස්සයපච්චයෙන පච්චයො (නවපි පඤ්හා චිත්තසහභූදුකසදිසා, නින්නානාකරණං).

පුරෙජාතපච්චයාදි

304. නොචිත්තසංසට්ඨසමුට්ඨානො ධම්මො නොචිත්තසංසට්ඨසමුට්ඨානස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං… තීණි (චිත්තසහභූදුකසදිසා, නින්නානාකරණං).

චිත්තසංසට්ඨසමුට්ඨානො ධම්මො නොචිත්තසංසට්ඨසමුට්ඨානස්ස ධම්මස්ස පච්ඡාජාතපච්චයෙන පච්චයො (චිත්තසහභූදුකසදිසා, නින්නානාකරණං. තීණිපි පච්ඡාජාතා. ද්වෙ. එකමූලානං එකා ඝටනා)… ආසෙවනපච්චයෙන පච්චයො… නව.

කම්මපච්චයාදි

305. චිත්තසංසට්ඨසමුට්ඨානො ධම්මො චිත්තසංසට්ඨසමුට්ඨානස්ස ධම්මස්ස කම්මපච්චයෙන පච්චයො… තීණි (චිත්තසහභූදුකසදිසා නින්නානාකරණා. තීණිපි සහජාතා, නානාක්ඛණිකා)… විපාකපච්චයෙන පච්චයො… නව… ආහාරපච්චයෙන පච්චයො… නව (චිත්තසහභූගමනසදිසා, එකංයෙව කබළීකාරං ආහාරං)… ඉන්ද්‍රියපච්චයෙන පච්චයො… නව… ඣානපච්චයෙන පච්චයො… තීණි… මග්ගපච්චයෙන පච්චයො… තීණි… සම්පයුත්තපච්චයෙන පච්චයො… පඤ්ච.

විප්පයුත්තපච්චයො

306. චිත්තසංසට්ඨසමුට්ඨානො ධම්මො නොචිත්තසංසට්ඨසමුට්ඨානස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං (සංඛිත්තං). (1)

නොචිත්තසංසට්ඨසමුට්ඨානො ධම්මො නොචිත්තසංසට්ඨසමුට්ඨානස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං, පච්ඡාජාතං (සංඛිත්තං). (1)

නොචිත්තසංසට්ඨසමුට්ඨානො ධම්මො චිත්තසංසට්ඨසමුට්ඨානස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං. සහජාතං – පටිසන්ධික්ඛණෙ වත්ථු චිත්තසංසට්ඨසමුට්ඨානානං ඛන්ධානං විප්පයුත්තපච්චයෙන පච්චයො. පුරෙජාතං – චක්ඛායතනං චක්ඛුවිඤ්ඤාණසහගතානං ඛන්ධානං විප්පයුත්තපච්චයෙන පච්චයො…පෙ… කායායතනං…පෙ… වත්ථු චිත්තසංසට්ඨසමුට්ඨානානං ඛන්ධානං විප්පයුත්තපච්චයෙන පච්චයො. (2)

නොචිත්තසංසට්ඨසමුට්ඨානො ධම්මො චිත්තසංසට්ඨසමුට්ඨානස්ස ච නොචිත්තසංසට්ඨසමුට්ඨානස්ස ච ධම්මස්ස විප්පයුත්තපච්චයෙන පච්චයො – සහජාතං, පුරෙජාතං. සහජාතං – පටිසන්ධික්ඛණෙ වත්ථු චිත්තස්ස සම්පයුත්තකානඤ්ච ඛන්ධානං විප්පයුත්තපච්චයෙන පච්චයො. පුරෙජාතං – චක්ඛායතනං චක්ඛුවිඤ්ඤාණස්ස සම්පයුත්තකානඤ්ච ඛන්ධානං විප්පයුත්තපච්චයෙන පච්චයො…පෙ… කායායතනං…පෙ… වත්ථු චිත්තස්ස සම්පයුත්තකානඤ්ච ඛන්ධානං විප්පයුත්තපච්චයෙන පච්චයො. (3)

චිත්තසංසට්ඨසමුට්ඨානො ච නොචිත්තසංසට්ඨසමුට්ඨානො ච ධම්මා නොචිත්තසංසට්ඨසමුට්ඨානස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං (සංඛිත්තං).

අත්ථිපච්චයො

307. චිත්තසංසට්ඨසමුට්ඨානො ධම්මො චිත්තසංසට්ඨසමුට්ඨානස්ස ධම්මස්ස අත්ථිපච්චයෙන පච්චයො (පටිච්චසදිසා). චිත්තසංසට්ඨසමුට්ඨානො ධම්මො නොචිත්තසංසට්ඨසමුට්ඨානස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං (සංඛිත්තං). චිත්තසංසට්ඨසමුට්ඨානො ධම්මො චිත්තසංසට්ඨසමුට්ඨානස්ස ච නොචිත්තසංසට්ඨසමුට්ඨානස්ස ච ධම්මස්ස අත්ථිපච්චයෙන පච්චයො (පටිච්චසදිසා). (3)

නොචිත්තසංසට්ඨසමුට්ඨානො ධම්මො නොචිත්තසංසට්ඨසමුට්ඨානස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං (පුරෙජාතසදිසං පුරෙජාතං කාතබ්බං. සබ්බං සංඛිත්තං. විත්ථාරෙතබ්බං). (1)

නොචිත්තසංසට්ඨසමුට්ඨානො ධම්මො චිත්තසංසට්ඨසමුට්ඨානස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතං – චිත්තං සම්පයුත්තකානං ඛන්ධානං අත්ථිපච්චයෙන පච්චයො; පටිසන්ධික්ඛණෙ චිත්තං සම්පයුත්තකානං ඛන්ධානං අත්ථිපච්චයෙන පච්චයො, පටිසන්ධික්ඛණෙ වත්ථු චිත්තසංසට්ඨසමුට්ඨානානං ඛන්ධානං අත්ථිපච්චයෙන පච්චයො. පුරෙජාතං (පුරෙජාතසදිසං, නින්නානාකරණං). (2)

නොචිත්තසංසට්ඨසමුට්ඨානො ධම්මො චිත්තසංසට්ඨසමුට්ඨානස්ස ච නොචිත්තසංසට්ඨසමුට්ඨානස්ස ච ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතං – චිත්තං සම්පයුත්තකානං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො; පටිසන්ධික්ඛණෙ චිත්තං සම්පයුත්තකානං ඛන්ධානං කටත්තා ච රූපානං අත්ථිපච්චයෙන පච්චයො, පටිසන්ධික්ඛණෙ වත්ථු චිත්තස්ස සම්පයුත්තකානඤ්ච ඛන්ධානං අත්ථිපච්චයෙන පච්චයො. පුරෙජාතං (පුරෙජාතසදිසං). (3)

308. චිත්තසංසට්ඨසමුට්ඨානො ච නොචිත්තසංසට්ඨසමුට්ඨානො ච ධම්මා චිත්තසංසට්ඨසමුට්ඨානස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – චක්ඛුවිඤ්ඤාණසහගතො එකො ඛන්ධො ච චක්ඛුවිඤ්ඤාණඤ්ච ද්වින්නං ඛන්ධානං…පෙ… ද්වෙ ඛන්ධා ච…පෙ… චක්ඛුවිඤ්ඤාණසහගතො එකො ඛන්ධො ච චක්ඛායතනඤ්ච ද්වින්නං ඛන්ධානං…පෙ… ද්වෙ ඛන්ධා ච…පෙ… කායවිඤ්ඤාණසහගතො…පෙ… චිත්තසංසට්ඨසමුට්ඨානො එකො ඛන්ධො ච චිත්තඤ්ච ද්වින්නං ඛන්ධානං අත්ථිපච්චයෙන පච්චයො, ද්වෙ ඛන්ධා ච…පෙ… චිත්තසංසට්ඨසමුට්ඨානො එකො ඛන්ධො ච වත්ථු ච ද්වින්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා ච…පෙ… (පටිසන්ධික්ඛණෙ ද්වෙපි කාතබ්බා). (1)

චිත්තසංසට්ඨසමුට්ඨානො ච නොචිත්තසංසට්ඨසමුට්ඨානො ච ධම්මා නොචිත්තසංසට්ඨසමුට්ඨානස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං. සහජාතා – චක්ඛුවිඤ්ඤාණසහගතා ඛන්ධා ච චක්ඛායතනඤ්ච චක්ඛුවිඤ්ඤාණස්ස අත්ථිපච්චයෙන පච්චයො…පෙ… කායවිඤ්ඤාණසහගතා…පෙ… චිත්තසංසට්ඨසමුට්ඨානා ඛන්ධා ච චිත්තඤ්ච චිත්තසංසට්ඨසමුට්ඨානානං රූපානං අත්ථිපච්චයෙන පච්චයො, චිත්තසංසට්ඨසමුට්ඨානා ඛන්ධා ච මහාභූතා ච චිත්තසංසට්ඨසමුට්ඨානානං රූපානං අත්ථිපච්චයෙන පච්චයො, චිත්තසංසට්ඨසමුට්ඨානා ඛන්ධා ච වත්ථු ච චිත්තස්ස අත්ථිපච්චයෙන පච්චයො (පටිසන්ධික්ඛණෙ තීණි කාතබ්බා). පච්ඡාජාතා – චිත්තසංසට්ඨසමුට්ඨානා ඛන්ධා ච චිත්තඤ්ච පුරෙජාතස්ස ඉමස්ස නොචිත්තසංසට්ඨසමුට්ඨානස්ස කායස්ස අත්ථිපච්චයෙන පච්චයො. පච්ඡාජාතා – චිත්තසංසට්ඨසමුට්ඨානා ඛන්ධා ච චිත්තඤ්ච කබළීකාරො ආහාරො ච ඉමස්ස නොචිත්තසංසට්ඨසමුට්ඨානස්ස කායස්ස අත්ථිපච්චයෙන පච්චයො. පච්ඡාජාතා – චිත්තසංසට්ඨසමුට්ඨානා ඛන්ධා ච චිත්තඤ්ච රූපජීවිතින්ද්‍රියඤ්ච කටත්තාරූපානං අත්ථිපච්චයෙන පච්චයො. (2)

චිත්තසංසට්ඨසමුට්ඨානො ච නොචිත්තසංසට්ඨසමුට්ඨානො ච ධම්මා චිත්තසංසට්ඨසමුට්ඨානස්ස ච නොචිත්තසංසට්ඨසමුට්ඨානස්ස ච ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – චක්ඛුවිඤ්ඤාණසහගතො එකො ඛන්ධො ච චක්ඛායතනඤ්ච ද්වින්නං ඛන්ධානං චක්ඛුවිඤ්ඤාණස්ස ච අත්ථිපච්චයෙන පච්චයො, ද්වෙ ඛන්ධා ච…පෙ… කායවිඤ්ඤාණසහගතො…පෙ…. සහජාතො – චිත්තසංසට්ඨසමුට්ඨානො එකො ඛන්ධො ච චිත්තඤ්ච ද්වින්නං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො, ද්වෙ ඛන්ධා ච…පෙ… චිත්තසංසට්ඨසමුට්ඨානො එකො ඛන්ධො ච වත්ථු ච ද්වින්නං ඛන්ධානං චිත්තස්ස ච අත්ථිපච්චයෙන පච්චයො, ද්වෙ ඛන්ධා ච…පෙ… (පටිසන්ධික්ඛණෙ ද්වෙපි කාතබ්බා). (3)