1. විභඞ්ගවාරො

හෙතුපච්චයො

296. චිත්තසංසට්ඨසමුට්ඨානං ධම්මං සංසට්ඨො චිත්තසංසට්ඨසමුට්ඨානො ධම්මො උප්පජ්ජති හෙතුපච්චයා – චිත්තසංසට්ඨසමුට්ඨානං එකං ඛන්ධං සංසට්ඨා ද්වෙ ඛන්ධා, ද්වෙ ඛන්ධෙ…පෙ… පටිසන්ධික්ඛණෙ…පෙ…. (1)

චිත්තසංසට්ඨසමුට්ඨානං ධම්මං සංසට්ඨො නොචිත්තසංසට්ඨසමුට්ඨානො ධම්මො උප්පජ්ජති හෙතුපච්චයා – චිත්තසංසට්ඨසමුට්ඨානෙ ඛන්ධෙ සංසට්ඨං චිත්තං; පටිසන්ධික්ඛණෙ…පෙ…. (2)

චිත්තසංසට්ඨසමුට්ඨානං ධම්මං සංසට්ඨො චිත්තසංසට්ඨසමුට්ඨානො ච නොචිත්තසංසට්ඨසමුට්ඨානො ච ධම්මා උප්පජ්ජන්ති හෙතුපච්චයා – චිත්තසංසට්ඨසමුට්ඨානං එකං ඛන්ධං සංසට්ඨා ද්වෙ ඛන්ධා චිත්තඤ්ච, ද්වෙ ඛන්ධෙ…පෙ… පටිසන්ධික්ඛණෙ…පෙ…. (3)

නොචිත්තසංසට්ඨසමුට්ඨානං ධම්මං සංසට්ඨො චිත්තසංසට්ඨසමුට්ඨානො ධම්මො උප්පජ්ජති හෙතුපච්චයා – චිත්තං සංසට්ඨා සම්පයුත්තකා ඛන්ධා; පටිසන්ධික්ඛණෙ…පෙ…. (1)

චිත්තසංසට්ඨසමුට්ඨානඤ්ච නොචිත්තසංසට්ඨසමුට්ඨානඤ්ච ධම්මං සංසට්ඨො චිත්තසංසට්ඨසමුට්ඨානො ධම්මො උප්පජ්ජති හෙතුපච්චයා – චිත්තසංසට්ඨසමුට්ඨානං එකං ඛන්ධඤ්ච චිත්තඤ්ච සංසට්ඨා ද්වෙ ඛන්ධා, ද්වෙ ඛන්ධෙ…පෙ… පටිසන්ධික්ඛණෙ…පෙ…. (1) (සංඛිත්තං.)