1. විභඞ්ගවාරො

හෙතුපච්චයො

289. චිත්තසංසට්ඨසමුට්ඨානං ධම්මං පච්චයා චිත්තසංසට්ඨසමුට්ඨානො ධම්මො උප්පජ්ජති හෙතුපච්චයා (සංඛිත්තං) තීණි (පටිච්චවාරසදිසා).

නොචිත්තසංසට්ඨසමුට්ඨානං ධම්මං පච්චයා නොචිත්තසංසට්ඨසමුට්ඨානො ධම්මො උප්පජ්ජති හෙතුපච්චයා – චිත්තං පච්චයා චිත්තසමුට්ඨානං රූපං, වත්ථුං පච්චයා චිත්තං; පටිසන්ධික්ඛණෙ…පෙ… (යාව මහාභූතා). (1)

නොචිත්තසංසට්ඨසමුට්ඨානං ධම්මං පච්චයා චිත්තසංසට්ඨසමුට්ඨානො ධම්මො උප්පජ්ජති හෙතුපච්චයා – චිත්තං පච්චයා සම්පයුත්තකා ඛන්ධා, වත්ථුං පච්චයා චිත්තසංසට්ඨසමුට්ඨානා ඛන්ධා (පටිසන්ධික්ඛණෙ ද්වෙපි කාතබ්බා) තීණි. (3)

290. චිත්තසංසට්ඨසමුට්ඨානඤ්ච නොචිත්තසංසට්ඨසමුට්ඨානඤ්ච ධම්මං පච්චයා චිත්තසංසට්ඨසමුට්ඨානො ධම්මො උප්පජ්ජති හෙතුපච්චයා – චිත්තසංසට්ඨසමුට්ඨානං එකං ඛන්ධඤ්ච චිත්තඤ්ච පච්චයා ද්වෙ ඛන්ධා, ද්වෙ ඛන්ධෙ ච…පෙ… චිත්තසංසට්ඨසමුට්ඨානං එකං ඛන්ධඤ්ච වත්ථුඤ්ච පච්චයා ද්වෙ ඛන්ධා, ද්වෙ ඛන්ධෙ ච…පෙ… (පටිසන්ධික්ඛණෙ ද්වෙපි කාතබ්බා). (1)

චිත්තසංසට්ඨසමුට්ඨානඤ්ච නොචිත්තසංසට්ඨසමුට්ඨානඤ්ච ධම්මං පච්චයා නොචිත්තසංසට්ඨසමුට්ඨානො ධම්මො උප්පජ්ජති හෙතුපච්චයා – චිත්තසංසට්ඨසමුට්ඨානෙ ඛන්ධෙ ච චිත්තඤ්ච පච්චයා නොචිත්තසංසට්ඨසමුට්ඨානං රූපං, චිත්තසංසට්ඨසමුට්ඨානෙ ඛන්ධෙ ච මහාභූතෙ ච පච්චයා නොචිත්තසංසට්ඨසමුට්ඨානං රූපං, චිත්තසංසට්ඨසමුට්ඨානෙ ඛන්ධෙ ච වත්ථුඤ්ච පච්චයා චිත්තං (පටිසන්ධික්ඛණෙ තීණිපි කාතබ්බා). (2)

චිත්තසංසට්ඨසමුට්ඨානඤ්ච නොචිත්තසංසට්ඨසමුට්ඨානඤ්ච ධම්මං පච්චයා චිත්තසංසට්ඨසමුට්ඨානො ච නොචිත්තසංසට්ඨසමුට්ඨානො ච ධම්මා උප්පජ්ජන්ති හෙතුපච්චයා – චිත්තසංසට්ඨසමුට්ඨානං එකං ඛන්ධඤ්ච චිත්තඤ්ච පච්චයා ද්වෙ ඛන්ධා චිත්තසංසට්ඨසමුට්ඨානඤ්ච රූපං, ද්වෙ ඛන්ධෙ…පෙ… චිත්තසංසට්ඨසමුට්ඨානං එකං ඛන්ධඤ්ච වත්ථුඤ්ච පච්චයා ද්වෙ ඛන්ධා චිත්තඤ්ච, ද්වෙ ඛන්ධෙ…පෙ… (පටිසන්ධික්ඛණෙ ද්වෙපි කාතබ්බා). (3)

ආරම්මණපච්චයො

291. චිත්තසංසට්ඨසමුට්ඨානං ධම්මං පච්චයා චිත්තසංසට්ඨසමුට්ඨානො ධම්මො උප්පජ්ජති ආරම්මණපච්චයා… තීණි (පටිච්චසදිසා).

නොචිත්තසංසට්ඨසමුට්ඨානං ධම්මං පච්චයා නොචිත්තසංසට්ඨසමුට්ඨානො ධම්මො උප්පජ්ජති ආරම්මණපච්චයා – චක්ඛායතනං පච්චයා චක්ඛුවිඤ්ඤාණං…පෙ… කායායතනං…පෙ… වත්ථුං පච්චයා චිත්තං; පටිසන්ධික්ඛණෙ…පෙ…. (1)

නොචිත්තසංසට්ඨසමුට්ඨානං ධම්මං පච්චයා චිත්තසංසට්ඨසමුට්ඨානො ධම්මො උප්පජ්ජති ආරම්මණපච්චයා – චක්ඛායතනං පච්චයා චක්ඛුවිඤ්ඤාණසහගතා ඛන්ධා…පෙ… කායායතනං…පෙ… චිත්තං පච්චයා සම්පයුත්තකා ඛන්ධා, වත්ථුං පච්චයා චිත්තසංසට්ඨසමුට්ඨානා ඛන්ධා (පටිසන්ධික්ඛණෙ ද්වෙපි කාතබ්බා). (2)

නොචිත්තසංසට්ඨසමුට්ඨානං ධම්මං පච්චයා චිත්තසංසට්ඨසමුට්ඨානො ච නොචිත්තසංසට්ඨසමුට්ඨානො ච ධම්මා උප්පජ්ජන්ති ආරම්මණපච්චයා – චක්ඛායතනං පච්චයා චක්ඛුවිඤ්ඤාණං සම්පයුත්තකා ච ඛන්ධා…පෙ… කායායතනං…පෙ… වත්ථුං පච්චයා චිත්තං සම්පයුත්තකා ච ඛන්ධා (පටිසන්ධික්ඛණෙ එකං කාතබ්බං). (3)

292. චිත්තසංසට්ඨසමුට්ඨානඤ්ච නොචිත්තසංසට්ඨසමුට්ඨානඤ්ච ධම්මං පච්චයා චිත්තසංසට්ඨසමුට්ඨානො ධම්මො උප්පජ්ජති ආරම්මණපච්චයා – චක්ඛුවිඤ්ඤාණසහගතං එකං ඛන්ධඤ්ච චක්ඛායතනඤ්ච චක්ඛුවිඤ්ඤාණඤ්ච පච්චයා ද්වෙ ඛන්ධා, ද්වෙ ඛන්ධෙ…පෙ… කායවිඤ්ඤාණසහගතං…පෙ… චිත්තසංසට්ඨසමුට්ඨානං එකං ඛන්ධඤ්ච චිත්තඤ්ච පච්චයා ද්වෙ ඛන්ධා, ද්වෙ ඛන්ධෙ…පෙ… චිත්තසංසට්ඨසමුට්ඨානං එකං ඛන්ධඤ්ච වත්ථුඤ්ච පච්චයා ද්වෙ ඛන්ධා, ද්වෙ ඛන්ධෙ…පෙ… (පටිසන්ධික්ඛණෙ ද්වෙ කාතබ්බා). (1)

චිත්තසංසට්ඨසමුට්ඨානඤ්ච නොචිත්තසංසට්ඨසමුට්ඨානඤ්ච ධම්මං පච්චයා නොචිත්තසංසට්ඨසමුට්ඨානො ධම්මො උප්පජ්ජති ආරම්මණපච්චයා – චක්ඛුවිඤ්ඤාණසහගතෙ ඛන්ධෙ ච චක්ඛායතනඤ්ච පච්චයා චක්ඛුවිඤ්ඤාණං …පෙ… කායවිඤ්ඤාණසහගතෙ…පෙ… චිත්තසංසට්ඨසමුට්ඨානෙ ඛන්ධෙ ච වත්ථුඤ්ච පච්චයා චිත්තං (පටිසන්ධික්ඛණෙ එකං කාතබ්බං). (2)

චිත්තසංසට්ඨසමුට්ඨානඤ්ච නොචිත්තසංසට්ඨසමුට්ඨානඤ්ච ධම්මං පච්චයා චිත්තසංසට්ඨසමුට්ඨානො ච නොචිත්තසංසට්ඨසමුට්ඨානො ච ධම්මා උප්පජ්ජන්ති ආරම්මණපච්චයා – චිත්තසංසට්ඨසමුට්ඨානං එකං ඛන්ධඤ්ච වත්ථුඤ්ච පච්චයා ද්වෙ ඛන්ධා චිත්තඤ්ච, ද්වෙ ඛන්ධෙ…පෙ… (පටිසන්ධික්ඛණෙ එකං කාතබ්බං, සංඛිත්තං). (3)