1. විභඞ්ගවාරො

නහෙතුපච්චයො

282. චිත්තසංසට්ඨසමුට්ඨානං ධම්මං පටිච්ච චිත්තසංසට්ඨසමුට්ඨානො ධම්මො උප්පජ්ජති නහෙතුපච්චයා – අහෙතුකං චිත්තසංසට්ඨසමුට්ඨානං එකං ඛන්ධං පටිච්ච ද්වෙ ඛන්ධා, ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

චිත්තසංසට්ඨසමුට්ඨානං ධම්මං පටිච්ච නොචිත්තසංසට්ඨසමුට්ඨානො ධම්මො උප්පජ්ජති නහෙතුපච්චයා – අහෙතුකෙ චිත්තසංසට්ඨසමුට්ඨානෙ ඛන්ධෙ පටිච්ච චිත්තං චිත්තසමුට්ඨානඤ්ච රූපං; අහෙතුකපටිසන්ධික්ඛණෙ…පෙ…. (2)

චිත්තසංසට්ඨසමුට්ඨානං ධම්මං පටිච්ච චිත්තසංසට්ඨසමුට්ඨානො ච නොචිත්තසංසට්ඨසමුට්ඨානො ච ධම්මා උප්පජ්ජන්ති නහෙතුපච්චයා – අහෙතුකං චිත්තසංසට්ඨසමුට්ඨානං එකං ඛන්ධං පටිච්ච ද්වෙ ඛන්ධා චිත්තඤ්ච චිත්තසමුට්ඨානඤ්ච රූපං, ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ…. (3)

283. නොචිත්තසංසට්ඨසමුට්ඨානං ධම්මං පටිච්ච නොචිත්තසංසට්ඨසමුට්ඨානො ධම්මො උප්පජ්ජති නහෙතුපච්චයා – අහෙතුකං චිත්තං පටිච්ච චිත්තසමුට්ඨානං රූපං; අහෙතුකපටිසන්ධික්ඛණෙ චිත්තං පටිච්ච කටත්තාරූපං, චිත්තං පටිච්ච වත්ථු, වත්ථුං පටිච්ච චිත්තං, එකං මහාභූතං…පෙ… (යාව අසඤ්ඤසත්තා). (1)

නොචිත්තසංසට්ඨසමුට්ඨානං ධම්මං පටිච්ච චිත්තසංසට්ඨසමුට්ඨානො ධම්මො උප්පජ්ජති නහෙතුපච්චයා – අහෙතුකං චිත්තං පටිච්ච සම්පයුත්තකා ඛන්ධා; අහෙතුකපටිසන්ධික්ඛණෙ චිත්තං පටිච්ච සම්පයුත්තකා ඛන්ධා, අහෙතුකපටිසන්ධික්ඛණෙ වත්ථුං පටිච්ච චිත්තසංසට්ඨසමුට්ඨානා ඛන්ධා, විචිකිච්ඡාසහගතං උද්ධච්චසහගතං චිත්තං පටිච්ච විචිකිච්ඡාසහගතො උද්ධච්චසහගතො මොහො. (2)

නොචිත්තසංසට්ඨසමුට්ඨානං ධම්මං පටිච්ච චිත්තසංසට්ඨසමුට්ඨානො ච නොචිත්තසංසට්ඨසමුට්ඨානො ච ධම්මා උප්පජ්ජන්ති නහෙතුපච්චයා – අහෙතුකං චිත්තං පටිච්ච සම්පයුත්තකා ඛන්ධා චිත්තසමුට්ඨානඤ්ච රූපං; අහෙතුකපටිසන්ධික්ඛණෙ චිත්තං පටිච්ච සම්පයුත්තකා ඛන්ධා කටත්තා ච රූපං, අහෙතුකපටිසන්ධික්ඛණෙ වත්ථුං පටිච්ච චිත්තං සම්පයුත්තකා ච ඛන්ධා. (3)

284. චිත්තසංසට්ඨසමුට්ඨානඤ්ච නොචිත්තසංසට්ඨසමුට්ඨානඤ්ච ධම්මං පටිච්ච චිත්තසංසට්ඨසමුට්ඨානො ධම්මො උප්පජ්ජති නහෙතුපච්චයා – අහෙතුකං චිත්තසංසට්ඨසමුට්ඨානං එකං ඛන්ධඤ්ච චිත්තඤ්ච පටිච්ච ද්වෙ ඛන්ධා, ද්වෙ ඛන්ධෙ…පෙ… අහෙතුකපටිසන්ධික්ඛණෙ චිත්තසංසට්ඨසමුට්ඨානං එකං ඛන්ධඤ්ච චිතඤ්ච…පෙ… අහෙතුකපටිසන්ධික්ඛණෙ චිත්තසංසට්ඨසමුට්ඨානං එකං ඛන්ධඤ්ච වත්ථුඤ්ච පටිච්ච ද්වෙ ඛන්ධා, ද්වෙ ඛන්ධෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ ච චිත්තඤ්ච පටිච්ච විචිකිච්ඡාසහගතො උද්ධච්චසහගතො මොහො. (1)

චිත්තසංසට්ඨසමුට්ඨානඤ්ච නොචිත්තසංසට්ඨසමුට්ඨානඤ්ච ධම්මං පටිච්ච නොචිත්තසංසට්ඨසමුට්ඨානො ධම්මො උප්පජ්ජති නහෙතුපච්චයා – අහෙතුකෙ චිත්තසංසට්ඨසමුට්ඨානෙ ඛන්ධෙ ච චිත්තඤ්ච පටිච්ච චිත්තසමුට්ඨානං රූපං, අහෙතුකෙ චිත්තසංසට්ඨසමුට්ඨානෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං; අහෙතුකපටිසන්ධික්ඛණෙ චිත්තසංසට්ඨසමුට්ඨානෙ ඛන්ධෙ ච චිත්තඤ්ච පටිච්ච කටත්තාරූපං, අහෙතුකපටිසන්ධික්ඛණෙ චිත්තසංසට්ඨසමුට්ඨානෙ ඛන්ධෙ ච මහාභූතෙ ච පටිච්ච කටත්තාරූපං, අහෙතුකපටිසන්ධික්ඛණෙ චිත්තසංසට්ඨසමුට්ඨානෙ ඛන්ධෙ ච වත්ථුඤ්ච පටිච්ච චිත්තං. (2)

චිත්තසංසට්ඨසමුට්ඨානඤ්ච නොචිත්තසංසට්ඨසමුට්ඨානඤ්ච ධම්මං පටිච්ච චිත්තසංසට්ඨසමුට්ඨානො ච නොචිත්තසංසට්ඨසමුට්ඨානො ච ධම්මා උප්පජ්ජන්ති නහෙතුපච්චයා – අහෙතුකං චිත්තසංසට්ඨසමුට්ඨානං එකං ඛන්ධඤ්ච චිත්තඤ්ච පටිච්ච ද්වෙ ඛන්ධා චිත්තසමුට්ඨානඤ්ච රූපං, ද්වෙ ඛන්ධෙ…පෙ… (අහෙතුකපටිසන්ධික්ඛණෙ ද්වෙපි කාතබ්බා). (3)

නආරම්මණපච්චයො

285. චිත්තසංසට්ඨසමුට්ඨානං ධම්මං පටිච්ච නොචිත්තසංසට්ඨසමුට්ඨානො ධම්මො උප්පජ්ජති නආරම්මණපච්චයා – චිත්තසංසට්ඨසමුට්ඨානෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ…. (1)

නොචිත්තසංසට්ඨසමුට්ඨානං ධම්මං පටිච්ච නොචිත්තසංසට්ඨසමුට්ඨානො ධම්මො උප්පජ්ජති නආරම්මණපච්චයා – චිත්තං පටිච්ච චිත්තසමුට්ඨානං රූපං; පටිසන්ධික්ඛණෙ චිත්තං පටිච්ච කටත්තාරූපං, චිත්තං පටිච්ච වත්ථු, එකං මහාභූතං…පෙ… (යාව අසඤ්ඤසත්තා). (1)

චිත්තසංසට්ඨසමුට්ඨානඤ්ච නොචිත්තසංසට්ඨසමුට්ඨානඤ්ච ධම්මං පටිච්ච නොචිත්තසංසට්ඨසමුට්ඨානො ධම්මො උප්පජ්ජති නආරම්මණපච්චයා – චිත්තසංසට්ඨසමුට්ඨානෙ ඛන්ධෙ ච චිත්තඤ්ච පටිච්ච චිත්තසමුට්ඨානං රූපං, චිත්තසංසට්ඨසමුට්ඨානෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං (පටිසන්ධික්ඛණෙ ද්වෙ, සංඛිත්තං). (1)