1. විභඞ්ගවාරො

නහෙතුපච්චයො

18. සාරම්මණං ධම්මං පච්චයා සාරම්මණො ධම්මො උප්පජ්ජති නහෙතුපච්චයා… තීණි (පටිච්චවාරසදිසං).

අනාරම්මණං ධම්මං පච්චයා අනාරම්මණො ධම්මො උප්පජ්ජති නහෙතුපච්චයා – එකං මහාභූතං…පෙ… අසඤ්ඤසත්තානං එකං මහාභූතං…පෙ…. (1)

අනාරම්මණං ධම්මං පච්චයා සාරම්මණො ධම්මො උප්පජ්ජති නහෙතුපච්චයා – චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා අහෙතුකා සාරම්මණා ඛන්ධා; පටිසන්ධික්ඛණෙ…පෙ… වත්ථුං පච්චයා විචිකිච්ඡාසහගතො උද්ධච්චසහගතො මොහො. (2)

අනාරම්මණං ධම්මං පච්චයා සාරම්මණො ච අනාරම්මණො ච ධම්මා උප්පජ්ජන්ති නහෙතුපච්චයා – වත්ථුං පච්චයා අහෙතුකා සාරම්මණා ඛන්ධා, මහාභූතෙ පච්චයා චිත්තසමුට්ඨානං රූපං; පටිසන්ධික්ඛණෙ…පෙ…. (3)

19. සාරම්මණඤ්ච අනාරම්මණඤ්ච ධම්මං පච්චයා සාරම්මණො ධම්මො උප්පජ්ජති නහෙතුපච්චයා – චක්ඛුවිඤ්ඤාණසහගතං එකං ඛන්ධඤ්ච චක්ඛායතනඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ… කායවිඤ්ඤාණසහගතං…පෙ… අහෙතුකං සාරම්මණං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ… අහෙතුකපටිසන්ධික්ඛණෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො උද්ධච්චසහගතො මොහො. (1)

සාරම්මණඤ්ච අනාරම්මණඤ්ච ධම්මං පච්චයා අනාරම්මණො ධම්මො උප්පජ්ජති නහෙතුපච්චයා – අහෙතුකෙ සාරම්මණෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං; පටිසන්ධික්ඛණෙ…පෙ…. (2)

සාරම්මණඤ්ච අනාරම්මණඤ්ච ධම්මං පච්චයා සාරම්මණො ච අනාරම්මණො ච ධම්මා උප්පජ්ජන්ති නහෙතුපච්චයා – අහෙතුකං සාරම්මණං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ… අහෙතුකෙ සාරම්මණෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං; අහෙතුකපටිසන්ධික්ඛණෙ අහෙතුකං සාරම්මණං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ… අහෙතුකෙ සාරම්මණෙ ඛන්ධෙ ච මහාභූතෙ ච පච්චයා කටත්තාරූපං…පෙ… (සංඛිත්තං). (3)