1. විභඞ්ගවාරො

නහෙතුපච්චයො

243. චිත්තසහභුං ධම්මං පටිච්ච චිත්තසහභූ ධම්මො උප්පජ්ජති නහෙතුපච්චයා – අහෙතුකං චිත්තසහභුං එකං ඛන්ධං පටිච්ච ද්වෙ ඛන්ධා චිත්තසහභු චිත්තසමුට්ඨානඤ්ච රූපං, ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (එවං නවපි පඤ්හා කාතබ්බා. ‘‘අහෙතුක’’න්ති නියාමෙතබ්බං. යථා අනුලොමෙ ලබ්භති එවං කාතබ්බං. තීණි මොහො යථා චිත්තසමුට්ඨානදුකෙ එවමෙව කාතබ්බා.)

නකම්මපච්චයො

244. චිත්තසහභුං ධම්මං පටිච්ච චිත්තසහභූ ධම්මො උප්පජ්ජති නකම්මපච්චයා – චිත්තසහභූ ඛන්ධෙ පටිච්ච චිත්තසහභූ චෙතනා.

නොචිත්තසහභුං ධම්මං පටිච්ච නොචිත්තසහභූ ධම්මො උප්පජ්ජති නකම්මපච්චයා – බාහිරං… ආහාරසමුට්ඨානං… උතුසමුට්ඨානං…පෙ….

නොචිත්තසහභුං ධම්මං පටිච්ච චිත්තසහභූ ධම්මො උප්පජ්ජති නකම්මපච්චයා – චිත්තං පටිච්ච සම්පයුත්තකා චෙතනා.

චිත්තසහභුඤ්ච නොචිත්තසහභුඤ්ච ධම්මං පටිච්ච චිත්තසහභූ ධම්මො උප්පජ්ජති නකම්මපච්චයා – චිත්තසහභූ ඛන්ධෙ ච චිත්තඤ්ච පටිච්ච සම්පයුත්තකා චෙතනා.

නඣානපච්චයො

245. චිත්තසහභුං ධම්මං පටිච්ච චිත්තසහභූ ධම්මො උප්පජ්ජති නඣානපච්චයා – පඤ්චවිඤ්ඤාණසහගතං…පෙ….